27
1 Ńsu ĩ́anadã zia yã́ musuo,
asa ń dↄ̃ yã́ pↄ́ zia a io.* Zaa 4.13-16
2 To wà n sáaukpa, ńsu ǹ nzĩa sáaukpao.
To à bↄ gbɛ̃pãleↄ lɛ́u, asu bↄ n lɛ́uo.
3 Gbɛ gbia, ũfãaá asoɛ,
kási sↄũ ĩadama ì tↄ̃́má dɛ beea.
4 Pↄkũma pãsĩ, pↄfɛ̃ ì dańla,
démɛ a nↄ̀sɛgↄ̃a fↄ̃ sↄ̃i?
5 Gbɛ̃́ gbaa laai bíla wáa maa
dɛ yea gbɛ̃́zi yãe oaɛ̀ saia.
6 Gbɛ̃na yã'ↄ̃ma kpaańzi náai vĩ,
ibɛɛ lɛ́pɛama mↄafili vĩ.† Luk 22.47-48
7 Gbɛ̃́ pↄ́ kãa ì zazakũ zↄ́waɛ,
ãma nↄandɛna pↄ́ kĩ̀sã dↄ̃o.
8 Gbɛ̃́ pↄ́ kɛ̃̀ a uawa àlɛ bɛbɛbɛbɛ
dɛ lán bã pↄ́ sã̀sã a sakpɛwawaɛ.
9 Nísi gĩnana ń tulaletio ì ń pↄ kɛ na,
lɛdaakↄ̃wa ń nↄ̀sɛmɛndoo ì gbɛ̃naↄ kɛ na.
10 Ńsu ǹ n gbɛ̃na vũaao ge n mae gbɛ̃na.
Tó yã́ n le, ńsu gɛ́ n vĩ̀i ge n dãuna bɛo.
N gbɛ̃́dee pↄ́ kú kãi maa dɛ n bɛ gbɛ̃́ pↄ́ kú zã̀a.
11 Ma nɛ́, ǹyↄ̃ ↄ̃nↄ, ma pↄ i kɛma na,
mí e yã́zãsi ma sↄ̃̀sↄ̃naↄwa.
12 Laaide ì dↄaa vãi e ↄ̃ ì ulɛɛ̀,
làasoosaide ì gi àↄ gɛ́ ↄ̃ ì yã'e.
13 Tó gbɛ̃́ nibↄ fĩa dì a miwa, ǹ aà ula sí,
ǹyↄ̃ kũa tↄ̀ↄma ũ gbɛ̃́pi gɛ̃ɛ ũ.
14 Tó n lɛdà ía n samaa'ò n gbɛ̃́deeɛ kↄↄkↄↄ,
wa dilɛ savãi ũɛ.
15 Nↄ sòlede muaa
ń í pↄ́ lɛ́ tↄ̃tↄ̃ zɛsai lou zã́oɛ.
16 Aà zùukɛaá ĩ́ana zùukɛaɛ,
ade lɛ́ í ↄkũkpaɛ.
17 Lá mↄↄ ì kↄ̃ lɛkɛ,
màa gbɛ̃nazĩna ì a gbɛ̃́dee kɛkɛ.
18 Tó n laaidↄ̀ lí nɛ'inawa, ńyↄ̃ a nɛ́ ble,
tó n ↄlìa n diizi, a n kpɛla.
19 Lá gbɛ̃́ ì a oa e í guu,
màa gbɛ̃́ ì a nↄ̀sɛ dↄ̃ a yãkɛawa.
20 Lá gɛↄ lí mↄ́ bɛda ń tɛ́owao,
màa gbɛ̃́ wɛ́ yea pↄ́i lí mↄ́wào.
21 Wì ã́nusu ń vuao maa dↄ̃ a baasaa guuɛ,
màa wì gbɛ̃́ bɛɛɛ dↄ̃ aà tↄbↄa guu.
22 Baa tó n faasaide kà góu
ńlɛ aà sabo ń pↄ́wɛnao sãnu,
aà faasaikɛ a kɛ̃wào.
23 Nìliↄ n pↄtuoↄ kua dↄ̃ maamaa,
laaidↄ n kpàsa pↄ́ↄwa.
24 Asa àizɛɛ líↄ ku gↄↄpiio,
mɛ́ gawi líↄ gɛ́ wɛ̃ ń wɛ̃oo.
25 Sɛ̃ ì láa, a dafu ì bↄlɛ,
ni a tàaa kpá pↄ́ↄnɛ,
26 ni pↄkasa kɛ ń n sãↄ kã́o,
ni bú lú ń n blè ↄ̃ao,
27 ń bleↄ vĩ iↄ dinzi n pↄblea ũ,
ni n uadeↄ ń n nↄɛ zĩkɛnaↄ gwaò.