1 Yakooboofa qafoofanoo Eesaufa 400 fasiqa faqa aninau. Yakooboofa mina qafamaseenoo narí faiqi namu rainasee Reeaa nammarina faqa Raseera nammarina faqa ainainira anaasee qaaraqanda faqa niminau. 2 Nimiseenoo indaaru narí ainainira anaasee qara faqa nári faiqi namu faqa niiqoofaqa fiqau. Misa ninaaqianna Reeaa nammarifa narí faiqi namu faqa finau. Inaaqianna uqanna Raseera nammarifa narí faiqi Yooseefaana faqa finau. 3 Yakooboofa misa noorinni indaaru finau. Oonu reenoo dinni taikasee dinni oonu qaara marasee kari maqasaa mapaminoo fifiufanoo narí afasaafa maruqoo oonuranau.

4 Eesaufa Yakooboona oori qafamaseenoo sandamammareenoo ani kaqaramma qumaraseenoo amooqananau. Miqanda aiqama qara qiki raqaqau. 5 Qiki raqaseenoo Eesaufa quanda fufanoo Yakooboona faiqi anaasee nindafamaseenoo qinau. Maa ani faqa aniasa yausee maridee. Qufanoo Yakooboofa qinau. Oo uriqararafa maa faiqi anaaseesannoo Anutufa qini amiqi amiqimma qimaqeenoo.

6 Miqi qimarufanoo Yakooboona ainainira aanaaseeqara nári faiqi namu faqa Eesauna oorisaa ani ninuka tuqu naumoo amisee reendeeniqau. 7 Miqanda ninaaqianna Reeaa nammarifa narí faiqi namu faqa anireenoo miqinau. Mina aanaaqianna uqanna Raseera nammarifa narí faiqi Yooseefaana faqa anireenoo miqikai inau. 8 Miqima soofanoo Eesaufa Yakooboona maaqi qimasee qimaminau. Faasai qafaunna aandausa oosana naqaa fee inoo maridano fee qufanoo Yakooboofa qinau. Ani aqoondikiraree qimasee kaqi ani amidaqa.

9 Miqi qufanoo Eesaufa narí qimaminoo qinau. Qinindi moomoo maridanoo aneenaindi aneenna kai maraa.

10 Miqi qufanoo Yakooboofa qinau. Qinee ani aqoondikiqa amunna ainainausa kaqi maraa. Anee qini kaaqa aqoondi kiannanara qinee ani oori Anutuna ooriara foora qafaidaqa. 11 Qinee ani amiraree qimasee maree anunna ainainausa maraa. Anutufa qini amiqi amiqimma qiseenoo qini didimari aiqama ainainausa qiminoo. Yakooboofa maraanifeera afeekaiki marufanoo Eesaufa maranau.

12 Eesaufa Yakooboona qimaminau. Doo uqeeraina anindiri fua qinee ani oorinni fuanana anee qini qinaaqianna ania.

13 Qufanoo Yakooboofa qinau. Oo qini uriqararafa anee iria, qini faiqi namu ummooqukiqa mariafaqa qinee sipsipa faqa misa aanaaqiuqara faqa iridaqa. Misa moodaa faasaana rarisaqa fimarianaqa aiqama aandauqa kuqifaranoo. 14 Anee indaaru finaqa qinee ani afaqee kasooaqee qeeqa aandauqa faqa faiqi namu faqa fifiinaqa Eedoomma maqa maaqaki ani paqurianauranoo.

15 Miqi qufanoo Eesaufa qinau. Doo amana qini faiqi namu akaqausa ani dadaaqi fifaranoo. Qufanoo Yakooboofa qaoo qinoo qinau. Qinee ani aqoondikunnanara minara kai firaa ainainee qidaqa. Doo amana qeeqa kai fuanauranoo.

16 Eesaufa mi ufana iriseenoo doo mi faasaanna kai anirandee narí maqa maaqai Eedoomma maqa maaqai finau. 17 Miqufanoo Yakooboofa Sukoota maqa maaqai oonureenoo narí maaqa faqa narí aandau auqaana faqa usakanau. Minara mi maqusana auqureenoo Sukoota fee qinau.

18 Yakooboofa Meesoopootamia maqa maaqaindari oonurandee amiqimmaseenoo Kannaana maqa maaqai Seekeemma maqusaki anireenoo narí uiqaana maqa mi maqusana adeedi usakanau. 19 Usakaseenoo Yakooboofa mi maqana Amoorana Seekeemana akoona aiku asauku unnai wan handareeta 100 siruaa munnimmannoo feefaurinau. 20 Feefauru maseenoo tatufirana suqara qainda auquseenoo mi kaqikaa maqusana auqureenoo Eeraa fee qinau. Mi auquna oosana Isaraee maqannaasa Anutu fee qinau.