Bibeli Luayãtaalá Ezekiɛli 7

Isailiↄ midɛa kà kãi

1 Dii yã'òmɛɛ à mɛ̀: 2 Gbɛ̃nazĩn nɛ́, yã́ pↄ́ ma Dii Lua má ò Isaili bùsudeↄnɛn kɛ: Á kua lɛ́ kà! Á bùsu gola síiↄ̃ píi mìdɛ. 3 Á kua lɛ́ kà! Má pↄkũmabↄbↄwáɛ, mí yã́kpalɛkɛánↄ á yãkɛaↄwa, mí yãbɛ̃ɛ pↄ́ á kɛ̀ fĩaboɛ́ píi. 4 Má á wɛ̃nagwao. Má á kɛ̃o. Á yãkɛaↄ fĩa má boɛ́ ń yãbɛ̃ɛ pↄ́ á kɛ̀ↄ, íↄ dↄ̃ kɛ́ mámɛmaa Dii.

5 Ma Dii Lua ma mɛ̀ yã́ a á le!

Yãzↄ̃ↄ a á le!

6 Á kua lɛ́ kà! Á kua lɛ́ kà!

Yã́pi lɛ́ sↄ̃ázi, à pìlawá kↄ̀!

7 Yã́ zↄ̃̀lɛwáɛ,

á gbɛ̃́ pↄ́ á kú bùsuɛ beeuↄ.

Á gↄↄ kà kãi, à kà se!

Gili gɛ̃̀ńgu gbɛ̀sĩsĩↄ musu,

i kɛ pↄna wii aalɛ lɛ́o.

8 Tia kɛ́wa má pↄkũmabↄbↄwá,

mí palawá ń pↄfɛ̃o.

Má yã́kpalɛkɛánↄ á yãkɛaↄwa,

mí á yãbɛ̃ɛkɛaↄ fĩaboɛ́.

9 Má á wɛ̃nagwao, má á kɛ̃o.

Má fĩaboɛ́ á yãbɛ̃ɛkɛaↄwaɛ,

íↄ dↄ̃ ma Dii mámɛ ma á wɛtã̀.

10 À gↄↄpi gwa, à kà! Yã́ pìla!

À nↄsì yã́ gbãa ũ, ↄ̃ à nɛ'ì wala ũ.

11 Yãpãsĩ fɛ̀lɛ vãikɛnaↄ gbɛ̃go ũ.

An gbɛ̃e a bↄo! Bílapi gbɛ̃e a bↄo!

Ɔdee a bↄo! An bɛɛɛdee a bↄo!

12 A gↄↄ kà! À ń lé!

Pↄluna su pↄnakɛo,

pↄyiana su ↄ́ↄlↄo,

asa ma pↄ fɛ̃̀ bílapiziɛ.

13 Pↄyiana a pↄ́ pↄ́ á yìa si lↄo e a wɛ̃ni lɛ́u.

Ãnabikɛkɛa bílaɛpi a lɛ́lɛ pão,

gbɛ̃e a bↄo a tàae yã́i.

14 Wà kuupɛ̀, zĩ̀ sↄu mà píi,

kási gbɛ̃e a gɛ́ zĩlauo,

asa ma pↄ fɛ̃̀ bílapiziɛ.

15 Zĩ ku bĩ́i kpɛ,

gagyã ń nↄanao ku wɛ̃́lɛ guu.

Gbɛ̃́ pↄ́ aa ku sɛ̃uↄ gaga zĩ guuɛ,

gbɛ̃́ pↄ́ aa ku wɛ̃́lɛ guuↄ gaga

ń nↄanao ń gagyãoɛ.

16 An gbɛ̃́ pↄ́ aa bↄ̀ↄ

bàalɛ ta gbɛ̀sĩsĩↄ kĩ́i.

Aa ↄ́ↄlↄ lán swadↄↄ felenaↄwa

baade zĩa tàae yã́i.

17 Ampii an ↄ a gↄ̃ dↄńziɛ,

an kosokũↄ i busa.

18 Aai zwã̀nkasaↄ dↄ ń pi,

vĩa i ń kṹ.

An gɛɛ i gↄ̃ kpá ń wɛ́i,

aai migbaa lɛ́ ḿpii.

19 Aa ń ã́nusuↄ kↄ́lɛ zɛaↄ guu,

an vuaↄ i gↄ̃nɛ́ pↄ́ gbãlɛaↄ ũ.

An ã́nusuↄ ń ń vuaↄ a fↄ̃ ń bↄ Dii pↄfɛ̃gↄↄzĩo.

Ɔ̃api a ń nↄana kpálɛo,

an gbɛɛ kão,

asa ↄ̃mɛ ń dá duunau.

20 Aa ńzĩa sɛ̀ lɛsĩ

ń nↄamblebↄ kɛfɛnaↄ yã́i,

aa pↄbɛ̃ɛ pↄ́ má ye a gĩyãioↄ pìò.

A yã́i má tó à gↄ̃nɛ́ pↄ́ gbãlɛa ũ.

21 Má pↄ́piↄ na bui zĩ̀loↄnɛ ń ↄzĩ

aa ń pↄ́ sɛ́lɛɛ.

Má kpá dṹnia vãikɛnaↄwa,

aa ń pↄ́ naaaɛ, aai a gbãlɛ.

22 Má mikpɛlinɛ́ɛ,

aai ma gu bɛɛɛde gbãlɛ.

Kpã́i wɛliwɛpiↄ gɛ̃u, aai a gbãlɛ.

23 À mↄgalaↄ pí,

asa gbɛ̃dɛa di bùsuuɛ,

mɛ́ yã́ gbãa kↄ̃̀ wɛ̃́lɛu.

24 Má tó bui vãiↄ mↄ́ ń uaↄ símá,

má tó gbãadeↄ zĩasɛa lɛsĩ midɛ,

wi ń sa'okĩiↄ gbãlɛ.

25 Tó gili gɛ̃̀ńgu, aa aafia wɛɛlɛ,

kási aa eo.

26 Músi a kɛ músi,

bao ĩ́i a kɛ bao ĩ́i,

aai gbasa kpálɛkɛ ãnabikɛkɛai.

Sa'ona a fua ikoyãwa,

gbɛ̃zↄ̃ↄ a kua lɛdamawa.

27 Kí a búbuapɛ,

yã́ a di kíanɛwa,

táaaↄ ↄ a lualua.

Má kɛnɛ́ an yãkɛaↄwaɛ,

má yãdańla lá aa dà gbɛ̃́awaɛ,

aaiↄ dↄ̃ kɛ́ mámɛmaa Dii.