10
1 Waiyoo gbɛ̃́ pↄ́ aaì yãfaasai ń gbɛ̃wɛtãao yãdilɛↄ.
2 Aaì taasideↄ yãna símá,
aaì ma gbɛ̃́ wɛ̃nadeↄ yã́ málɛnɛ́.
Gyaa gbɛ̃andoↄ ì gↄ̃ ń pↄ́ mↄsↄaↄ ũ,
aaì nɛtonɛ pↄ́ gwana vĩoↄ waa.
3 Gↄↄ pↄ́ Dii mↄ̀ ĩadaiwá,
wà bↄ̀ za zã̀zã wà mↄ̀ á músikɛi,
á kɛ kpelewa ni?
Dé kĩ́i á bàalɛ gɛ́u aà á misii?
Mákĩi á á àizɛɛↄ toui?
4 A kee kpɛ́o,
sema à vlãnau ń zĩ̀zↄↄ,
ge àↄ ku gbɛ̃́ pↄ́ wà ń dɛdɛↄ guu.
Ń beeo aà pↄkũma a kpálɛo,
aà ↄ aↄ looańlaɛ.
Dii yãdaa Asiliↄla
5 Waiyoo Asili pↄ́ aaì pↄkũmabↄbↄmámɛɛↄ!
Ɔ̃mɛ ma pↄkpɛ̃nɛ go pↄ́ na ma ↄzĩ ũ.
6 Málɛ ń kpakↄ̃a ń bui luayãdansaiↄ,
málɛ ń zĩ gbɛ̃́ pↄ́ aa ma pↄ fɛ̃̀ↄwaɛ,
kɛ́ aa ń pↄ́ↄ naaa, aa ń àizɛɛ sɛ́lɛ,
aai ↄ̃zↄ̃má zɛ́kpaaↄu lán pɛ̀lɛawa.
7 Ãma yã́ pↄ́ aalɛ yán weo,
làasoo pↄ́ kúmán weo.
Gbɛ̃́ↄ midɛa yã́ mɛ́ dↄ ń sↄ̃wa,
kɛ́ aa e buiↄ míↄnzↄ̃ dasi.
8 Asa aaì mɛ:
Ma dↄaanaↄá kíaↄnɛ píio lò?
9 Lá má kɛ̀ Kaakemiɛ,
má kɛ̀ Kalenↄɛɛ.
Lá má kɛ̀ Amataɛ,
má kɛ̀ Aapadaɛɛ.
Lá má kɛ̀ Damasiɛ,
má kɛ̀ Samaliɛɛ.
10 Ma ↄbↄ̀ ma tã́aↄ bùsuↄ sìmá,
kási sↄ̃ an diipiↄ dasi
dɛ Yelusalɛũ ń Samalio pↄ́ↄla.
11 Lá má kɛ̀ Samaliɛ ń a tã́aↄ,
má kɛ Yelusalɛũɛ ń a diiↄo lé?
12 Tó Dii a yãkɛa Yelusalɛũ Siↄna gbɛ musu lɛzɛ̀, a Asiliↄ kía swã́gagaɛ̀ wala pↄ́ a vĩ ń aà wɛkũaamao yã́i. 13 Asa à mɛ̀:
Má kɛ̀ ń mazĩa gbãaoɛ ń ma ↄ̃nↄo,
asa ma wɛ́ zɛ̃aɛ.
Ma bùsu zↄ̃lɛↄ dɛ̀,
ma ń àizɛɛↄ nàaa,
ↄ̃ ma ń gↄ̃sa kpalablenaↄ pã̀lɛ.
14 Lá wì ↄgɛ̃ bã sakpɛu,
màa ma buiↄ àizɛɛↄ nàaa.
Lá wì gbe pↄ́ bã gòa sɛ́lɛ,
màa ma ń bùsuↄ sì píi.
An kee i kúu'oao,
an kee i lɛwɛ̃aaao.
15 Tó wa mↄo kũao, a zĩkɛe?
Tó wi sii sɛo, a zĩkɛa?
Lípana a liaa ń a kũnaoe?
Go a fɛlɛ ń gbɛ̃́ pↄ́ lɛ́ pↄgbɛ̃òoe?
16 A yã́i tò Dii Lua Zĩgↄ̃de
a ibabagyã kpa Asili kíapi zĩgↄ̃ kãapiↄzi,
i to tɛ́ aà gawi kↄ'ɛ.
17 Isailiↄ Gupua a gↄ̃ tɛ́ ũ,
an Lua Kuaadoade a gↄ̃ tɛ́vua ũ,
i kũ Asili lɛaaↄ ń aà lɛsikaoↄwa gↄↄ do kóũ.
18 A aà likpɛↄ ń aà swaluↄ gawi midɛ míↄ,
aa láa lán gyãe ibabaawa.
19 Lí pↄ́ a gↄ̃ aà likpɛu aↄ dasio,
baa nɛ́fɛ̃nɛna a fↄ̃ a lɛ́ dↄ̃ɛ.
20 Zĩbeezĩ sa Isaili kↄ̃naↄ na gbɛ̃́ pↄ́ lɛ̀lɛmápiↄ kpɛ lↄo.
Yakↄbu bui pↄ́ bↄ̀piↄ,
Dii an Lua Kuaadoade ↄ̃ aa nai ń sĩanao sa.
21 Yakↄbu bui kↄ̃naↄ ɛa su,
gbɛ̃́ kↄ̃napiↄ ɛa zɛ ń Lua Gbãadeo.
22 Isailiↄ, baa tó á gbɛ̃́ↄ dasi lán ísialɛ ũfãawa,
an kↄ̃naↄ mɛ́ aa ɛa su.* Lom 9.27
Pisaboa looaála kɛ́ yã́zɛde e kɛ zài yã́i.
23 Asa Dii Lua Zĩgↄ̃de mɛ́ a mↄ́
ń kaalɛ pↄ́ a dìlɛo á bùsuu píi.
24 A yã́i tò ma Dii Lua Zĩgↄ̃de ma mɛ̀:
Ma gbɛ̃́ pↄ́ kú Siↄnaↄ,
Asiliↄ á gbɛ̃ ń flão,
aa go'ↄ sɛ́ázi lá Egipiↄ kɛ̀wa,
ãma ásu vĩakɛnɛ́o.
25 Asa à gↄ̃̀ yↄↄ kɛ́ ma pↄ weewá,
mi gbasa pↄkũmabↄbↄmá mà ń dɛdɛ.
26 Dii Zĩgↄ̃de a fɛlɛmá ń flàalao,
lá à Madiãↄ gbɛ̃̀ Ɔlɛbu gbɛ saɛwa.
A a go poo ísiaa,
là a kɛ̀ Egipiↄnɛwa.
27 Zĩbeezĩ a ń aso go á gã̀u,
a ń zuu bↄɛ́ á nↄɛ à ɛ́'ɛ.
Asiliↄ mↄa lɛ́lɛi Yelusalɛũwa
28 Aa ku Ayata,
aa bↄ̀lɛ ń Migↄ̃nↄo,
aa ń asoↄ kàlɛ Mimasa.
29 Aa bↄ̀lɛ ń gbɛbↄlɛo,
aa bòokpà Gɛba,
Lamadeↄ lɛ́ lualua,
Gibɛa Saulu wɛ̃́lɛdeↄ lɛ́ bàalɛ.
30 Galiũdeↄ, à búbuapɛ!
Laisideↄ, à swã́kpa!
Waiyoo Anatodeↄ!
31 Mademɛnadeↄ lɛ́ tílɛ,
Gebiũdeↄ lɛ́ ulɛkĩi wɛɛlɛ.
32 Gↄↄ bee aa pila Nↄbu,
aa ń gã gbãɛ Yelusalɛũdeↄnɛ Siↄna gbɛ̀sĩsĩ musu.
33 Gwa! Dii Lua Zĩgↄ̃de
ali lɛsĩpiↄ zↄ̃,
ali zↄ̃ↄpiↄ nɛ́,
an gↄ̃naↄ kwɛ wìliũ.
34 A dào likpɛpi zↄ̃zↄ̃ ń mↄoo,
likpɛpi i kwɛ Lua Gbãade aɛ.