44
Yenmiaru nba saa gɔɔr bonbiir
1 Yennu, ti gbat nan ti tubawa,
ti yeejamm betit faa din tun linba ki turib sianyoo nawa.
2 A din ber nyinn binba ki jiantira na bi tiŋ ni,
ki dat bi tuba,
ŋaan kaan a niib leŋ, ki te ki bi mɔkit.
3 Li din ki tee a niib na jatiat paak kaa
ki bi kɔn ki nyann tiŋ na,
bi din ki nyann nan bi mɔŋ paŋ kaa,
li din tee a yiikoo nan a paŋ nie,
nan a mɔŋ benu paak, ki li wann nan a loomm.
4 Fine tee n kpanbar, ki bia tee n Yennu,
ki teen timm Israel teeb nyannu.
5 Fine turit a paŋ ki ti nyann ti datai.
6 N dindann ki be n tɔrbann ni kaa,
n jatiat kan fit te ki man nyann,
7 ŋaan fine te ki ti nyann ti datai,
ki te binba ki loon ti maan na dii fei.
8 Ti sii tun dontir a sanne daar kur,
kii bia kii teena niipoouk nan yoo nba kaa paak.
9 Ki mɔtana a ji nyikita, ki te ki ti datai nyannit,
a ji ki somm nan ti kunkɔnkɔnna na,
10 ki te ki ti chiar ŋaan nyik ti datai, ki bi jii ti mɔkint.
11 Ki a te ki bi kpiit nan pei na,
ki te ki ti yat kɔɔ digbangana.
12 Ki a kɔi a niib daabauŋ,
ki li tee nan bi nyɔɔt ki yab na.
13 Ki boorganu la faa teent biaŋinba,
ki bi ji sarikitit ki bia laat.
14 Ki a te ki ti kpant nilaaka digbana kur ni,
ki bi sarikitit.
15 N tun be fei nie, ki fei piinin murirr.
16 Ki n gbia binba namin, nan n datai nba yisimin
ki bia sukiin na.
17 Ti lek ki tamm a po,
ki bia ki biir mɔlor nba ki a lor nant na,
ŋaan ki linba na kur teenit.
18 Ti ki nyik a weiu,
ti bia ki mɔk mɔyêtuk nan a sennii,
19 ŋaan ki a nyikit yann bonkob-susoot ni,
ki ŋaat bunbɔncheenn ni.
20 Li-i bonni tee ki ti nyik ki ki jiantir fin Yennu,
ŋaan jiantir tingbana,
21 a set bo saa banne, kimaan a mi ti dudukit.
22 Ŋaan a paake ki bi kpit yoo kur,
ki ti tee nan peeuk nba ki bi tuu tee siir a bin kpiu na.
23 Yennu, fiit, bee ki a gɔɔnti?
Kakitir a mɔŋ, ki daa yêent kɔtaa-a.
24 Bee ki a lek a numm nanti?
A daa tammit ti fara nan ti daamii po.
25 Ti baa ki but tiŋ niwa,
ki bi nyannit ki ti dɔɔ tanbiinii ni.
26 Fiit ki tan sommit, ki tinnit,
kimaan a lomm nba ki gbent na paak.