Bibeli Luayãtaalá Soũↄ 90

90

Lua ń gbɛ̃nazĩnao

Lua gbɛ̃́ Mↄizi wabikɛa.

1 Dii, wá ulɛkĩin n ũ wɛ̃ ń wɛ̃o.

2 E ǹyↄ̃ gɛ́ gbɛ̀sĩsĩↄ kɛi,

e ǹyↄ̃ gɛ́ tↄↄlɛ ń dṹniao kálɛi,

Luan n ũ za asĩnizĩ e gↄↄpii.

3 Ni dilɛ gbɛ̃nazĩnaɛ aà gɛ̃ tɛ̃́ɛnau,

ni to aà ɛa gↄ̃ bùsuti ũ.

4 Wɛ̃̀ ↄ̀aa sↄo dɛnɛ lán gↄↄ dowa,*

ì gɛ̃nɛ lán gĩa ge gwãasĩnawa.

5 Ni to i dańla aai gaga,

aa dɛ lán sɛ̃ pↄ́ ì bↄlɛ kↄↄwa,

6 ì bↄlɛ kↄↄ, i gbã́,

ì i'o oosi, i giigaga.†

7 N pↄkũma ì wá suumpa,

n kòlokɛa ì gili gɛ̃wágu.

8 Wá yãvãiↄ kálɛa n aɛ,

wá asiiyãↄ bↄ̀ gupuau n kuu.

9 Wá gↄↄ ì gɛ̃kↄ̃u n kpɛ̃nɛ yã́i,

wá wɛ̃ni ì midɛ wá wea dóũdoũnau.

10 Wá wɛ̃ ì ka bàaↄ̃kwi taawa,

tó wá gbãa sↄ̃, basiiↄ̃.

Wɛ̃piↄ guu baa a pↄ́ pↄ́ na

ì mↄ́ ń taasio ń pↄsiaoɛ,

ì gɛ̃zɛa kpakpa, ↄ̃ wi kpagui.

11 Démɛ n pↄkũma gbãa lɛ́ dↄ̃i?

Démɛ n kpɛ̃nɛ lɛ́ dↄ̃ à vĩakɛɛ̀i?

12 Dadawɛ̃ɛ wàↄ wá wɛ̃ni dↄ̃ màa,

kɛ́ wà ↄ̃nↄ e wá sↄ̃ guu.

13 Dii, ńyↄ̃ ɛa wá wɛgwa bↄɛ ni?

Wɛ̃nadↄ̃ n zↄ̀blenaↄnɛ.

14 Tó gu dↄ̀, to n gbɛ̃kɛ mↄ́wá,

wíↄ pↄnakɛ ń gulakɛao gↄↄpii.

15 Wá gba pↄna ↄ pↄ́ ń tↄ̃̀wá gↄↄ lɛ́u,

taasi pↄ́ wá kɛ̀ wɛ̃̀ lɛ́u.

16 Ǹ n yãkɛaↄ ↄlↄ n zↄ̀blenaↄnɛ,

ní tó wá nɛ́ↄ n iko gbãa dↄ̃.

17 Dii wá Lua, báaadawágu nana,

ɛ̀fãaida wá zĩu wàↄ kã́fĩakɛ,

ao, ɛ̀fãaida wá zĩu wàↄ kã́fĩakɛ.

*90:4 2Piɛ 3.8

†90:6 Zaa 1.11