Bibeli Luayãtaalá Mise 1

MISE

Yã́ pↄ́ kú láɛ bee guuↄ

Ãnabi Mise ku Isaia gↄↄɛ, à zĩkɛ̀ e wàↄ gɛ́ Yesu Kilisi ii wɛ̃̀ 740 e 700. Lá Isaia kɛ̀wa, à yã'ò Yudaↄnɛ gↄↄ pↄ́ Asili zĩgↄ̃ↄ lɛ́ gbãamↄnɛ́.

Mise lɛzà a gbɛ̃́piↄwa an bùsu ń ń mɛɛwiao yã́ musu, à mɛ̀ yã́ pↄ́ Isaili bùsu mɛɛwia Samali lè a ń le sↄ̃ɛ. Wà lɛ̀lɛ Samalipiwa e wàↄ gɛ́ Yesu Kilisi ii wɛ̃̀ 721. À mɛ̀ yã́ pↄ́ a ń lépi dɛ an duunaↄ gbɛ ũɛ, atɛ̃sa yã́zɛsai pↄ́ di ń guu. À yã́ↄ gbɛ̀amá Luaɛ, à yã́piↄ gbɛ̀a an gbɛ̃zↄ̃ↄↄ ń ń gbãadeↄwa, àizɛɛdeↄ ń dↄaanaↄ ń yã́kpalɛkɛnaↄ ń sa'onaↄ. À zↄadↄ̀ ãnabi pↄ́ aaì gbɛ̃́ↄ sã́sã ń yã́ nana oanɛ́oↄwa, asa aali onɛ́ aa nↄ̀sɛlilɛo.

Mise gbɛ̃́ↄ gbaa laai guu àlɛ wɛɛlɛ gbɛ̃́ pↄ́ aalɛ a yãmaↄ làasookɛ, aa zɛ́ maa sɛ́, aai zĩkɛ Lua pↄeãwa, aaiↄ kↄ̃ yãma, aaiↄ yekↄ̃i (6.8). À ɛ̀a Lua a gbɛ̃́ↄ suabaa yã́ baokpànɛ́ lↄ.

Mise lá waaso lɛɛ plaↄ yã́ pɛ́lɛpɛlɛakↄ̃uɛ. Lua mɛ̀ á yã́kpalɛkɛ ń a gbɛ̃́ↄ, í ń swã́gaga (1-3, 6.1-7.7), ↄ̃ à suabaa lɛgbɛ̃̀nɛ́ lↄ (4-5, 7.8-20), à mɛ̀ á suńnↄ ń pá ziu à ń na kía pↄ́ a bↄ Davidi bui guuɛ a ↄzĩ (5.1-4).

Yã́kpalɛkɛa ń Samalideↄ ń Yelusalɛũdeↄ

1 Dii yã'ò Mↄlɛsɛ gbɛ̃́ Miseɛ Yudaↄ kíaↄ Yotaũ* ń Aazao† ń Ezekiao‡ gↄↄ. Yã́ pↄ́ ku Samali ń Yelusalɛũowa ↄ̃ Dii òɛ̀ à mɛ̀:

2 Bui píi, à swã́kpa,

dṹnia ń gbɛ̃́ pↄ́ kú a guuↄ,

à ma yãma ápii.

Dii Lua lɛ́ bↄbↄánↄ

za a bɛ pↄ́ a kua adoau.

3 Gwa! Dii bↄ̀ a kúkĩi,

à pìla, àlɛ táa'o dṹnia gulɛsĩↄwa.

4 Gbɛ̀sĩsĩↄ lɛ́ yↄ́ aà zíɛ

lán zↄsa pↄ́ kú tɛ́ saɛwa.

Aalɛ bàalɛ lán í pↄ́ lɛ́ pila sĩ̀sĩwawa,

mɛ́ guzulɛↄ lɛ́ wɛ̃aa.

5 Bee a kɛ píi Yakↄbu buiↄ tàae ń Yudaↄ duunao yã́iɛ.

Bↄ́mɛ Yakↄbu buiↄ tàae ũi?

An mɛɛwia Samali tã́aↄ nolo?

Yudaↄ tã́agbagbakĩi kú má ni?

An mɛɛwia Yelusalɛũ nolo?

6 Bee yã́i má tó Samali gↄ̃ bɛzia ũ,

iↄ dɛ gu pↄ́ wa vɛ̃ɛbu kɛu ũ.

Má a gbɛↄ kↄ́lɛ guzulɛu,

mí a ɛ̃daalɛkĩiↄ bↄ gupuau.

7 Wa a tã́aↄ wíwi píiɛ,

wi tɛsↄ̃ gba pↄ́ wà mↄ̀ò ń kpɛ́uↄwa.

Má aà diipiↄ dúuzↄ̃ píiɛ.

Lá wà gbapiↄ kã̀aa káaluaↄ asea ũ,

wa taò à ɛa gↄ̃ káaluaↄ asea ũ lↄɛ.

8 Ɔ̃ Mise mɛ̀:

A yã́i tò má ↄ́ↄlↄ, má búbuapɛ,

máↄ bɛ bṹu kyalesai.

Má wiilɛ lán gbɛ̃gbonawa,

má ↄ́ↄlↄ lán koowa.

9 An bↄ gↄ̃̀ bↄ̀kↄↄ ũɛ,

à ma gbɛ̃́ Yudaↄ lè

e Yelusalɛũ bĩ́ibↄlɛu.

10 Ásu o Gatadeↄnɛo,

ásu ↄ́ↄlↄ Akooo.

À gbeembo bùsuu Bɛtafla.

11 Safiideↄ, à gɛ̃zɛa bṹu ń wío.

Zaanadeↄ bↄlɛ á gwaio,

Bɛtɛsɛlideↄ lɛ́ ↄ́ↄlↄ,

aa ń gba zɛkĩio.

12 Malodeↄ lɛ́ kↄ̃dɛ aafia'eai,

asa Dii vãi zĩ̀máɛ

e Yelusalɛũ bĩ́ibↄlɛu.

13 Lakisideↄ, à godↄ sↄ̃́ↄnɛ.

Ámɛ á tò Siↄnadeↄ nà duunkɛawa,

á wɛ̃́lɛu ↄ̃ Isailiↄ tàaekɛ̀u káau.

14 A yã́i tò á kɛ̃́kↄ̃wa ń Mↄlɛsɛgatadeↄ.

Akazibudeↄ aaↄ dɛ Isailiↄ kíaↄnɛ yiongo lɛ́baa ũɛ.

15 Malesadeↄ, Dii a mↄ́wá ń gbãamↄnɛdeo,

Isaili bɛɛɛdeↄ gɛ gɛ̃ Adulaũ gbɛ̀'ɛu.

16 À á mi bo, í a gbáa lɛ́,

à ↄ́ↄlↄ á nɛ́ yenzideↄ musu.

À á mi kɛ gbáigbai lán yãamusuwa,

asa wàlɛ ń kũkũ zĩ̀zↄↄ ũɛ.

Mise
<
1
>

*1:1 2Kia 15.32

†1:1 2Kia 16.1

‡1:1 2Kia 18.1