1 Isakeefa minara iriseenoo Yakooboona aaramaseenoo amandaidanoo qinau. Oo Yakooboo sia uqanna Kannaana maqannaa anaasee maraa. 2 Doo findi finana ooru fua. Aneenna aanaakuna Beetueerana maqa maaqa Meesoopootamia maqa maaqaki ooruree aneenna anauna Rabannana araamuna maraa. 3 Aiqama afeeka faqaa Anutufa ani faqa ani anaaqa faqa amiqi amiqimma nimaqaseenoo moomoo faiqi nimisainana anee moomoo maqannaasa nikoofa marinnara. 4 Anutufa Abaraqaammana amiqi amiqimma amaqoondee inoo ani faqa amiqi amiqimma aisainana anee aneenna marianna maqa maaqana Anutufa Abaraqaamana amiqoonakinaa qumiasana maraa. 5 Miqi qimaseenoo Isakeefa Yakooboona aiqoofanoo findifinoo Meesoopootamia maqa maaqai Rabanafa Beetueerana amaaku Arameea maqannaafa Reebeekaa nammarina asookifa marunnai oorufinau. Rebeekaa nammarifa Yakooboosa Eesausa ninoofa marinau.

6 Isakeefa Yakooboona afaaqooqa amiseenoo Meesoopootamia maqa maaqai anaasee maraanifeera aqiqoonara Eesaufa irinau. Isakeefa afaaqooqa Yakooboona amiseenoo Kannaana maqanna anaasee sia maraannee qunara faqa irinau. 7 Yakooboofa narí anaukoo ufa irisee Meesoopootamia maqa maaqai funara faqa Eesaufa irinau. 8 Isakeefa Kannaana maqannaa aanaaseera akooqee marunara Eesaufa irinau. 9 Iriseenoo Isamaeerafa Abaraqaammana amaaku marunnai oonuree mina araamuna auqu Maqarata nammarina maranau. Maqarata nammarina asookifa Neebaiootafa marinau.

10 Kaifa Yakooboofa Beeraseeba maqusaindari Qaraana maqusai firaree qimasee faiqanoo ooru fimarinau. 11 Fimarufanoo eendufanoo moosaa uiqaana araseenoo faiqanau. Faiqararinoo ooni firaana marasee qunu rumasee miqoo faiqanau. 12 Faiqaqee idanoo qaina moo inau. Aana kisaaqa maqasaaqari innaarunai ooru marufanoo angiroouqa mimau ooruree qumuree imariqau. 13 Karaambaiqa Yakooboona aakaarinni kikiqinoo maridanoo maaqi qimasee qimaminau. Qinee Karaambaiqa maridaqa, ani aanaakuna Abaraqaamana Anutusa maridaqa, ani akoona Isakeena faqa Anutusa maridaqa. Qinee maa maqa maaqana anee faiqaannana ani faqa ani aiku asauku faqa nimianaura. 14 Ani aiku asauku anisaa ani aruakinausa faqa nukudara foora maa maqanasaa marifaranoo. Misa miqooqari kambiqamaree suani oosana qaannai finanoo aramareenoo keeqee mari qaannai finanoo dinni dinni ataaqeenni finanoo miqi mambi amana kai marifaranoo. Ani faqa ani aiku asaukuaroo qiqa aiqama maqannaasa amiqimma nimaqaanaura. 15 Karaambaiqa kafaa qimaminoo qinau. Iria, qinee ani faqa maridaqa aiqamai finnannai anisaa rakisianaura. Rakisidaqa kaifaa ani mareeqee maa maqanasaa quqaanaura. Qinee sia ani minnisaanaura, qinee qeeqa qima afeekaikiafanna ufafa anoona kambiqainaqa quqaanaura.

16 Miqi qimsoofanoo Yakooboofa tautinoo findifinoo qinau. Karaambaiqa maaqoo maridanoo. Mifa maaqoo marinara qinee sia iridaqa. 17 Yakooboofa Anutuna ufa iriseenoo rufia rufia idanoo qinau. Maa maqa maaqafa daaquqara maqa maqaa maridanoo. Abee Anutuna maaqa mariannoo innaarunai fimaria kooqifa uqanna mariannoo.

18 Kananaana Yakooboofa findifinoo narí ooni qunu qumareenoo daaqoo auqaanifee qimasee maqasaa rakiqaseenoo Anutunaindi fee qimasee oorifa fadameena akuamaqanau. 19 Akuamaqaseenoo mi maqanara Beeteera fee qinau. (Mi auquna oosana Anutuna maaqa fee qinau.) Ooqai miqoora misa Rusa maqusa fee qimariqau.

20-21 Yakooboofa mi maqana auqu ramaseenoo Karaambaiqara qima afeekaikinoo qinau. Qinee fimarianana anee qini faqa marida qinisaa rakisidana narana faqa qamunna faqa qiminaqa qinee amiqimmaseeqa qeeqa qikoona maaqai qumu raanana anee qini Anutufa marinnaranoo. 22 Maa daaqoo auqara oonina rakiqaunnana ani naaru amooqi fandinnaqoo mariannoo. Anee aiqama ainaina qiminaqa qinee qisaukuqarakinaana aninna amianaura.