Ⅰ Gʊrsɩra ba Sardɩ kristagʊɔɔ sokʊma malɛɛka bɩ ma ncɩnaaʊ:

Gʊaa k'a nɩ Woso ɛspri saanhɩnarɔ m kan monyaa saanhɩnarɔ kɩ bɩ nɩ meer naa do barɛ: Mɔɔ ɩbɩɩ zibəəro dɔ, ŋ y'a lɛ bɔrɛ ɩbɩɩ ʊ ŋ ʊ, ɩ mɩsɩr, bala gər n'ɩ mɩ. Ⅱ Ɩ tɔ ʊ, ɩ b'a ka an gɔɔta an n'a ŋʊam k'a ga bɩ n a nyambʊr y, a mɩm bɔ ʊ. Bala, mɔɔ yɩ, ɩbɩɩ zibəə bɩ mɩŋŋabaa bɩ gʊta mɔɔ Woso mɩm ʊ y. Ⅲ Hɔ k'ɩbɩɩ yɩ, ɩ ma sɔ bɩ tɔ da ɩ nɔ ʊ. Nyasʊ m k'ɩ ɩ bɔ ɩ taam. K'ɩbɩɩ n dundo ɩ zi, mɔɔ zɛrɛ am koor hɔ bɩ m. B'ɩbɩɩ bɩ wakatɩ kʊ mɔɔ n nɩ zɛm bɩ daata zɛ ɩbɩɩ ra bɩ dɔrɛ y. Ⅳ Bɩ kan bɩ kɩ, ɩbɩɩ gʊɔɔ gɔsɩnnɔ ɩ Sardɩ ʊ, ŋ n dintim ka a huuro ma y. Ŋ zum kʊ ʊ kan mɔɔ kɩ, huu furo n a ma, bala, ŋ y'a ga m. Ⅴ Damazaa bɩ, huu fu dure a ma ncɩnaaʊ, mɔɔ b'a tɔ bɔm mɩsɩrbaa ci b'ʊ y. Mɔɔ y'a kasɛtɩ kam m Zɩ kan a malɛɛkarɔ kɩ taa, mɔɔ ʊ, mɔɔ gʊaa m.

Ⅵ Gʊaa k'a lɛ n taa, k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.

Ⅶ Gʊrsɩra ba Filadɛlfii kristagʊɔɔ sokʊma malɛɛka bɩ ma ncɩnaaʊ:

Gʊaa mɩŋŋa, sɩrazaa bɩ, k'a nɩ Davɩd cɛlɛnyɩ m, an a gʊm bɩ gɔsɩ b'a dam ma a n a ta y, an n'a tam bɩ gɔsɩ b'a dam ma an a gʊ y bɩ nɩ meer barɛ, a ʊ: Ⅷ Mɔɔ ɩbɩɩ zibəəro dɔ: Ba n nɩ, mɔɔ cɛlɛ gʊ, ɩ lɛɛ, bɩ gɔsɩ b'a dam ma an a ta y. Ɩbɩɩ paŋŋa bɩ bɩ gʊta y, bɩ kan bɩ kɩ, ɩbɩɩ gɔɔta ɩ zu mɔɔ lemim ʊ, ɩbɩɩ n bɩsɩ ka mɔɔ tɔ ma y. Ⅸ Sʊtaana sokʊmacɛ gʊɔɔ kʊ ŋ ʊ, zɩɩfʊrɔ n'a mɩ rɔ wɔɔ, ŋʊaar ŋn'a barɛ, zɩɩfʊrɔ bɛɛ n ŋ mɩ y. Mɔɔ y'a karɛ, ŋnɩ bʊr, ŋnɩ bɩ kukurə zɛ ɩbɩɩ taa, bɩ ŋn'a dɔm ma ŋ ʊ, mɔɔ ɩbɩɩ ŋʊa. Ⅹ Bala, ɩbɩɩ ɩ zum mɔɔ lemim ʊ kan tʊntɔʊrɛ kɩ, mɔɔ dɔrɛ ɩbɩɩ ma sɔ fɩryɩrɛ k'a nɩ zɛm bɩ bʊr durnya jilli nɔ ʊ k'a bɩ durnyazannɔ makra ba bɩ dɔmɩm ʊ. Ⅺ Mɔɔ zɛm zɔɔ, nyasʊ hɔ k'ɩbɩɩ ta m bɩ m kɔɔkɔɔ, kʊ gɔsɩ b'ɩbɩɩ firgə bɩ yɔ ɩ nɩ y. Ⅻ Damazaa bɩ, mɔɔ y'a bam mɔɔ Zɩ Wosocɛ bɩ sagɔ, a bɩ bɔm dɔ fɩɩga y. Bɩ mɔɔ yɩ m Woso tɔ gʊrsɩra bam ma, kan mɔɔ Woso kʊ tɔ kɩ, Zerizalɛm daa k'a a to brama mɔɔ Woso zi an nɩ zerm bɩ kɩ, kan mɔɔ tɔ daa bɩ kɩ.

ⅩⅢ Gʊaa k'a lɛ n taa, k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.

ⅩⅣ Gʊrsɩra ba Lawodisee kristagʊɔɔ sokʊma malɛɛka bɩ ma ncɩnaaʊ:

Ba hɔ kʊ Amina, kasɛtɩzaa paan…, sɩrazaa, an a zɛ kʊ ra kan Woso kɩ hɔ haay darɛ sɩŋŋɩda ʊ bɩ n'a hɩm na: ⅩⅤ Mɔɔ ɩbɩɩ zibəəro dɔ. Ɩbɩɩ bɩ nyɔɔrɛ, b'ɩbɩɩ bɩ kaarɛ y. A ŋʊa mɔɔ ʊ k'ɩbɩɩ n bɩr nyɔɔrɛ gɛɛ kaarɛ. ⅩⅥ Bɩ k'ɩbɩɩ n zaarɔɔ, ɩbɩɩ bɩ nyɔɔrɛ, b'ɩbɩɩ bɩ kaarɛ bɩ, mɔɔ y'ɩbɩɩ bɔrɛ m lɛ. ⅩⅦ Bala, ɩbɩɩ y'a hɩrɛ, ɩ ʊ: Hɔnyɩzaa n'ɩ mɩ, mɔɔ m ba hɔnyɩzaa, mɔɔ bɩr m kam hɔsɩ ma dɔ y, bɩ k'ɩbɩɩ n a dɔ ɩ ʊ, ɩ ɩ fɩr nɔ ʊ, cicir nɔ ʊ, ɩ m ŋʊazaa, ɩ m bʊʊ, ɩ m dɩgɩ bɩ. ⅩⅧ Ɩbɩɩ dʊndɔ mɔɔ nawʊm k'ɩ sarma kʊ ŋ y'a sʊr bɩ si mɔɔ zi k'ɩ ba hɔnyɩzaa, k'ɩ huuro furo si, k'ɩ du ɩ ma, k'ɩ nyannɩ nyaakʊm da m. Ɩ hɔ si ɩ tɔ ɩ mɩm la k'ɩ ɩ da ma ɩ lɛɛ yɩ. ⅩⅨ Gʊɔɔ haay kʊ mɔɔ ŋʊa rɔ wɔɔ, mɔɔ nɩ ŋ bɔm zaa ʊ, m nɩ ŋ hʊnhʊrm. Ncɩnaaʊ bɩ, ɩ tɔ ʊ, k'ɩ ɩ bɔ ɩ taam! ⅩⅩ Ba mɔɔ jɩm cɛlɛ ma, m n'a zɛm na. Kʊ gʊaa mɔɔ leer ma, an cɛ bɩ lɛ gʊ, mɔɔ gasʊm zi. M hɔ bɩ kan kɩ, an a bɩ kan mɔɔ kɩ. ⅩⅪ Damazaa bɩ, mɔɔ y'a karɛ, an nyɩnta kan mɔɔ kɩ, m cirbəəduu ra, amba mɔɔ m da ma sɔ, m ta m aa nyɩnta kan m Zɩ kɩ a cirbəəduu ra bɩ m.

ⅩⅫ Gʊaa k'a lɛ n taa, k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.