141
Daajoouk Yenmiaru
1 Yennu, n yia; sommitin mɔtana.
Mi-i yiina yoo nba, fan gbiint ki turin.
2 Gaat n miaru ki lii tee nan bonnunubit na,
ki maa donn n nii nba na-ii tee nan daajoouk maruŋ na.
3 Yennu, ii dia n mɔb, kii guu n mɔmaan.
4 Ii guun ki n daa loon biit tumu,
koo ki n daa tokii biit damm ki tuun biiti.
Ŋaant ki n daa ban pukii bi jaamm dinu ni.
5 Niŋanɔ saa fit dat n tubir, ki jii ŋant ki ŋmakitin;
ŋaan n ki loon biit damm baakir,
kimaan yoo kur n mei ki biir bi toonbiit nae.
6 Bi-i lu bi diateeb na ki bi nyii jɔyirin ki baa yoo nba,
niib na saa bann nan n maan na tee barmɔniie.
7 Bi kpaba sii dɔɔ kaauk boore buri buri
nan baa tuu yakit daauk ki butɔ buri buri biaŋinba na.
8 Ŋaan n yada be fin Yabint Yennu nie yoo kur,
n loon a guurue; a daa te ki n kpenni.
9 Nyintin barit nba ki bi pii guuntin na ni,
biit damm barit maŋ ni.
10 Ŋaant biit damm na n baa bi barit nba ki bi bar na ni,
ŋaan ki min daa laat siara daŋi.