1 Awa ikàg ma'e ne. Màràzàwe tuwe eremume'u nekatu 'ymaw amo wanupe ne. — Hekatu 'ymaw ipuràg ihewe, ere wanupe.

Tupàn ipuruamutar haw nupaw pixik kwaw nehe.

2 Eremume'u amogwer teko wamumaw pàwàm iko nezeupe.

Neapeku nuzawy kwaw takihe haime katu ma'e purukixi ma'e a'e.

3 Ikatu 'ymaw ikatu wera'u newe ikatu haw wi a'e.

Temu'emaw ikatu wera'u newe ze'eg azeharomoete har wi a'e.

4 Hemu'em ma'e romo ereiko. Neze'eg nuzawy kwaw takihe.

Erekutuk teko ne wà. Wakutukaw ikatu newe.

5 A'e rupi Tupàn nemumaw putar azeharomoete a'e nehe.

Nepyhyk putar nehe, neràpuz nereko haw wi nereityk pà nehe.

Tupàn nezo'ok putar ywy wikuwe ma'e hereko har wi nehe.

6 Teko Tupàn heruzar har wexak putar nezo'okaw a'e wà nehe. A'e rupi ukyze putar wà nehe.

Upuka putar nerehe wà nehe, nerehe uze'eg pà wà nehe.

7 — Peme'e ko awa rehe nehe. — Hepyro pe nehe, ni'i kwaw Tupàn pe a'e.

Uzeruzar wemetarer uhua'u ma'e rehe uma'e tetea'u rehe.

Wekar uzepyro àwàm ukatu 'ymaw pupe, i'i putar nerehe wà nehe.

8 Ihe aiko uri 'yw ikyr katu ma'e ài ihe.

Herezuz tekoko Tupàn hàpuz huwake.

Tuweharupi azeruzar ipuruamutar haw rehe hepytu'u 'ym pà.

9 O Tupàn, tuweharupi amume'u putar nekatu haw ihe nehe, ta'e neremiapo kwer ikatu a'e xe.

Neremiaihu nerehe uzeruzar ire upytu'u 'ym ma'e wainuinuromo amume'u putar nekatu haw ihe nehe.