Bibeli Luayãtaalá 1 Lada 16

1 Wà sù ń Lua kpagoloo wa dìlɛ zwã̀akpɛ pↄ́ Davidi dↄ̀ɛ̀ guu. Ɔ̃ wà sa pↄ́ wì a pↄ́ kátɛu à tɛ́kũ ò Lua aɛ ń sáaukpasaↄ. 2 Kɛ́ Davidi sa'ò a làa, à báaadà gbɛ̃́ↄgu ń Dii tↄ́o. 3 Ɔ̃ à pɛ̃ɛ ń damina kàao ń vɛ̃ɛbɛ kàao bìilɛ Isaili pↄ́ kãaaa weↄnɛ ń miwa mɛ̀ndodo gↄ̃ɛↄ ń nↄɛↄ.

4 À Levii buieↄ dìlɛ aaↄ zĩkɛ Dii kpagolo aɛ, aaiↄ Dii Isailiↄ Lua tↄbↄ, aaiↄ aà sáaukpa, aaiↄ aà táasilɛ. 5 Asafa mɛ́ ń gbɛ̃zↄ̃ↄ ũ, Zakali mɛ́ aà plaade ũ, bee gbɛa Yaaziɛ, Semilamↄ, Yeiɛli, Matitia, Ɛliabu, Benaia, Ɔbɛdɛdↄũ ń Yeiɛlio. Aaliↄ domaↄ lɛ́ ń mↄↄnaↄ. Asafa sↄ̃ aliↄ sɛ̃́sɛ̃napa. 6 Sa'onaↄ Benaia ń Yaaziɛo mɛ́ aaliↄ kã̀aepɛ Luabaakuańnↄ kpagolo aɛ gↄↄpii.

Lua a gbɛ̃́ↄ suabaa

(Soũ 105.1-15)

7 Gↄↄ bee ↄ̃ Davidi Dii sáaukpazĩ dàalɛ, a nà Asafa ń a gbɛ̃́ↄnɛ ń ↄzĩ.

8 À Dii sáaukpa, í aà sísi,

à to bui píi aà yãkɛaↄ dↄ̃.

9 À lɛsi à aà táasilɛ,

í aà yãbↄnsaɛkɛaↄ galikɛ píi,

10 í ĩ́anadã ń aà tↄ́ pↄ́ a kua adoao.

Á Dii kĩ́i wɛ̀ɛlɛnaↄ à pↄnakɛ,

11 à gɛ Dii le à gbãa gbɛawà,

íↄ aà aɛya gↄↄpii.

12 À to yãbↄnsaɛ pↄ́ a kɛ̀ↄ dↄágu,

aà dabudabukɛaↄ ń yã́ pↄ́ a dìlɛↄ.

13 Á Dii zↄ̀blena Isaili buiↄ,

á Yakↄbu bui pↄ́ à á sɛ́piↄ,

14 Dii mɛ́ wá Lua ũ,

ↄ̃mɛ ì yãdilɛ gbɛ̃́piiɛ.

15 Aà bàakuawanↄ yã́ lí sãaaguo,

yã́ pↄ́ a òpi aↄ ku e wá buiwaɛ.

16 Aà bàa kú ń Ablahaũo,*

à ɛ̀a yã́ doũpi lɛgbɛ̃̀ Izaakiɛ lↄ.†

17 Aà bàa ɛ̀a kú ń Yakↄbuo iko ũ,

ↄ̃ a kú ń Isailiↄ e gↄↄpii.

18 À mɛ̀ á Kanaa bùsu kpámá,

aↄ dɛ pↄ́ pↄ́ aa sɛ kpaalɛ guu ũ.‡

19 Gↄↄ bee aa dasio, wìli ń yãdao,

aa ku Kanaa bùsuu bↄ̀mↄↄ ũɛ.

20 Aaìↄ liaaliaa bui ń buio guuɛ,

aaìↄ bɛbɛ bùsu ń bùsuo.

21 I we gbɛ̃e ń wɛtã̀o,

à kíaↄ lèle an yã́ musu à mɛ̀:

22 Aasu ↄkã gbɛ̃́ pↄ́ a ń sɛ́piↄwao,

aasu ĩada a ãnabipiↄwao.§

Dii mɛ́ kía zↄ̃ↄ ũ

(Soũ 96.1-13, 106.1, 47-48)

23 Dṹnia gbɛ̃́pii, à lɛsi Diiɛ.

Àↄ aà zĩblea baokpa lá gu lɛ́ dↄ.

24 À aà gawi yã'o buiↄnɛ,

à aà yãbↄnsaɛↄ galikɛ gbɛ̃́piiɛ.

25 Dii zↄ̃ↄ, à kà wà aà táasilɛ,

à kà wà vĩakɛɛ̀ dɛ diiↄla píi.

26 Buipãleↄ diiↄá pↄ́ gianaↄnɛ,

Dii mɛ́ musu kɛ̀.

27 A zↄ̃ↄkɛ ń bɛɛɛo vĩ,

gbãa ń pↄnao ku aà kĩ́iɛ.

28 À gawi ń gbãao dↄ̃ Diiɛ,

bùsu píi gbɛ̃́ↄ, à dↄ̃ Diiɛ.

29 À Dii tↄ́ gawi dↄ̃ɛ̀,

à mↄ aà aɛ, í aà gba pↄ́,

à kúlɛ Diiɛ ń lousisi'ulaↄ daa.

30 Zĩ́lɛdeↄ à tó á mɛ àↄ kukɛ aà aɛ.

À dṹnia kàlɛ gíũgiũ, a deea vĩo.

31 Musudeↄ, à pↄnakɛ,

zĩ́lɛdeↄ, à vĩ àↄ kɛ̃aa,

í o buiↄ guu Dii mɛ́ lɛ́ kible.

32 Ísia ń pↄ́ pↄ́ kúuↄ, à kↄ̃fĩkɛ,

sɛ̃̀a ń pↄ́ pↄ́ kúuↄ, à kúkuakɛ píi,

33 lí pↄ́ kú lákpɛuↄ i gulakɛ,

aai pↄnakɛ Dii aɛ,

asa àlɛ mↄ́ yã́kpalɛkɛi ń dṹniaoɛ.

34 À Dii sáaukpa, asa a maa,

aà gbɛ̃kɛ láaa vĩo.

35 À mɛ: Lua wá Suabana, wá suaba!

Wá bↄlɛ buiↄ guu, ní wá kãaa,

wí n tↄ́ kã́fĩ, asa a kua adoa,

wí ĩ́anadã ń n táasilɛao.

36 Wà Dii Isailiↄ Lua sáaukpa

za asĩnizĩ e gↄↄpii!

Ɔ̃ gbɛ̃́pii mɛ̀: Ãmi! Àleluya!

37 Davidi Asafa ń a gbɛ̃́ↄ dìlɛ Dii bàakuańnↄ kpagoloi, kɛ́ aaliↄ zĩkɛ a aɛ lá gu lɛ́ dↄ lá wa dìlɛwa. 38 À Ɔbɛdɛdↄũ ń a gbɛ̃́ gbɛ̃ↄn bàaↄ̃kwi plasaiↄ dìlɛ we lↄ. Yedutu nɛ́ Ɔbɛdɛdↄũpi ń Osao mɛ́ bↄlɛdↄ̃anaↄ ũ. 39 À sa'onkia Zadoki ń a gbɛ̃ sa'onaↄ dìlɛ Dii zwã̀akpɛ kĩ́i Gabaↄ̃ↄ gulɛsĩ pↄ́ wa bòu, 40 kɛ́ aaliↄ sa pↄ́ wì a pↄ́ kátɛu à tɛ́kũ o Dii gbagbakĩiwa kↄↄ ń oosio, lá a ku Dii ikoyã pↄ́ a dìlɛ Isailiↄnɛ lá guuwa. 41 Emani ń Yedutuo kúńnↄ we ń gbɛ̃́ kĩni pↄ́ wà ń tↄ́ sì wà ń sɛ́ↄ, kɛ́ aaↄ Dii sáaukpa, asa aà gbɛ̃kɛ láaa vĩo. 42 Kã̀aeↄ ń sɛ̃́sɛ̃naↄ ń pↄ́'ↄbↄn pãleↄ dɛ Emani ń Yedutupio yã́ ũɛ, kɛ́ wàli lɛsiò Luaɛ. Yedutupi nɛgↄ̃ɛↄ mɛ́ bↄlɛdↄ̃anaↄ ũ. 43 Kɛ́ baade tà a bɛ, ↄ̃ Davidi ɛ̀a tà à samaa'ò a uadeↄnɛ.

*16:16 Daa 12.7, 17.8

†16:16 Daa 26.3

‡16:18 Daa 28.13

§16:22 Daa 20.3-7