132
Dontir nba jiin jiantu ŋasaakak na po
1 Yennu, a daa tammit Defid
nan fara nba kur ki u dii na po.
2 Yennu, tiat mɔsonn nba ki u din senn ki por mɔpor,
ki tur fin yabint daanɔ, Jakɔb Yennu na a:
3 “N kan kun ŋaak ni, koo ki dɔɔr n dɔɔnu paaki;
4 n kan foi koo ki gɔɔni,
5 halii nan maa tan saa maa ŋaak ki tur Yennu,
ki li sii tee Yabint daanɔ, Jakɔb Yennu maŋ yar.”
6 Betlehem doo nie ki ti gbat Yennu mɔlor lakir na po,
ki tan lar Jearim kpaab ni;
7 ki ti yet a, “Ŋaant ki tin saan Yennu ŋasaakak ni;
ŋaant ti jiantɔ, u naangbouŋ boor.”
8 Yennu, a tɔk nan mɔlor lakir nba tee a yiikoo nyinn na
ki baar a ŋasaakak ni, kii be leŋ yoo kur.
9 Ŋaant ki a mannteeb-ii tuun linba took yoo kur;
ŋaant ki a niib-ii hoot nan kpinkpammuk.
10 Yennu, a din senn mɔsonn ki tur a toontunnɔ Defid;
a daa yêen a kpanbar gannkar maŋ na.
11 A din senn mɔsonjaanne ki tur Defid,
mɔsonn nba ki a kan ban nyik a:
“N saa dinn a bonjai na yenɔ naan,
ki u tan saa set a seenu ni ki dia a niib yoo nba ki a kaa.
12 Li-i tee ki a bonjai na dia mɔlor
nan sennii nba ki n turib na fanu,
bi waas saa tukin kii di naan na yoo kur.”
13 Yennu-e gann Sayɔnn doo; u loon wun teenir u ŋaake,
14 ki yet a: “Nna nae ki n sii yɔɔ be,
nna nae ki n loon mii kaar n naangbouŋ paak.
15 N saa sat piisin Sayɔnn doo paak, ki turɔ linba kur ki u loon;
n saa gboon u nandamm nan jeet.
16 N saa teen piisin u mannteeb paak
linba kur ki bi tuun ni, ki u niib sii yiin yanii ki hoot.
17 Nna nae ki n saa dinn Defid yaaboona na yenɔ naan
ki teenɔ kpanbarjaann;
nna nae ki n saa te ki n kpanbargaŋir naan na-ii tun kii be.
18 N saa dinn u datai fei,
ŋaan te ki u naangbouŋ na-ii mɔkitir kii kpaatir.”