14
परमप्रभु यावे आ नाक्ती
1 परमप्रभु यावे आ नाक्त का जाक्ब। मेना इन के रोइश्शा लाइश्शो थोव़क इन दातेमीन योक्सीनीनी। यसैया ३९:६ 2 गो रागी रागी ङा मुर नेल्ल आन कली यरूसलेम नु लडाइ पपाइक्चा कली पुक्नुङमी। मिनु सहर मेको आन के दुम्ब। मेको आन खिं ङा मारेइ मारेइ रोइक्नीम। मिनु मीश मुर आन कली बिथोलो पाइनीम। सहर ङा उइक्थ मुर ग्याइश्शा लाइक्चा पुंइसीनीम। लीशो मेको सहर उइ बाक्नीम। 3 मिनु नोले परमप्रभु यावेमी मेको रागी रागी ङा मुर नु लडाइ पाइब। मुरुमी लडाइ पशो खोदेंशो पा लडाइ पाइब। जकरिया १२:३; यसैया ४२:१३; प्रकाश १९:१९ 4 मेको नाक्त आ खोइलीमी यरूसलेम आ ङोंइती पूर्ब गे बाक्शो जैतून डांडा कली थेक्ब। मिनु जैतून डांडा आ पूर्ब रे पच्छिम सम्म ठेयब पा जेप्ब। मिनु डांडा उइक्थ उत्तर गे नु उइक्थ दक्खिन गे दुम्शा बाक्ब। मिनु दातेमी ठेयब बेंसी का दुम्ब। 5 गेपुकी परमप्रभु यावे आ डांडा ङा बेंसी रे पा प्रोक्चा माल्नीनी। मेको आस दाते ङा बेंसी आसाल सम्म जाक्दीश्शो बाक्ब। गेपुकी यहूदा ङा पिप उज्जीयाह आ पालामी कुशो ख्रिनुमी मुरपुकी प्रोक्शो खोदेंशो पा प्रोक्नीनी। मिनु नोले परमप्रभु यावे, आं परमप्रभु आ मुर नेल्ल नु यीब। आमोस १:१
6 मेको नाक्त नां नु तास्लाम छेङछेङ मगेनीस। ग्यू यो मदुम्ब। 7 मिनु गेना हना यो नाक्त बाक्ब। मारदे हना नाक्दो दुम्ची ना छेङछेङ बाक्ब। परमप्रभु यावेमी मेको नेल्ल तुइक्ब। मर्कूस १३:३२
8 मेको नाक्त यरूसलेम रे पा ब्रोंइचा गेब ब्वाक्कु शाइश्शा यीब। मिनु मेको उइक्थ पूर्ब ङा समुन्द्र गे नु उइक्थ पच्छिम ङा समुन्द्र गे शाइक्ब। मेको होशो नु सिक्शो नेल्ल नाक्त शाइक्ब। इजीकीएल ४७:१-८
9 परमप्रभु यावे रागी नेल्ल ङा पिप दुम्ब। मेको नाक्त परमप्रभु यावे का ला बाक्ब। आ नें यो का ला बाक्ब। भजन संग्रह ९७:१; प्रकाश ११:१५
10 मिनु रागी नेल्ल दिंम दुम्ब। मेको गेबा रे पा यरूसलेम आ दक्खिन ङा रिम्मोन सम्म दिंम दुम्ब। तन्न यरूसलेम बेन्यामीन लाप्चो रे, माइत लाप्चो लाक्शा, सुर ङा लाप्चो सम्म नु हानानेल माइश्शो लाइश्शो खिं रे पिप आ अङगुर ख्राक्तीक सम्म बाक्ब। मिनु यरूसलेम आ इर ङा बाक्तीकेम बाक्ब। यहोसु १५:३२; येरमीया ३१:३८ 11 मिनु यरूसलेममी मुरपुकी बाक्नीमी। मिनु मेको गेनायो लेंशा खतम मसेल्नीम। यरूसलेम मारेइ मदुम्थु बाक्ब। प्रकाश २२:३; येरमीया ३३:१६
12 परमप्रभु यावेमी यरूसलेम कली लडाइ तोइब आन कली मार बेक्तीक रोइ पपाइक्ब देंशा हना, मुर गाक्ना गाक्ना आन श्ये राक्तीके, आन मिक्च आन बाक्तीकेम राक्तीके नु आन लें आन शोव़मी राक्तीके रोइ पपाइक्ब। 13 मेको नाक्ती परमप्रभु यावे रे पा मुर शुश हिंनीम। मेको नेल्लेमी आन नेक्था ङा मुर आन गुइ ग्याइक्नीम। मिनु नोले राम्शी पोक्नीम। 14 यहूदा आ मुरपुकीमी यो यरूसलेममी लडाइ पाइनीम। मिनु रागी रागी ङा मुर आन शोंप खुप्नीम। मार खुप्नीम देंशा हना, सुन चांदी नु वासी शुश खुप्शा तेल्नीम। 15 मेको आन बाक्तीकेम बाक्शो शारा, खच्चर, दलओंठ, गधा नु मेकेर मार मार बी ब्यफ क्यारश भेडा बाक्मा, मेको नेल्ल मुर कली साइक्ब रोइ पाइनीम।
16 मिनु यरूसलेम कली लडाइ तोइब रागी रागी ङा मुर आन दाते ङा सु सु ब्रोंइशा लीमा, मेकोपुकी बर्स बर्समी यरूसलेम लशा पिप नु मुर नेल्ल आन परमप्रभु यावे कली मान पा ठेयब सेल्चा माल्नीम। मेकोपुकीमी गोठ सेल्शा मानेतीक चाड मानेचा कली यरूसलेम लचा माल्नीम। जकरिया १४:९ 17 मिनु तेको रागी नु खिं ङा मुर नु पिप, मुर नेल्ल आन परमप्रभु यावे कली मान पा ठेयब सेल्चा कली यरूसलेम मलाम्तेक्म हना, मेको आन कली रेउ मयीब। 18 मिनु इजीप्त रागी ङा मुरपुकी गोठ सेल्शा मानेतीक चाड मानेचा कली यरूसलेम मलाम्तेक्म हना, मेकोपुकी यो अर्को रागी ङा मुर खोदेंशो पा परमप्रभु यावेमी गेशो श्येत जाइनीम। 19 इजीप्त रागी नु रागी नेल्ल ङा मुर सु मेको गोठ सेल्शा मानेतीक चाड मानेथ मलाइनीमी, मेको मोदेंशो सजाइ ताइनीम।
20 मेको नाक्ती शारा आन किङगोम यो “परमप्रभु यावे कली ला बाक्नीम” दे मुशा ब्रेक्शो बाक्ब। मिनु परमप्रभु यावे आ खिं ङा क्येतीक ग्योंबपुकी, चढ़ेतीक आ ङोंइती बाक्शो ग्योंब खोदेंशो पा “परमप्रभु यावे केन बाक्नीम” दे ब्रेक्शो बाक्ब। प्रस्थान २८:३६ 21 मिनु यरूसलेम नु यहूदामी बाक्शो क्येतीक ग्योंब नेल्ल मुर नेल्ल आन परमप्रभु यावे कली ला बाक्नीम। सु सुमी चढ़ेनीमी, मेकोपुकीम मेको ग्योंबुम आन चढ़ेशो श्ये लोप्ने चाप्नीम। मिनु मेको नाक्त रे मुर नेल्ल आन परमप्रभु यावे आ खिंमी ग्याप्ब लेयब मुर का यो मबाक्नीम। प्रकाश २१:२६-२७; मत्ती २१:१२