Bibeli Luayãtaalá Yobu 31

Yobu zɛa ń a tàaesaidekɛo

1 Má dìlɛ ma wɛ́ɛ

asu àↄ biibiia wɛ̃́ndiaↄwao.

2 Lua kua za musu, ài kpele wì ewài?

Asea kpele Gbãapiide ì kɛnɛ́i?

3 Faasaide lí wɛ́tɛ̃a eo lé?

Kìsia lí vãikɛna leo lé?

4 Lua lɛ́ ma yãkɛaↄ eo lé?

A ma gbásɛa lɛ́ dↄ̃o lé?

5 Miↄ bɛ ń mↄafilio yã̀?

Ma kɛ̀sɛ lɛɛũ ń gbɛ̃sãsãao yã̀?

6 Lua, ma yↄ̃ a zɛ́wa ǹ ma gwa,

tó má kú tàaesai.

7 Tó ma pãzɛa,

mɛ́ pↄ́ pↄ́ ma wɛ́ lɛ́ eↄ lɛ́ ma sↄ̃ ble,

ge tó ma ↄ ku yãvãie guu,

8 to gbɛ̃pãleↄ pↄ́ pↄ́ má tↄ̃̀ↄ ble,

aai pↄ́ pↄ́ má bàↄ bilɛbilɛ.

9 Tó ma nↄɛ bĩikɛ̀ ma sↄ̃u,

tó ma a gbɛ̃́dee kpɛɛlɛ baa vĩ̀vĩ aà nↄ yã́i,

10 to gbɛ̃pãleↄ gbada ma nawa,

to aàↄ kĩna kɛ gbɛ̃pãleɛ.

11 Asa tó ma yã́pi kɛ̀, dↄ́ɛ'ĩiɛ,

duuna pↄ́ kà wà a yã́gↄ̃gↄ̃ɛ.

12 Yã́piá tɛ́ pↄkaalɛnaɛ,

dↄ̃ à kũ̀ ma buapↄ́ↄwa, i ma pↄ́ↄ bilɛbilɛ.

13 Tó ma gↄ̃ɛ ge nↄɛ zĩkɛna yãvĩmanↄ,

tó mi gↄ̃́gↄ̃ a zɛ́wao,

14 kpelewa má kɛ, tó Lua fɛ̀lɛmanↄ yã́pi yã́ii?

Tó à mↄ̀a, kpelewa má oɛ̀i?

15 Lua pↄ́ ma ikàsa nɛasakpɛu mɛ́ ade ikàsa sↄ̃o lé?

Lua doũpi mɛ́ wá baade kɛ̀ a da nↄ̀sɛuo lò?

16 Tó ma gi pↄ́ pↄ́ taaside lɛ́ a nidɛ kpáiwà,

tó ma gi gyaa gbɛ̃ando wɛgwai,

17 tó ma blɛblè ma a ta sã̀sã,

mɛ́ mi kpa tonɛ pↄ́ gwana vĩowao, tↄ̀ↄ!

18 Aawo! Za ma ɛ̀waasogↄↄ tonɛↄ maen ma ũ.

Za gↄↄ pↄ́ ma bↄ ma da nɛasakpɛu

gyaa gbɛ̃andoↄ dↄnlɛden ma ũ.

19 Tó ma gbɛ̃e è, ĩ́ana lɛ́ aà dɛ,

ge ma wɛ̃nade è, a zwãa vĩ à kualao,

20 mɛ́ mi a sãↄ kã́ pↄkasa kuaàla

aà mɛ kɛ̀ lↄ́ↄlↄↄũ à gbàsa samaa'òmɛɛo,

21 tó ma gbãamↄ̀ nɛtonɛɛ,

kɛ́ má dↄ̃ wa zɛmanↄ yã́i,

22 Lua to ma gãu golɛ à lɛ́lɛ,

ma gã̀sĩ i wo a pɛ́kĩi.

23 Má Lua ĩadama vĩa vĩ,

aà zↄ̃ↄkɛ yã́i má fↄ̃ yã́ bee taa kɛo.

24 Tó vua ma gbãa'èwà,

tó ma mɛ̀ vua tɛ̃ɛtɛ̃ɛ má a náai vĩ,

25 tó ma àizɛɛ zↄ̃ↄ ma pↄ dↄwà,

ↄda pↄ́ gɛ̃̀ ma ↄzĩpi,

26 tó ĩatɛ̃ tɛkɛa ma wɛpɛ̀wà,

ge mↄvua táa'oa ń a kɛfɛnkɛo,

27 ↄ̃ an yã́ lɛ́ ma sↄ̃ ble tɛɛtɛɛ,

tó ma lɛpɛ̀ ma ↄwa ma fↄkpàomá,

28 beeá duuna pↄ́ kà wà a yã́gↄ̃gↄ̃ɛ,

mↄafilikɛa Lua Musudeɛn we.

29 Mi pↄnakɛ ma zangude músi'ea yã́ musuo,

mi aà yáalↄ kɛ́ yã́ aà lè yã́io.

30 Mi we ma duunakɛ̀ ma aà kào.

31 Démɛ pìlaa, i nↄ̀ↄ so à kã̀o ni?

Ma bɛdeↄ mɛ́ ma seeladeↄ ũ.

32 Ma bɛ zɛ́ ìↄ wɛ̃a nibↄↄnɛ,

mili we gɛ̃zɛa ì gãaɛo.

33 Ma lakà ma tàaeↄla lán Adamuwae?

Ma a duuna ùlɛ yã̀?

34 Bíla zↄ̃̀lɛa, ↄ̃ vĩa ma kũ ma fua yã'oe?

Mi gí bↄi kpɛ́u sakaamagu yã́io.

35 Ée! Démɛ a ma yã́ɛ maai?

Ma zɛò. Gbãapiide yã́pi zã́sia sa.

Lua pↄ́ yãvĩmanↄpi aà kɛ̃ láu.

36 Má lápi da ma gã̀uɛ,

mí kpá fùa ũ,

37 mí gɛowà mà yã́ pↄ́ má kɛ̀ↄ dau mà siuɛ̀ píi,

mí sↄ̃aàzi lán kíawa.

38 Tó ma bú lɛ́ wiilɛa,

mɛ́ a gbaanaↄ lɛ́ ↄ́ↄlↄmɛɛ,

39 tó mi tↄↄlɛpi fĩaboo mɛ́ ma a blɛ blè,

ge tó ma gbɛ̃́ pↄ́ aa vĩ yãaↄ dɛ̀dɛɛ,

40 Lua to lɛaa bↄlɛ mase gɛ̃ɛ ũ,

papaa sↄ̃ ése gbɛu.

Yobu yã́ lɛ́n we.

Yobu
<
31
>