1 Ehapukaz nehe, Izo. Aze ru'u amo uwazar putar neze'eg newe wà nehe.

Ma'enugar Tupàn heko haw pe har erenoz putar nehe.

2 Na'ikatu kwaw nezemumikahy haw. — Ma'e paw iroahy ihewe, aze ere nehe, he'o ma'e ài ereiko putar nehe.

Ma'ekwaw paw hereko 'ymaw weraha teko wamàno haw pe wà.

3 Amo 'ar mehe aexak amo awa ma'ekwaw 'ymar ihe.

Oho katu ru'u heko haw izupe.

Amono heze'egaiw hehe ihe, iànàm wanehe ihe no.

4 Naheta kwaw ikatu 'ymaw wi uzepyro àwàm ta'yr wanupe.

Tàmuz uzepyk e wanehe wà. Naheta kwaw wapyro àràm wà.

5 Ima'uhez ma'e uputar hemetarer wà.

U'u te hemi'u ràm imonokatu pyrer ko wi ipo'o pyrer wà no.

Te arozràn xu inuinuromo hezuz ma'e kwer u'u wà.

6 Ma'erahy nahezuz kwaw ywy wi.

Iaiw paw nuzexak kar kwaw ywy wi.

7 Tataruwer tàtàpyzgwer wi uhem ma'e kwer uzeupir azeharomoete a'e.

Nezewegatete zane xipuraraw kar ma'erahy zanezeupe zane.

8 Izo, aze mo ne romo aiko, azewyr mo Tupàn pe ihe.

Amono mo heremipuraraw izupe.

9 Nazapuner kwaw hemiapo kwer purumupytuhegatu kar ma'e ikwaw katu haw rehe zane.

Hemiapo hexak pyr 'ym waneta haw nupaw kwaw.

10 Tupàn umur àmàn ywy rehe.

Umu'ar kar 'y ko rehe no.

11 Tupàn umupu'àm ikàg 'ym ma'e ywate a'e wà.

Omonokatu uzai'o ma'e wapyro àwàm me wà no.

12 — Azapo putar ma'e ihe nehe, i'i ikatu 'ym ma'e iapo zemimar uzeupe.

Tupàn nuzapo kar kwaw izupe. Nupuner kwaw a'e ma'e iapo haw rehe.

13 Upyhyk ma'e iapo zemimar ma'e iapo zemim mehe wà.

Umumaw wanemiapo ràm iaiw ma'e wanuwi.

14 'Aromo katu upyta ipytunahy haw rehe wà.

Kwarahy wapytepe hin mehe wata hehàpyhà 'ym ma'e ài wà.

Opokok ma'e oho waiko pyhaw wata ma'e ài wà.

15 Tupàn upyro hemetarer 'ym ma'e wamàno haw wi wà.

Upyro ma'e hereko 'ymar upuner ma'e wapo wi wà no.

16 Tupàn omono ma'e hàrogatu haw ikàg 'ym ma'e wanupe.

Uwàpytym ikatu 'ym ma'e wazuru wanuwi no.

17 Aze Tupàn umume'u amo hemiapo kwer ikatu 'ym ma'e izupe nehe, hurywete a'e teko a'e nehe.

A'e rupi, eze'eg zemueteahy zo Tupàn upuner wera'u ma'e purehe izepykaw rehe nehe.

18 Tupàn upurumugaz a'e. A'e ae umukatu wemimugaz kwer no.

Upurukutuk no. Nezewe rehe we ipo umukatu wemikutuk kwer no.

19 Tuweharupi Tupàn nepyro putar ikatu 'ymaw wi nehe.

Nuzapo kar kwaw ikatu 'ym ma'e newe nehe no.

20 Temi'u ihyk 'ym mehe nanemumàno kar kwaw nehe.

Teko wazeàmàtyry'ym mehe nepyro putar takihepuku wi nehe.

21 Nepyro putar iapeku ikatu 'ym ma'e wanuwi nehe.

Nerekyze kwaw ma'e imumaw paw heta mehe nehe no.

22 Erepuka putar teko wazezukazuka mehe nehe, temi'u ihyk 'ym mehe nehe.

Nerekyze kwaw miar ipuruzukaiwahy ma'e wanuwi nehe no.

23 Neko pe ita numuaiw kwaw ywy heruwaruwak awer nehe.

Miar ipuruzukaiwahy ma'e nuzeagaw kwaw nezuka pà wà nehe no.

24 Nereko haw pe ereiko putar zeàmàtyry'ym 'ymaw rehe nehe.

Nema'e ipapar mehe uhyk putar nehe.

25 Heta putar nera'yr tetea'u wà nehe.

Nezuapyapyr waneta àwàm nuzawy kwaw ka'api'i huwer neko pe har waneta haw nehe.

26 Eremàno putar netua'uhez mehe nehe, nekàg we mehe nehe no.

Ereiko putar arozràn haryw i'ar rehe katete mehe ipo'o pyrer ài nehe.

27 Izo, zanereko haw zanemu'e nezewe haw rehe a'e.

Ko ze'eg azeharomoete har romo a'e. Nema'enukwaw hehe nehe. Ikatu putar newe nehe.