Bibeli Luayãtaalá Yobu 11

Yobu
<
11
>

11

Nↄ̀sɛwɛ̃ Luaɛ!

1 Ɔ̃ Naama gbɛ̃́ Zofaa yãsɛ̀ à mɛ̀: 2 Aà yã́ dasi, wá wewào lé?

Yãbↄlɛnapi a bↄ maa yã̀?

3 N yãpã oa a gbɛ̃́ↄ lɛ́ kũa?

N yãyaaabↄ̀lɛ, ↄ̃ wa zↄadↄmaoa?

4 N mɛ̀ n yãdanɛ sãa vĩo,

ń kú Luaɛ tàaesai.

5 Tó Lua yã'ò lé,

a n ɛɛboɛ.

6 A ↄ̃nↄ asii bↄↄlɛkɛnɛ,

asa Lua ↄ̃nↄ zↄ̃ↄ dɛwála.

Ń dↄ̃ Lua lɛ́ ĩadama n vãi lɛ́u nɛe?

7 Ńyↄ̃ fↄ̃ ǹ Lua asii dↄ̃a?

Ńyↄ̃ bↄ Gbãapiide zↄ̃ↄkɛ lɛ́wae?

8 A lɛsĩ dɛ luabɛa, ńyↄ̃ kɛ kpelewa ni?

A zã dɛ bɛdaa, ńyↄ̃ fↄ̃ ǹ dↄ̃e?

9 A zↄ̃ↄ dɛ tↄↄlɛa, a lɛ́ vĩo,

a yàasa dɛ ísiaa maamaa.

10 Tó à mↄ̀ gbɛ̃́ kũ̀ a dàkpɛu,

mɛ́ àlɛ yã́kpalɛkɛaànↄ,

démɛ a fↄ̃ gii?

11 A mↄafilideↄ dↄ̃ fá!

Tó à vãikɛa è, ìli a yãdao lé?

12 Lá zàa'ĩna lí nɛ'i gbɛ̃nazĩna ũo,

màa nↄ̀sɛsaide lí ↄ̃nↄkũo.

13 Tó n n nↄ̀sɛ wɛ̃̀ Luaɛ,

mɛ́ n ↄsɛ̀ musu wabikɛa guu,

14 tó n nzĩa gà duunaɛ,

mɛ́ yãvãi i zↄ̃lɛkĩi e n bɛo,

15 n mi aↄ daa ía sãasaiɛ,

ńyↄ̃ zɛdↄ vĩasai.

16 N taasi yã́ i sãngu,

a dↄangu iↄ dɛ lán í gɛ̃a zɛ́awa.

17 N kua i tɛkɛ dɛ fãanɛ ĩatɛ̃a,

gusia pↄ́ ń kúu i pu lán gudↄawa.

18 N sↄ̃ aↄ dilɛa, n nↄ̀sɛ iↄ daa doũ,

n laai aↄ kpalɛa, níↄ i'o ń a nao kau.

19 Ńyↄ̃ ↄli nzĩau,

gbɛ̃e yã́ a iwãa ka n pↄao,

baade a wɛɛlɛ àↄ nannↄ.

20 Gbɛ̃vãiↄ yiongo lɛ́baa dↄ̃́a,

aa bↄkĩi eo, yã́ pↄ́ gↄ̃̀nɛ́ mɛ́ ga ũ.

Yobu
<
11
>