Bibeli Luayãtaalá Yáasiↄ 12

12

1 Gbɛ̃́ pↄ́ lɛdama ì kɛɛ̀ na ye dↄ̃ai,

gbɛ̃́ pↄ́ totoa ì kɛɛ̀ ĩ́i mi vĩo.

2 Dii ì gbɛ̃maa wɛgwa,

ãma ì yãda làasoovãidea.

3 Vãikɛa lí gbɛ̃e zɛdↄo,

gbɛ̃maa zĩ́na sↄ̃ deea vĩo.

4 Nↄ maa dɛ a zã́ɛ lán fùawa,

nↄ widamade dɛɛ̀ mɛkɛmuuna ũ.

5 Gbɛ̃maaↄ ìↄ yã́zɛde yá,

gbɛ̃vãiↄ lɛdama mↄafili vĩ.

6 Gbɛ̃vãiↄ yã́á gbɛ̃wɛa yã́ɛ,

gbɛ̃maaↄ lɛ́ ì ń bↄ.

7 Wì gbɛ̃vãiↄ fuangba, aai midɛ,

ãma gbɛ̃maaↄ ua ìↄ ku.*

8 Wì gbɛ̃́ tↄbↄ aà ↄ̃nↄ lɛ́uɛ,

faasaide sↄ̃, wì sakauɛ.

9 Gbɛ̃́ kpɛɛ pↄ́ ì a zĩkɛ maannↄ

dɛ zĩadilɛngbia pↄ́ blɛ ì kɛ̃́sãwàla.

10 Gbɛ̃maa a pↄtuoↄ gwaa dↄ̃,

ãma gbɛ̃vãiↄ sósobi pãsĩ.

11 Zↄ̃ɛ ãiade ìↄ kãa,

gugiiyana sↄ̃, ↄ̃nↄ ì kɛ̃́sãwaɛ.

12 Gbɛ̃vãi ì ↄvãi nidɛ,

kási gbɛ̃maa zĩ́na mɛ́ ìↄ mↄ̀sɛ vĩ.

13 Gbɛ̃vãi lɛ́ vãi ì aà kṹ,

gbɛ̃maa sↄ̃ ì bↄ yãkeleu.

14 Lɛ́ maa ì ń ká pↄmaawa,

zĩ pↄ́ gbɛ̃́ kɛ̀ ài a suwà.

15 Sↄũ yãkɛa ì kɛɛ̀ maa,

ↄ̃nↄna sↄ̃ ì lɛdama ma.

16 Sↄũ ì to wà a pↄfɛ̃ dↄ̃wa gↄ̃̀ↄ,

laaide sↄ̃ ìli sↄ̃́sↄ̃a dao.

17 Sĩan'ona ì yã́zɛde o,

seelade vãi yã́ ìↄ mↄafili vĩ.

18 Yãbↄlɛna yã́ ì gbɛ̃́ sↄ̃ zↄ̃ lán fɛ̃nawa,

ↄ̃nↄna lɛgbɛ'i ì mↄ́ ń aafiao.

19 Sĩana pↄ́ wa ò ìↄ zɛdↄa,

ɛgɛ sↄ̃ ì gɛ̃zɛa lán wɛdɛawa.

20 Mↄafili kú vãi wàaipanaↄ sↄ̃u,

gbɛ̃'aafiawɛɛlɛnaↄ mɛ́ pↄna vĩ.†

21 Vãie lí gbɛ̃maa leo,

gbɛ̃vãiↄ sↄ̃, taasi ì dańla.

22 Dii ye ɛɛde gĩyãio,

aà pↄ ìↄ na sĩandewa.

23 Laaide ìↄ a dↄ̃a kũa a sↄ̃u,

sↄũ ì yãfaasai kpàwakɛ.

24 Zĩkɛa ↄplapla ì to gbɛ̃́ kible,

màa ì gbɛ̃́ da zↄbleu.

25 Kua bíli guu ì gbɛ̃́ kúsu kwɛ́,

yãna'oanɛ ì ń pↄ kɛ na.

26 Gbɛ̃maa ì a gbɛ̃na dazɛwa,

gbɛ̃vãiↄ yãkɛa ì ń sã́sã.

27 Màade lí nↄ̀ↄ sãsã maamaao,

ãiade ì laaidↄ a pↄ́ↄwa.

28 Kua yã́zɛde zɛ́u wɛ̃ni vĩ,

zɛ́pi sɛa lí ń kpá gaio.‡

*12:7 Mat 7.24-27

†12:20 Mat 5.9

‡12:28 Lom 6.23