Bibeli Luayãtaalá Yobu 5

Yobu
<
5
>

5

1 Lɛzu sa ǹ ma, tó gbɛ̃e a wema.

Malaika kpele ńyↄ̃ liliwài?

2 Sↄũ ì ga a yã́kũańnↄ yã́i,

mìsaide ì kpagua a wɛdↄanɛ yã́i.

3 Má è sↄũ zĩ́napɛ̀lɛ,

ↄ̃ zĩ́napi yↄ̀ kã́ndo.

4 Aà nɛ́ↄ kɛ̃̀ aafia zɛ́wa,

wì ń yã́ málɛnɛ́ yã́kpalɛkɛkĩi,

gbɛ̃e lí zɛńnↄo.

5 Nↄandɛnaↄ aà buapↄↄ blè,

baa pↄ́ pↄ́ à lɛkaa lìai,

imidɛnaↄ lùa aà àizɛɛi.

6 Yã'ĩa lí bↄlɛ bùsuwao,

yã'ↄ̃ma lí bↄlɛ tↄↄlɛwao.

7 Kási lá tɛkↄna gɛa musu sea vĩo,

màa gbɛ̃́ pↄ́ wa ì píi ì yã'ĩa e.

8 Tó mámɛ sↄ̃, má gbɛa Luawa,

mí a yã́ kpálɛ aà gɛ̃zĩ.

9 Ì yãzↄ̃ↄ pↄ́ wa fↄ̃ a gbadↄ̃o kɛ,

wa fↄ̃ aà yãbↄnsaɛkɛaↄ lɛ́ dↄ̃o.

10 Ì to lou ma dṹniau,

ì to a í dagua sɛ̃saou.

11 Ì gbɛ̃́ kpɛɛnaↄ sɛ lɛsĩ,

ì oosisinaↄ da pↄnau.

12 Ì yã́ pↄ́ kↄ̃nideↄ lɛ́ yá gboo,

kɛ́ an ↄ su àↄ báaa vĩo yã́i.

13 Ì ↄ̃nↄnaↄ kṹ ń kↄ̃nikɛa guu,*

ì to yãfuangbanaↄ lɛdama kɛ pã.

14 Gu ìↄ sianɛ́ fãanɛ,

aaì ↄmalɛmalɛ ĩatɛ̃ gbãa zã́ lán gwã́wa.

15 Ì taasideↄ bↄ ga lɛ́zĩ,

ì ń bↄ gbãamↄnɛdeↄ ↄzĩ.

16 Ayãmɛto gbãasaideↄ wɛ́ aↄ dↄaàzi,

yãkpaanlakɛnaↄ i kɛ kyↄ̃́.

17 Báaaden gbɛ̃́ pↄ́ Lua ì aà toto ũ.

Tó Gbãapiide lɛ́ n swãgaga, ńsu gio.†

18 Asa ì gbɛ̃́ kɛ'ĩa, ↄ̃ ì aà bↄ gwa,

ì gbɛ̃́ wíwi, ↄ̃ ì aà gbã́gbã.‡

19 A n bↄ taasiu gɛ̃n soolo,

baa tó a dɛa, a n nɛo.

20 A n si gawa nↄana gↄↄ,

a n bↄ fɛ̃nda lɛ́zĩ zĩlau.

21 Dii a kàedanzi kɛ́ wasu yãdↄmao yã́i.

Tó músi mↄ̀, vĩa a n kũo.

22 Ńyↄ̃ músi ń nↄanao yáalↄ,

ńyↄ̃ vĩakɛ wàiↄnɛo.

23 Asa á kↄ̃ yãma ń gbɛↄ, n bú a gbɛ kao,

ńyↄ̃ↄ na ń sɛ̃̀anↄbↄↄ,

24 níↄ dↄ̃ kɛ́ n ua aↄ na.

Tó n gɛ n kpàsau, pↄe a kɛ̃́são.

25 Ńyↄ̃ dↄ̃ kɛ́ n nɛ́ↄ aaↄ dasi,

n buiↄ ligua lán sɛ̃wa.

26 Ńyↄ̃ zikũɛ, ní gbasa ga

lán ése pↄ́ wa kɛ̃̀ a gↄↄwawa.

27 Kɛ́ wa ↄlì yã́piu, lá wá èn we.

Yã́pi sí, ní dↄ̃ nzĩa yã́ ũ.

Yobu
<
5
>

*5:13 1Kln 3.19

†5:17 Yaa 3.11, Ɛbɛ 12.5

‡5:18 Oze 6.1