1 एको सोलोमन आ अरु दें‍तीक लोव़ बाक्‍नीम। मिनु यहूदा ङा पिप हिज्‍कीयाह आ मुरपुकीमी मेको ब्रेक्‍शो बाक्‍तेक्‍म। हितोपदेस १:१; हितोपदेस १०:१ 2 परमप्रभुमी का निक्‍शी लोव़ ख्रुइश्‍शा आ सक्ति कोंइब। तन्‍न पिपमी नेल्‍ल तुइक्‍पाइश्‍शा, आ सक्ति ठेयब सेल्‍ब। 3 सरीङ गिश ग्‍येत्‍थ बाक्‍बा, रागी गिश लुक्‍च लाइबा नु पिप आ थुंमी मार मिम्‍बा, मेको सुइमी यो तुइक्‍ने मचाप्‍नीम। 4 चांदी यपाइश्‍शा, आ कस ग्रुंइताक्‍म हना, चेम्‍बमी रिम्‍शो थोव़क चेम्‍ने चाप्‍ब। 5 मोपा पिप आ ङोंइती रे परमप्रभु यावे आ अरेशो मटीब आन कली तिलीन। मिनु पिप आ हुकुम पतीके बोल्‍यो दुम्‍ब। हितोपदेस १६:१२ 6 पिप आ ङोंइती आंम कली ठेयब मसेलो। मिनु पिप आ ठेयब गेय पाइब आन बाक्‍तीक लचा ममालो। 7 मारदे हना ठेयब आन दातेमी इ कली “याक्‍सो”, माइक्‍चा पुंइसीचा क्‍येङा “एक कुने, नि‍स्‍सीन” दे ब्रेश्‍शो रिम्‍शो बाक्‍ब। 8 गे मार मरिम्‍शो ताप्‍तीवी हना यो, रीब पा निसाफ पतीकेमी मलावो। मारदे हना इ नेक्‍था ङा मुरुम इ कली मुने तोक्‍ते हना, मार पाइनेवे। लूका १४:७-११

9 गे इ नेक्‍था ङा मुर नु आंमा रीब पा लोव़ पावो। मेको मुर आ मरिम्‍शो पशो मफ्रावो। हितोपदेस २०:१९ 10 मिनु इ फ्रशो लोव़ नेंबमी इ कली मुने तोक्‍ङे। मिनु इ नें गेना हना यो मरिम्‍शो लीब। 11 रिम्‍शो गारचा ङा लोव़ पशोनु, चांदी के थालम वोइश्‍शो सुन के स्‍याउ खोदेंशो बाक्‍ब। हितोपदेस १५:२३ 12 जोक्‍ब तुइक्‍ब मुर आ हुइक्‍तीक लोव़ नेंब मुर कली सुन के औंठी नु गहना खोदेंशो बाक्‍ब। 13 थमा लोव़ क्‍याक्‍ब मुर, आ होव़प कली हुप्‍शो नाक्‍त अन्‍न रुप्‍ची ना ङा फुं खोदेंशो पा रिम्‍शो बाक्‍ब। मेको लोव़म आ होव़प आ थुं बारपाइक्‍ब। 14 सु मुरुमी मारेइ मगेथु, गेता, दे ठेयब लोव़ पाइबा, मेको मुर रेउ मयिपाइक्‍ब गोस्‍स नु फश खोदेंशो बाक्‍ब। 15 फाल्‍तीकेमी हुकुम कली बिप्‍पाइक्‍ने चाप्‍नीम। ब्रोव़शो लोव़मी रुश जिक्‍ने चाप्‍ब। हितोपदेस १५:१ 16 खुदो थित्‍तीवी हना, शुश मजावो, इ कली गाप्‍चा ङा पा जावो। मारदे हना शुश जाप्‍तीवी हना, मेचा कुइक्‍ब। 17 इ नेक्‍था ङा मुर आ खिं शुश मलावो। मारदे हना मेकोमी इ कली शुश जाक्‍शो तशा ब्रीब। 18 आंम नेक्‍था ङा मुर कली जोल पा सांकछी गेब मुर कोक्‍के तरवार नु हेश्‍‍शो ब्रा खोदेंशो बाक्‍ब। 19 श्‍येत जशो ना थमा मसुइक्‍चा ङा मुर कली थमा सुइक्‍चा खाइश्‍शो ख्रुइ नु मदुक्‍ब खोइल खोदेंशो बाक्‍ब। 20 सुमी थुं खाइश्‍शो मुर आन ङोंइती कुम्‍सो पाइबा, मेको ग्‍यूमी वा रोइश्‍शो नु गारमी हिक्‍सी ख्रेक्‍शो खोदेंशो बाक्‍ब। मिनु वा ख्रोइक्‍ब तुम्‍बु नु शी ख्रोइक्‍ब बुस्‍स खोदेंशो मेको सुर्ता पाइब मुर आ थुं बाक्‍ब। 21 इ जोरी सत्रु शोव़लु बेक्‍तेक्‍म हना, मेको आन कली थुलो। तूतू दाक्‍तेक्‍म हना, मेको आन कली ब्‍वाक्‍कु तूचा गेवो। रोमी १२:२० 22 मो पाप्‍तीवी हना, मेको आन पिया तारी ब्रशो कोइला मोइश्‍शो खोदेंशो दुम्‍ब। मिनु परमप्रभु यावेमी इ कली इनाम गेब। 23 उत्तर रे पा फशेमी रेउ यिपाइश्‍शो खोदेंशो पा, ख्रुइश्‍शो लोव़ फ्राइबमी मुर आन कुल राव किक्‍पाइक्‍ब। 24 गेना हना यो जिचा पोक्‍ब मीश नु बाक्‍चा क्‍येङा खिं आ तला तारी कुना कामी लशा सिक्‍सी पा बाक्‍चा रिम्‍शो दुम्‍ब। 25 तूतू दाक्‍ब मुर कली ब्रोव़शो ब्‍वाक्‍कु खोदेंशो पा ङोन रागी रे जाक्‍शो रिम्‍शो लोव़ बाक्‍ब। हितोपदेस १५:२५ 26 ठीक पाइब मुर परमप्रभु यावे आ अरेशो मटीब नु गारत हना, मेको हिलोम बुक्‍शो ब्‍वाक्‍कु नु शुश ग्रांग्रा बाक्‍शो कुवा खोदेंशो बाक्‍ब। 27 शुश खुदो जचा नु आंम कली ठेयब मिम्‍शा मान पाइक्‍चा पुंइसीचा, निम्‍फा मुर कली मरिम्‍शो बाक्‍‍ब। 28 सुमी आंम कली ठीक पा चलेने मचाप्‍‍बा, मेको गारो ब्रेश्‍शो सहर खोदेंशो बाक्‍ब। हितोपदेस २९:११