43
Ki jiin Yennu tinnu mɔsonn po
1 Israel teeb, Yennu nba nami na yeen a,
“I daa tiin jaŋmaanii, n saa tinniwa.
N yi i sanae, kimaan i tee n yabe.
2 Yi-i sik nyun sunsuŋ ni, ŋaan n sii be nani.
I daamii kan nyanni. Yi-i kɔɔ muu ni, ŋaan li kan di-i;
ki bonpaarir nba baarii, ŋaan li kan teeni siari.
3 Kimaan mine tee i Yomdaanɔ Yennu,
Israel teeb kasii Yennu, wunba tinti na.
N saa jii Ijipt nan Sudann nan Seba-e,
ki lin teen i tinnu paatii.
4 N saa jii digbanmunne ki lin teen i tinnu paatii,
kimaan i ŋan ki turin, ki n looni ki te niib teeni baakir.
5 I daa tiin jaŋmaanii. N be nani.
“N saa jii i niib yondo po nan yonbaa po, ki kpen namm.
6 N saa pak gaŋ po ki wun te bin kun,
ki bia pak diitu po ki u daa gɔibi.
Ŋaant ki n niib n nyi banfɔka, durinya na munn po, ki ŋmat kun.
7 Bi tee n tiɔŋ niibe, ki n namm a bii baakitin.”
Biaŋinba ki Israel teeb na tee Yennu siara damm
8 Ki Yennu yet a, “Tikit n niib barbuut boor.
Bi mɔk ninbina, ŋaan bi tee jɔɔniie.
Bi mɔk tuba, ŋaan bi tee tuukpaae.
9 Tikit niib na, ki bin baar buut boor.
Bi yenlanɔe saa fit bunt linba tan saa tumii?
Bi ŋmee din bunt linba tan tuun mɔtana na?
Ŋaant ki yennii maŋ n baar nan bi siara damm
ki wann nan bi mɔk mɔnii, ki wann bi mɔnii bi mɔbona ni.
10 “Israel teeb, yimme tee n siara damm;
n gann yimme maa yii tee n toontunna,
ki fit bannin, ki teenin yada,
ki bia bann nan mine tee Yen-yemmir.
Yennu ji kaa ki pukin n po;
yensau din kaa kawa, ki yensau bia kan ban kii be.
11 “Min kuukɔɔe tee Yennu, min kɔɔe saa fit tinni.
12 Mine bunt linba saa tun, ki bia baar a man sommi.
Yenganu ki ban tun linba na, yimme tee n siara damm.
13 Mine tee Yennu, ki bia sii yɔɔ tee.
Sɔɔ kaa ki saa fit nyi n yiikoo ni,
sɔɔ bia kaa ki saa fit lebit maa tuun linba.”
Ki jiin Israel teeb tinnu po
14 Israel teeb kasii Yennu, wunba tinti na yeen a,
“N saa tun kunkɔnkɔnnae Babilonn ki tinni,
n saa biir doo maŋ tammɔi,
ki li niib hootii na saa kpant mɔŋ.
15 Mine tee Yennu nba tee i kasii Yomdaanɔ.
Mine nan yimm Israel teeb, ki bia tee i kpanbar.”
16 Sianyoo Yennu din teen sɔnjouk ki gaan mɔkgbeŋir ni,
ki faa sɔnu ki gaan nyunpubirkan ni,
17 ki biir kunkɔnkɔnna bonchiann,
ki bi tee jab nba mɔk taantorit nan taanii.
Ki bi sik, ki kan ban do,
ki bot nan fitir muu nba tuu kpeen na.
18 Ŋaan ki Yennu yet a,
“I daa maa linba tun ki gar sian yoowa,
koo ki gaa li paaki.
19 Ii gorii bonpaann nba ki n yaa man tun na.
Li poŋ tuume, ki i saa fit lar mɔtana.
N saa faa sɔnu ki gaan kunkoouk paak,
ki turi kpenii nba mɔk nyun leŋ.
20 Muuk ni bonkobit gbaa saa baakin;
mɔbɔi nan naamiant saa dontin,
yoo nba ki n te mɔka puub kunkoouk paak
a lin tur n nigannkab nyun na.
21 N nan ŋamme ki bi tee n tiɔŋ niib, ki bi saa yin ki dontin.”
Ki jiin Israel teeb biit tumu po
22 Ki Yennu yet a, “Ŋaan yimm Israel teeb din miatime,
ki ki jiantirin.
23 I ki baar nan i mujoonu maruŋ pei ki turimi,
i ki turin baakir nan i maruŋu.
N din ki turi jikir kaa nan maa boi-i maruŋ po na,
koo n ki bakinti kaa nan maa boi-i bonnunubit po na.
24 I ki daa bonnunubit ki turin,
i bia ki maan n par nan i bonkobit kpapana,
ŋaan jinnin i biit jik-kpiata,
ki te ki n bak nan biit nba ki i tun na.
25 Ŋaan mine bia tee Yennu nba nyikin i biit ki chabiti;
n tuun linba na, kimaan maa tee wunba na paake.
N kan biiri, i biit paaki.
26 “Ŋaant ki tin saan buut boor, baat nan i maan man.
Pakin i maan, ki wann nan i mɔk mɔnii.
27 I yeeja sinsinn din tun biite, ki i tɔɔndamm tun ki biirin,
28 ki i doo diara biir n kasii boor.
Ŋanne ki n baar nan biiru yimm Israel teeb paak,
ki te ki bi sukii yimm n tiɔŋ niib.”