39
Ki jiin wunba be wahala ni yanbɔmm fiitu po
1 N yet a, “N saa soor n mɔŋ nan toona nba ki n tuune,
ki bia soor n jerinn nan mabiit paku.
N kan yet mɔbonsiar, yoo nba ki nɔɔnbiit damm kpiami.”
2 Ki n ŋmin soon nna, ki ki yet siari,
ki lek ki pak nan bonŋanna, ŋaan ki n fara na ŋamii pukii.
3 Ki n par biir, ki mi-i dukin li po, parbiir n ŋamm pukin.
Ki n ki fit nyik buboiti a,
4 “Yennu, n manfoor saa wei nlee? N saa kpo nlee yooe?
Ŋaant ki mii mi n manfoor nba saa wei biaŋinba.”
5 A te ki n manfoor jiŋa.
N manfoor fɔkint ki tee siar a boor,
nisaarik manfoor tee waaminnae.
6 Nisaarik tee nan yinyuŋ nae,
waa tuun linba kur tee yanne.
U kpaan mɔkint, ŋaan ki mi wunba tan saa yent.
7 Yennu, n ji sii loon bee? N mɔk dindann a ni.
8 Sommitin, ki min nyi yanbɔmm ni;
A daa te ki n tee jatit nilaakiri.
9 N ŋmine, n kan yet mɔbonsiari,
kimaan fine te ki n di fara na.
10 A ji daa daar n tubiri;
N yaa man kpoe nan niikura nba ki a faan na.
11 A tubdatu nba ki a daar nisaarik tubir
u yanbɔmm paak na tee kpaaniie,
ki a biir linba ki u loon nan dundura na.
Mamɔmm, nisaarik tee nan wamaasin nae.
12 Yennu, gbiintir n miaru ki bia gbiint n fabinii;
mi-i mɔ, fan baar ki tan sommin.
N be a boor ki tee nan saamɔ nae,
ki tee nan n yeejamm nba din tuu tee na; n kan wei.
13 Nyikimin ki n sii mɔk parpeenn nan maa tan saa yaat
ki ji sii kaa.