1 Na'e Minaz Xuwa ywy rehe har uze'eg a'e kury.

2 Màràn 'ar eremumaw putar nezewe neze'eg pà nehe, Izo.

Màràn 'ar neze'eg umumaw putar ywytuhu iawy 'ym pà nehe.

3 Aipo Tupàn umuaiw ukatu haw.

Aipo upuner wera'u ma'e uzapo ma'e ikatu 'ym ma'e.

4 Azeharomoete nera'yr uzapo ikatu 'ym ma'e Tupàn henataromo wà.

A'e rupi uzepyk wanehe ta'e ikatu wanehe izepykaw izupe xe.

5 Ezewyr Tupàn pe kury.

Eze'eg Upuner Wera'u Ma'e pe nehe.

6 Aze nekatu azeharomoete, aze ereiko imunar 'ym ma'e romo,

Tupàn ur putar na'arewahy nepytywà pà nehe.

Umur wi putar nereko haw newe nehe, ta'e nekatu tuwe ne xe.

7 Nanema'enukwaw tetea'u kwaw ma'e newi upaw ma'e kwer wanehe nehe.

Ta'e Tupàn umur wi putar ma'e tetea'u newe a'e wà nehe no xe.

8 Epuranu tua'uhez ma'e wanehe nehe.

Ezemu'e neipy wanemiapo kwer rehe nehe no.

9 Ta'e zazexak kar karumehe zane xe. Naxikwaw pixik kwaw ma'e zane.

Zane'ar ywy rehe har upaw ma'e i'àgaw ài.

10 Tuwe tua'uhez ma'e uze'eg newe nemu'e pà wà nehe.

Uze'eg putar nezewe newe uzeapo ma'e kwer rehe wà nehe.

11 Aipo wywàràn upuner hezuz haw rehe muite 'y wi.

Aipo ka'api'i popok upuner utua'u haw rehe 'y heta 'ymaw pe.

12 Ikyr katu a'e. Nezewe rehe we imonohok 'ym mehe we uxinig a'e,

Amogwer ka'a ixinig 'ym mehe we a'e.

13 Nezewegatete haw uzeapo teko Tupàn wi heharaz ma'e wanupe no.

Nezewegatete ikatu 'ym ma'e wama'eràrogatu haw uxinig wanuwi no.

14 Waneko haw ikatu haw nuzawy kwaw inemu'i.

Wazeruzar haw nuzawy kwaw zanu ikyhaw.

15 Wapyk ikyhaw rehe wà. Owok wanuwi.

Upyhyk inemo wà. Nupuner kwaw upu'àmaw rehe wà.

16 Ikatu 'ym ma'e itua'u ka'a kwarahy rehe har ài wà.

Uhàuhàz ma'etymaw nànàn wà.

17 Wanapo umàumàn ita wà.

Upyhyk itahu wà.

18 Nezewe rehe we aze amo ozo'ok nehe,

Ni amo nukwaw kwaw a'e pe waneko awer wà nehe.

19 Nezewe ikatu 'ym ma'e waneko haw upaw.

Amo teko uhem wanekuzaromo wiko pà wà.

20 Azeharomoete Tupàn nuityk kwaw teko imunar 'ym ma'e wà.

Nomono kwaw opo ikatu 'ym ma'e wanupe wapytywà pà.

21 Nemupuka wi kar putar a'e nehe.

Erehapukaz putar nerurywete romo nehe no.

22 Neàmàtyry'ymar wiko putar maranugar haw rehe wà nehe.

Amo weityk putar ikatu 'ym ma'e wanàpuz wà nehe no.