Bibeli Luayãtaalá Yobu 18

Yobu
<
18
>

18

Bai ì vãikɛna kṹ

1 Ɔ̃ Sua gbɛ̃́ Bilidada yã́zãsìwà à mɛ̀:

2 Ńyↄ̃ n yã́ midɛ bↄɛ ni?

Su n laaiwa, wí gbasa faaibo.

3 Bↄ́yãi ńlɛ wá gwa lán pↄtuoↄwai?

N wá dílɛ sↄũↄ ũ yã̀?

4 N gbɛ̃́ pↄ́ ni to n pↄfɛ̃ nzĩa taitaiɛ,

dṹnia a gↄ̃ bɛzia ũ n yã́i nɛe?

Gbɛsi a sↄ̃ n yã́ musu nɛe?

5 Gbɛ̃vãi gupua ì láa,

aà tɛ́vua ì midɛ.

6 Aà kpɛ́ gupua ì li gusia ũ,

filia pↄ́ kú aà saɛ ì ga.

7 Aà táa'oa ń sↄ̃o dilɛa ì gↄ̃ sea tá ũ,

aà yã́zɛkalɛa ì aà fuangba.

8 Aà tá ì aà kpa baia,

aà gbá ì si balɛtãu.

9 Mↄ ì aà kũ a kɛ̀sɛwoũ lɛ́u,

baipi ì kúlɛwà búlu.

10 Ba kpaa aà aɛ tↄↄlɛu,

kúsɛ lɛ́ aà dã a táa'ozɛu.

11 Kìsia ì koezↄ̃aàzi,

àlɛ aà gbɛsɛlɛ.

12 Nↄana ì aà gbãa kↄ'ɛ,

músi ìↄ aà kpaa gua dã́.

13 Ì aà mɛ̀ gueↄ ble,

gagyã ì aà mɛguↄ yↄ́.

14 Wì aà ga wà bↄ kpɛ́ pↄ́ a kuu aafiau,

wì aà gálɛ gɛò pↄ́ pↄ́ ì to vĩa ń kṹↄ mideɛ.

15 Aà kpɛ́ gↄ̃̀ gii,

ĩatɛ̃gbↄ̃ lì aà uaa.

16 Aà zĩ́naↄ i giigaga tíu,

aà gↄ̃naↄ i imi musu.

17 Aà yã́ i sã́ńgu dṹniau,

aà tↄ́ i midɛ tↄↄlɛ.

18 Wi aà ya gupuau wà aà kpa gusiau,

wi ↄzↄ̃aàzi aà ã́nuato.

19 A nɛ́ ge buie to a gbɛ̃́ↄ guuo,

aà bɛ gbɛ̃e a bↄo.

20 Yã́ pↄ́ aà lè dì bɛ'aɛdeↄwa,

gukpɛdeↄ kãsì aà yã́ musu.

21 Yã́ pↄ́ ì faasaide ua len we,

luadↄ̃nsai gwean we.

Yobu
<
18
>