2
Ki jiin Ninefe baak po
1 Ninefe teeb, bi saa lekiwa.
Yiikoo nba yaa lin buti na baara.
Ii teen siir ki kɔn i mɔŋ paak,
kii guu sɔnjouk na, ki teen siir nan tɔb.
2 (Yennu yaa wun ŋamm fiin Israel teeb sanne, nan laa din tee biaŋinbawa ki bi datai tan biirir na.)
3 Kunkɔnkɔnna nba tee datai na dia naagbankɔŋ mɔnte,
ki bia lia liatmɔnt, ki tee siir a bin lek.
Ki bi taantorit nyirii nan muu na, ki bi taanii chibit.
4 Ki taantorit na kakii sɔnjot kur po,
ki tiin lin doo na niib tintikir boor, ki saa tunii,
ki tɔ nan muyeruk na, ki kakii nan sanyikintii na.
5 Ki bi yiin kunkɔnkɔnna saakab na ki taamm;
ki bi ŋmaan jarib, ki tut saa tɔɔnn po.
Ki binba saa lek na kakit saan joonn na boor,
ki saa senn naagbankɔŋgbeŋir nba saa guur dajingbeŋir
nba ki bi saa tut joonn maŋ ki lu.
6 Mɔkir boor tammɔi na loot yaae,
ki naan ŋaak na gbee nan jaŋmaansooruk.
7 Ki bi soor kpanbar na ŋaapoo,
ki u toontunna nba tee poob na mɔ nan ŋmana na,
ki wɔb nii nan ninbaatir.
8 Ki niib na kakit ki tin nyii Ninefe
nan mɔkir nba tuu pat ki nyun gaar biaŋinba na.
Ki kunkɔr tantir ki yeen a, “Setir man, setir man,”
ŋaan ki bi sɔɔ ki jianti.
9 Fatir salimpeena na man, fatir salimmɔna na man.
Doo na gbee nan mɔkinte.
10 Ninefe biira, sɔɔ ki biar li ni, siar ji kaa leŋ,
ki niib yan ŋmat nan jaŋmaanii,
ki bi duna jekir, ki paŋ ji ki be, ki bi numpo penn.
11 Doo nba din tee nan fɔru nba gbee nan yanbɔra na,
ki tee siaminba ki bi goon yanbɔrbis na,
ki bia tee siaminba ki yanbɔrjai nan yanbɔrnaanii sii lin,
ki bi bonbis be bi yamani na ji be lia?
12 Ki yanbɔr na soor bonkobuk,
ki patɔ burii burii, ki tur bonnaaŋ nan u bonbis,
ki gbeen u fɔru na nan nanchiat.
13 Yabint Yennu yet a, “N tee a dataake. N saa joo a taantorit muu, ki bi saa kpi a kunkɔnkɔnna na tɔb ni, ki n bia saa gaar linba kur ki a fat a leeb boor na, ki bi ji kan ban gbat a toomii na kunkɔra.”