1 Abaraqaammafa maru aukuanna aandaroo firaafa narufanoo Abaraqaammafa Isipa maqa maaqai ooqu finau. Kafaa mina amaaku Isakeefa maru aukuanna aandaroo narufanoo Isakeefa Keeraa maqusai Abimeereekana maqusai finau. Abimeereekafa Firistia maqannaasa uriqararafa Keeraa maqusai marunnai finau. 2 Isakeefa Keeraa maqusai oonu marufanoo Karaambaiqa maaqi qimasee qimaminoo qinau. Anee sia Isipa maqa maaqai ooqu fua. Maaqoo qinee aniara mariannee qunnaqoo kai maria. 3 Maaqoo kai marinaqa qinee ani faqa marida amiqi amiqida dadaaqianaura. Maa maqa maaqana faqa anisaa ani aruakinausa faqa nimianaura. Qinee minara Abaraqaammana ufa qima afeekaika masee amianauroo qiafannana doo ani faqa qima afeekaikiqa amianauranoo. 4 Qinee anisaa ani aruaki kambiqainausa fasaura foora moomoo amianaura. Qinee maa maqa maaqana misa nimianaura. Aiqama maqannaasa aniree maaqi qimasee innaaru qifaranoo. Oo Anutu anee Isakeena aiku asauku amiqi amiqimma nimaqoonandee inana maasa faqa amiqi amiqimma qimaqaa. 5 Abaraqaammafa ani akoofa qini sandufa faqa aamuaqira ufa faqa afaqee marunara qinee ani amiqi amiqimma amaqaanaura. 6 Isakeefa Anutuna mi ufana iriseenoo eedoo qimaseenoo Keeraa maqusai maridanoo Isipa maqa maaqai sia ooqu finau.

7 Keeraa maqannaa fasiqauqa mina aanaaqara iramirufanoo Isakeefa qini qisooki fee qinau. Isakeefa narí anaaqa Reebeekaa nammarifa oori amiqirafa marufanoo qini darusee qini qinaaqa mareefoo qimaseenoo rufia mareenoo qini qisooki fee qinau.

8 Isakeefa kaqi kaaqoo marinoo moo kari narí anaaqa Reebeeka nammarina faqa madaanai ooqu faaqee narisaa narisaa mundiqa marufanoo mi maqannaasa uriqararafa narí maaqaki ooqufaaqee maridanoo qafanau. 9 Qafamaseenoo Abimeereekafa Isakeena aaramaseenoo qinau. Maa anaaseefa ani anaaqa uqanna maridanoo. Anee nanaree qini qisooki fee qinanee. Isakeefa qinau. Qini qinaaqa fee qianaqa darifoora miqi qiqa.

10 Abimeereekafa iriseenoo qinau. Anee maasa naqaa fee maqimaqeenee. Qini maqannaa moo fannoo ani anaaqa sakasee faiqaifana anee mi ummaarana maasa qimianaiqini.

11 Miqi qimaseenoo narí maqannaasa aiqama naarama quqaseenoo maaqi qimasee qima niminau. Yafee maa fasiqanee mina aanaaqee mandaikamma nimaqaifaqa qinee kuqa kai mina aruanauranoo.

12 Mi aukuannai Isakeefa narana ummaqusoofanoo kambiqafufanoo amiqimmasee anoona mafufanoo unakira aukuana moomoo uqanna unakinau. Karaambaiqa amiqi amiqimma amaqasee dadaaqunara miqinau. 13 Karaambaiqa dadaaqufanoo mina ainaina rairaaufanoo kaaqa ainaina faqaafa marinau. 14 Mifa moomoo sipsipa faqa burimakau faqa ainainira faiqiuqa faqa marunara Firistia maqannaasa niranaqee marinau. 15 Ooqai Abaraqammafa kaqi maridanoo indufuqoo nammari dikaandausa Firistia maqannaasa aiqama rafaaqa fiqau.

16 Moo kari Abimeereekafa Isakeena aiqama ainaina tia qafamaseenoo rufia seenoo qimaminau. Doo anee maasa uridaaqarana mariananoo. Anee maasa maqa maaqa quqasee moosaa fua. 17 Isakeefa mi ufana iriseenoo mi maqa maaqana minniseenoo narí uiqaana maaqa Keeraa noopunduki usakasee miqoo kisaaqasaa marinau.

18 Miqoo ooqu Isakeefa narí akoona nammari madikauqa Firistia maqannaa rafaaqa fuqoona paqurimmaseenoo kafaa indufuseenoo narí akoofa auquroo auquna kai kaifaa auquranau.

19 Isakeena ainaini maru fasiqausa mi arumunaki fuka madika indufiufaqa nammari paquriqau. 20 Paquri masoofaqa Keeraa maqannaa sipsipasaa rakisi marusa mi nammarina qafamasee Isakeena sipsipa rakisirausa faqa rakirarida qiqau. Maa nammarifa maasaindi maridanoo. Miqi qufanoo Isakeefa mi nammari madikana auqu Tinoorira nammari madikee qinau. 21 Miqi qimasoofaqa mina ainainira fasiqa namu kafaa moo indufiqau. Keeraa maqannaasa minara faqa miqi kai iqau. Isakeefa mina iriseenoo minara faqa niranaqara nammari fee kai qinau. 22 Miqi qimaseenoo kafaa quqasee moosaa oonureenoo miqi kai minoo moo nammari madika indufinau. Miqoo minara sia tinoo taanoo rirafa marufanoo mi nammari madikana auqureenoo nifaaqa quqasee mana manira nammari madikee qinau. Maqee Karaambaiqa fannoo mana manirana maasa qimifaqa maridaqa maaqoo aiqama ainaina masaananoo rairaaiannoo.

23 Doo miqoo mariufanoo miqoo minni seenoo Beeraseeba maqa maaqai finau. 24 Miqoo marufanoo moo eendaki akooqoo Karaambaiqa maaqi qimasee qimaminau. Qinee ani akoona Abaraqaammana Anutusa maridaqa. Sia anee rufia rufiaqia. Qinee ani faqa nidaqa. Qeeqa ainainira fasiqa Abaraqaammana faqa qima afeekaikiafannanara iriseeqa ani amiqi amiqi ianaura anisaa ani aruakinausa moomoo kambiqeefaranoo.

25 Isakeefa Karaambaiqa mi ufana iriseenoo ooninnai qainda auquseenoo Karaambaiqa aandau tatufirana minasaa suqa amiseenoo innaaru qinau. Miqoo Isakeeefa narí uiqaana maqa burimakau apatannoo usakaseenoo marinau. Minaki maridanoo narí ainainira fasiqauqa niiqoofaqa moo nammari madika indufiqau.

26 Abimeereekafa Keeraa maqa maaqaindari Ausafatana narí irirana amimaru fasiqana faqa narí sundiauqa uriqararana Pikoorana faqa Isakeena qafararee qimasee Beeraseeba maqusai aniqau.

27 Aniroofanoo Isakeefa iramirinoo qinau. Naqi fee qifaqee qiniara nikooqoofaqa diiqamasoosa marunnannai kafaa anidanee. 28 Miqi qufanoo Abimeereekafa faqa mina faqa anusa qiqau. Karaambaiqa ani faqa marinara maqee maasa iridaqa. Ani faqa maasa faqa qambaana kuqaa qima afeekaikirafa marianifeera iridaqa. 29 Maasa aniara qima afeekaikammasee sia maasa mandaikamma qimaqaannee qidaqa. Maasa sia ani mandaikamma amaqaafannandee inana maasa faqa sia mandaikamma qimaqaa. Maasa ani amiqi amiqimma aisaafanana anee asooaranaki finau. Maqee akooqoo uqanna Karaambaiqa fannoo ani amiqi amiqimma amaqaidanoo.

30 Miqi qimasoofanoo Isakeefa qoomaqa deedaqinau. Deedaqammasoofaqa misa narana namaseeqa faiqaqau. 31 Kananaana findi fufaqa narí qimami narí qimamimma afeekaikamasee firaa ufannai qima afeekaikamma rafaaqafiqau. Miqimmaseenoo Isakeefa nimandara ufa qimasoofaqa aqoondi kammasee quqasee fiqau. 32 Doo mi faasaanna Isakeena ainainira fasiqa namu nammari madika indufu qoonaki nammari paqurimmasee Isakeena qimamiqa qiqau. Doo maasa nammari paquriqa. 33 Miqi qimasee qimamufanoo Isakeefa mi nammari madikanara qima afeekaikira madikee qinau. Miqi qimaseenoo nári ufakiqari Beeraseeba maqusa fee qimasee auqu ranau.

34 Isakeena faiqi indaaruqaafa mina auqu Eesaufa marinau. Mifa qaara fasiqa aiku asauku taikasee 40 aukuana maraseenoo Qeetaa maqannaa aanaaseeqara maranau. Moo anaasee auqu Yuditi nammarina Beerina araamuna maranau. Moo anaasee auqu Baseemata nammarina Eeroona aramuna maranau. 35 Miqanda nári ninaakuquqara Isakeesa Reebeeka nammarisa sukaqara oosana nimufaqa nikooqanau.