7
1 Sapaamɔ, a fant mantik paaka.
A taa na fan nan taasaat halii.
A pana fan nan tanbinyinyira nba ki gbanjabirɔ tuu jab
ki li fan biaŋinba nae.
2 A wurik tee nan bobir nba yɔɔ gbee nan damanin na,
ki jekpekir be leŋ, ki tipuuk lintira.
3 A biaa na naan nan pajaat nba nae,
ki bia naan nan kɔi banlee-e na.
4 A turu na tee nan baa tuu jii loobnyana ki maa difoouk nae.
A ninbina na tee nan nyuntona nba be Hesbonn doo ni,
ki kpia digbangbeŋir maŋ tammɔkɔɔkir nae.
A miana na mɔk ninbarisin,
ki fan nan Lebanonn difoouk nba tor Damaskus po na.
5 A yur goone nan Kamel kunkonn na.
A yupiankar nyiriie nan chinchennyinyir na,
ki li fant saa fit kɔɔn kpanbar niɔŋ.
6 A mɔk fant, ki ŋan bonchiann, ki gbee nan lomm.
7 Ki a gbanant ŋan ki tee nan kpinkparik na,
ki a biaa na fan nan kpinkpamɔna na.
8 N saa do kpinkparike, ki pɔɔr li lɔɔna.
Min yaa boor, a biaa na tee nan daan tilɔɔnsɔkita nae,
ki a foon nubiru man nan saana na.
9 Ki a mɔb tee nan damanin na.
Poo lomm yaŋ
A ji te ki daan na n saan n yɔɔk boor sinsonn,
kii gaar u mɔgbana nan nyana paak.
10 N yɔɔke yenin ki nianin.
11 N yɔɔk, baat, ki tin nyi doo kpiŋ,
ki saa dɔɔr digbanbis na ni nyiɔk na.
12 Ti tan saa dɔŋ fiire ki got daan tilontii na,
ki laan bi piin kpaatuwa-a? ki got laan tipuuk na pɔbitiri-i?
ki bia laan tilontlia na mɔk puuku-u?
Leŋe ki n saa tura n lomm.
13 Ki a saa gbat manfoor tiik na nubiru,
nan tilɔɔna nba kur nubiru man ki li kpia ti tammɔb na.
N yɔɔk, n bir bonmankpera nan bonmanpaana, ki guuna.