2 Aipo amo teko upuner Tupàn ipytywà haw rehe. Te ma'e kwaw katu har,

Aipo upuner ma'e iapo haw rehe izupe.

3 Aipo Tupàn upuner wera'u ma'e ipurukwaw wer imunar 'ym ma'e romo nereko haw rehe.

Aze nekatu ma'e paw iapo mehe nehe, aipo nekatu putar izupe nehe.

4 Nerenoz putar nerehe uzepyk pà nehe. Eremuwete katu Tupàn hehe nezeruze'eg pà.

— Izo hemuwete katu a'e, a'e rupi ainoz putar hemiapo kwer imume'u pà nehe, hehe hezepyk pà nehe, ni'i kwaw Tupàn uzeupe.

5 Nerenoz putar a'e nehe, ta'e erezapo ikatu 'ym ma'e tetea'u ne xe.

Teko nupuner kwaw nekatu 'ym awer ipapar haw rehe wà.

6 Kwehe mehe, aze amo neywy rehe har wenoz temetarer newe wà,

— Ezar nekamir hepo pe hekuzaromo nehe. Heremetarer imuzewyr mehe amono wi putar newe nehe, ere wanupe.

Wiko ikamir 'ym ma'e romo a'e 'ar mehe wà.

7 Neremono kwaw 'y teko ikene'o ma'e wanupe.

Neremono kwaw temi'u teko ima'uhez ma'e wanupe.

8 Ereiko tuwihaw romo.

A'e rupi erepuner ko ywy izar romo nereko haw rehe.

9 Nemunar tu 'ym ma'e wama'e rehe.

Nerepytywà pixik kwaw imen umàno ma'e kwer ne wà.

10 A'e rupi ikatu 'ym ma'e umàmàn neywyr kury.

Na'arewahy nekyze haw wiko nezar romo no.

11 Uhua'u ipytunahy haw. A'e rupi nerexak kwaw ma'e.

'Y tyhu ma'e uwyrykahy ma'e zàwenugar nereraha iko.

12 Tupàn wiko ywate ywak rehe a'e.

Zahytata upyta ywate a'e wà no.

Nezewe rehe we Tupàn ume'e uzewy pe wanexak pà.

13 Nezewe rehe we erepuranu iko. — Aipo Tupàn ukwaw amo ma'e a'e, ere iko. Ywàkun upyta zane'aromo.

Tupàn upyta ywàkun i'aromo a'e.

Aze ru'u nupuner kwaw zaneremiapo kwer imume'u haw rehe, ere iko.

14 Izo, — Ywàkun iànàm ma'e nazanerexak kar kwaw Tupàn pe a'e wà,

Ywak rupi iata mehe a'e wà, ere iko aipo.

15 Aipo neata wer ikatu 'ym ma'e wanape rupi.

Kwehe wata pe ikatu 'ym ma'e rupi wà.

16 Umàno na'arewahy wà.

Wiko 'y uwyrykahy ma'e hemiraha kwer zàwenugar romo wà.

17 Uze'eg nezewe Tupàn pe wà.

— Etyryk urewi nehe, i'i izupe wà.

— Ma'e ikatu ma'e Tupàn upuner wera'u ma'e upuner iapo haw rehe zanewe a'e,

I'i uzeupeupe wà.

18 Tupàn a'e, a'e ae umynehem ikatu 'ym ma'e iapo har wanàpuz ikatu ma'e tetea'u pupe a'e.

Nezewe rehe we nahema'enukwaw wer kwaw wazàwe ihe.

19 Teko imunar 'ym ma'e hurywete wà.

Ikatu ma'e upuka wà.

20 Upuka hemetarer katu ma'e wama'e ipaw mehe wà,

Ikurer tata pupe ikaz mehe wà.

21 Izo, ezemuawyze kar Tupàn pe nehe.

Epytu'u iàmàtyry'ymar ài nereko re nehe.

Nezewe mehe umur putar ikatu ma'e tetea'u newe a'e nehe.

22 Tuwe Tupàn nemu'e nehe.

Emonokatu ize'eg nepy'a pupe nehe.

23 Aze erezewyr Tupàn upuner wera'u ma'e pe nehe, aze ereiko ikàg 'ym ma'e romo henataromo nehe,

Aze eremumaw ikatu 'ymaw neràpuz me har nehe,

24 Aze or ikatu wera'u ma'e na'ikatu kwaw newe nehe, aze nuzawy kwaw ywy imuku'i pyrer newe nehe,

Aze nuzawy kwaw ita'i yrykaw izywyr har newe nehe,

25 A'e mehe Tupàn upuner wera'u ma'e wiko putar or ikatuahy ma'e ài newe nehe.

Nuzawy kwaw parat hekuzar katu wera'u ma'e newe nehe no.

26 Wiko putar nerurywete haw romo nehe.

Erepuner putar hehe neme'e haw rehe nehe, hehe nezeruzar haw rehe nehe.

27 Nerenu putar neze'eg mehe a'e nehe.

Eremono putar neremimume'u kwer izupe nehe no.

28 Neremiapo paw ikatu putar nehe.

Tatainy uhyape katu putar nerape rehe nehe.

29 Tupàn umuezywa'u wiko wera'u ma'e wà.

Upyro ikàg 'ym ma'e wà.

30 Nepyro putar a'e nehe no, aze ereiko ikatu 'ym ma'e iapo 'ymar romo nehe,

Aze nekatu ma'e paw iapo mehe nehe.