Bibeli Luayãtaalá Yoɛli 2

Zĩgↄ̃ↄ lɛɛũa ń kwaↄ

1 À kuupɛ Siↄna,

à zĩ̀gãalɛ Dii gbɛ̀sĩsĩ musu.

Bùsudeↄ píi, à gilikɛ,

asa Dii gↄↄ lɛ́ mↄ́, à kãikũ̀.

2 Gubeebeegↄↄɛ, gu a siakũ.

Lou guduuduu gↄↄɛ.

Zĩgↄ̃ dasiↄ lɛ́ li gbɛ̀sĩsĩↄla

lán gudↄawa.

An gbãa taa sáa i bↄ yãao

mɛ́ a bↄ bau lↄo.

3 Tɛ́ lɛ́ kṹ ń aɛ, tɛ́lɛpiↄ dↄ ń kpɛ.

Bùsu kálɛ ń aɛ lán Edɛni swaluwa,

à gↄ̃̀ ń iau lán gbáa wáiwaiwa,

pↄe i e pìlimáo.

4 An aɛ bↄ̀ lán sↄ̃́wa,

aalɛ bàalɛ lán zĩkasↄ̃ wàiↄwa.

5 An kↄ̃fĩ dↄ lán zĩkasↄ̃goↄwa,

aalɛ sòo zↄ̃ gbɛ̀sĩsĩ misonaa.

An kĩ́i dↄ lán tɛ́ kũa sɛ̃saowawa

lán zĩgↄ̃ dasi pↄ́ aalɛ zĩ'ↄpooↄwa.*

6 Kɛ́ buiↄ wɛsìńlɛ,

aa olo'olobò aa oosìsi.

7 Aalɛ siu ń bao lán gↄ̃saↄwa,

aalɛ vĩ gĩa lán zĩgↄ̃ↄwa.

Baade lɛ́ táa'o a aɛdↄawaɛ,

an gbɛ̃e i zã a ↄwao.

8 Aalɛ gã̀sazↄ̃kↄ̃ɛo,

aa mipɛ̀ ń aɛ,

aalɛ kuadi ń ibɛɛↄwa,

an zĩkabↄↄ lɛ́ kpánɛ́o.

9 Aalɛ si wɛ̃́lɛ guu,

aalɛ bàalɛ bĩ́i musu,

aalɛ dɛdɛ kpɛ́ↄwa,

aalɛ gɛ̃ fɛnɛntiↄ guu lán kpã́iↄwa.

10 Tↄↄlɛ lɛ́ lualua ń aɛ,

musupↄↄ lɛ́ deedee,

ĩatɛ̃ ń mↄvuao lɛ́ siakũ,

saanaↄ lɛ́ gↄ̃ tɛkɛsai.†

11 Dii dↄaa a zĩgↄ̃ↄnɛ ń lↄↄ gbãao.

Aà ìwaↄ dasi maamaaɛ,

gbɛ̃́ pↄ́ lɛ́ zĩkɛ aà yã́wapiↄ gbãa.

Dii gↄↄpi zↄ̃ↄ, a to vĩa ń kṹ.

Démɛ a e bↄui?‡

12 Dii mɛ̀: Baa tia kɛ́wa,

à su ma kĩ́i ń nↄ̀sɛmɛndoo

ń lɛyeo ń ↄↄlↄo ń búbuapɛao.

13 À nↄ̀sɛlilɛ,

i kɛ á pↄkasaↄ no.

À su Dii á Lua kĩ́i,

asa a sùuu ń sósobio vĩ,

aà pↄ lí pa kpaao.

A gbɛ̃kɛ vĩ zↄ̃ↄ,

ì ĩa pↄ́ a dìlɛ à damá bↄ a nↄ̀sɛɛɛ.

14 Wìliↄ dↄ̃o tó a wɛ̃nadↄ̃wɛ̃ɛ,

i wá tó ń báaao,

wí gbadaɛ̀ ń pↄ́wɛnao ń vɛ̃ɛo.

15 À kuupɛ Siↄna,

à gbɛ̃́ↄ sísi,

í lɛye dilɛ Lua pↄ́ ũ.

16 À gbɛ̃́ↄ kãaa à gbãbↄnɛ́.

À maezↄ̃ↄↄ naaa à nɛ́ↄ kãaa,

baa a yↄ̃minaↄ.

O nↄsɛnaɛ aà bↄ a kpɛ́u,

aà nↄ dafu i bↄ kpɛa.

17 To sa'ona pↄ́ lɛ́ Dii gbagbaↄ ↄ́ↄlↄ

aà kpɛ́ kpɛɛlɛ ń aà gbagbakĩio zãnguo.

Aa mɛ: Dii, ǹ n gbɛ̃́ↄ wɛgwa,

ńsu to n bui gↄ̃ láanipↄ ũo,

ńsu to buipãleↄ yãadańnↄo.

Bↄ́yãi buiↄ mɛ wá Lua kú má niɛi?

Dii zɛa ń a gbɛ̃́ↄ

18 Dii nↄ̀sɛ a fɛlɛ a bùsu yã́ musu,

i a gbɛ̃́ↄ wɛ̃nagwa.

19 A wemá à mɛ:

Málɛ pↄ́wɛna ń vɛ̃ɛo ń nísio kpã́sãɛ́,

íↄ kãa pã́upãu.

Má á kɛ láanipↄ ũ buiↄnɛ bau lↄo.

20 Má gugbãntoodeↄ yáɛ́ zã̀zã,

má ↄzↄ̃ńzi mà ń kpá gbáa wáiwai guuɛ.

Má ń dↄaanaↄ zu Ísida Wisideu,

mí ń gbɛzãdeↄ zu bɛ'aɛ ísiau.

Aa yaikɛ, an gĩ iↄ dↄ we,

yã́ pↄ́ aa kɛ̀ɛ́ píi yã́i.

21 Tↄↄlɛ, ńsu vĩakɛo!

Pↄnakɛ! Yáalↄ!

Asa ma Dii ma yãzↄ̃ↄkɛ̀.

22 Sɛ̃̀a nↄ̀bↄↄ, ásu vĩakɛo,

asa sɛ̃ lɛ́ kùsi kpálɛ.

Líↄ lɛ́ nɛ'i,

kaadↄɛna ń vɛ̃ɛo lɛ́ ń asea kɛ.

23 Siↄnadeↄ, à pↄnakɛ,

à yáalↄ Dii á Luawa.

Àlɛ á gba zuↄ lou kã́fĩa yã́iɛ,

àlɛ lou maɛ́ lán yãawaɛ.

A daalɛ a gↄↄwa, i bↄlɛi.

24 Pↄ́wɛna a nↄnↄaa a gbɛ̃zɛↄu,

vɛ̃ɛ ń nísio kákĩiↄ pa yɛlɛlɛ.

25 Pↄ́ pↄ́ kwaↄ blè wɛ̃ ń wɛ̃o,

sɛ̃sɛwɛkwaↄ ń kwasutɛ̃ↄ

ń kwa búunaↄ ń kwa keleↄ,

ma zĩgↄ̃ dasi pↄ́ ma gbaɛwápiↄ,

má a fĩaboɛ́.

26 Á pↄble lá á yeiwa à kã́,

í ma Dii á Lua táasilɛ,

asa ma yãbↄnsaɛkɛ̀ɛ́ɛ.

Wí a ma gbɛ̃́ↄ kũ bau lↄo.

27 Á Isailiↄ íↄ dↄ̃ sa

kɛ́ ma Dii á Lua má kú á guu,

mɛ́ dii pãle kuo.

Wí a ma gbɛ̃́ↄ kũ bau lↄo.

Yoɛli
<
2
>

*2:5 Zia 9.7-9

†2:10 Zia 8.12

‡2:11 Mal 3.2, Zia 6.17