11
इस्राएलीपुकीमी गन गन पशो
1 मिनु परमप्रभु यावेमी मुर आन श्येत जशो आ पर्बम गन गन पशो नेंतु। परमप्रभु यावेमी मेको नेंशा, शुश गाइक्ताक्व। मिनु परमप्रभु यावे गाइश्शा, मुर आन बाक्तीके गे मी सोइश्शा, एर सुर मीम नेक्पाइक्तु। लेवी १०:२ 2 मिनु मुरपुकीमी मोसा कली “वारच पने” दे ग्रीतेक्म। मिनु मोसामी परमप्रभु यावे कली पुंइतु। मिनु मेको मी काप्त। 3 मिनु परमप्रभु यावेमी मेको आन दातेमी मी सोइक्तीके, मेको बाक्तीके आ नें तबेरा वोइक्तेक्म।
4 मिनु मेको आन दातेमी बाक्शो अर्को रागी ङा मुरपुकीमी मार मार जचा थोव़क जचा ब्वचा दाक्तेक्म। मिनु इस्राएली यो लेंशा ङाक्शा “गोपुकीमी श्ये ब्वचा तक हना, दुम वा। प्रस्थान १२:३८; प्रस्थान १६:३; १कोरिन्थी १०:६ 5 गो इजीप्तीमी मो ब्वशो ङांइ श्ये मिम्नीकी। मिनु वोबीस, खाइपुकी, प्याज नु लसुन यो मिम्नीकी। 6 तन्न गो मुल ओले पेते दुम्शा, एको मन्ना ङा लाक्शा मारेइ मथित्नीकी” देंतेक्म।
7 मन्ना चहिं धन्या वांचेर खोदेंशो बाक्त। मेको कोव़शोनु, खोटो खोदेंशो तांइसीबाक्त। प्रस्थान १६:१४-३१ 8 मिनु मुरपुकी लशा, मेको खुप्शा, कोइमी हिल्शा, कोइमी चुशा, कोंइमी नेल्शा, कोइम बटुक सेल्शा जाम्तेक्म। मिनु मेको तेलम चोशो शोब्ले खोदेंशो पा ब्रोव़बाक्त। 9 मिनु नाक्दो आन बाक्तीकेमी सीत यिमेनु, मन्ना यो यीबाक्त।
10 मिनु मोसामी मुर नेल्ल आन आन ताम्बु ङा ओव़तीकेमी राप्शा ङाक्शो ताप्तु। मिनु मुरपुकीमी परमप्रभु यावे कली शुश गाइक्पाइक्तीके, मोसामी मेको आन पशो काइ मदाक्शो बाक्त।
11 मिनु मोसामी परमप्रभु यावे कली “गे मारदे आं कली श्येत गेयीनी? मारदे गो इन ङोंइती शिशी मतङा? मारदे आं कली इश ङा मुर आन कली कोव़ब सेल्यीनी? 12 मार, एको इश ङा मुर आं आल नमी ङा? मार, गो मेको आन कली थिङमी ङा? गे आं कली ‘दूध तूब आल कली आ आममी कुरशा लाइश्शो खोदेंशो पा, आंइ किकी पिपी आन कली इन गेशो रागीमी कुरशा लावो’ देंनीनी। 13 गो इश ङा मुर आन ब्वतीक श्ये ते थित्नुङ ङा? मिनु मेकोपुकीमी आं कली ‘श्ये ब्वचा गेकी’ दे जाक्शा ङाक्तेक्म। 14 गो इश ङा मुर आन कली खुल्ने मचाप्नुङ। एको आं मचाप्चा ङा गेय बाक्ब। 15 मिनु गे आं कली ओदेंशो पाइक्तीनी। मिनु गो इन शिशी ताता हना, साइय्यीनी। मिनु गो आं खतम दुम्तीके तचा ममाल्नुङ” देंत। प्रस्थान ३२:३२
16 मिनु परमप्रभु यावेमी मोसा कली “गे इस्राएली आन दाते रे ७० जना खाल्पा आन कली खुप्तीमी। मेको आन मुर आन दाते ङा ठेयब मुर नु मेको आन कली सासन पाइब मुर दुम्चा माल्नीम। मिनु गे मेको आन कली तुइक्चा माल्नेवे। मिनु मेको आन कली ग्रुम्तीक ताम्बुमी चाक्मी। मिनु मेकोपुकी गे नु बाक्चा माल्नीम। प्रस्थान १८:२१-२६; प्रस्थान २४:९-११ 17 मिनु गो यिशा, गे नु लोव़ पाइनुङ। मिनु गो इ आगामी बाक्शो सोक्त रे लाइश्शा, मेको आन तारी वोइक्नुङ। मिनु मेकोपुकीमी गे नु गारशा, मेको मुर आन श्येत कुरनीम। मिनु गे का ला कुरचा ममाल्नेवे।
18 मिनु गे मुर आन कली ‘गे दीसा कली ग्रांग्रा मदिशो दुम्शा, ठीक दुमीन। गेपुकीमी श्ये ब्वचा ताइनीनी। मारदे हना गेपुकीमी परमप्रभु यावे आ ङोंइती श्ये ब्वचा तक हना, रिम्शो दुम वा, दे ङाक्शो बाक्तीनी। आंइ कली एको रागी क्येङा इजीप्तमी रिम्शो बाक्त’ देंतीनी। मोपतीके परमप्रभु यावेमी इन कली श्ये ब्वचा गेब। मिनु गे मेको ब्वाइनीनी। प्रस्थान १९:१० 19 मिनु नाक्त का, नाक्त निक्शी ५ नाक्ती, १० नाक्ती नु २० नाक्त ला ममाइ, 20 गेपुकीमी ब्रीचा ङा पा महिना का सम्म श्ये ब्वचा ताइनीनी। मारदे हना गेपुकीम आंम इन दातेम बाक्शो परमप्रभु यावे कली मटिनी। मिनु गे मेको आ ङोंइती ‘गो मारदे इजीप्त रे ग्रूशा गाक्का?’ दे ङाक्तीनी” देंत।
21 मिनु मोसामी “गो नु लां गाक्ब मुर ६ लाख बाक्नीम। मो हना यो, गे ‘मेको आन कली महिना का सम्म श्ये ब्वचा गेनुङमी’ देंतीनी। 22 मार, बी ब्यफ, क्यारश भेडा नेल्ल क्योरशा हना यो, एको इश ङा मुर आन कली गाप्बा ङा? समुन्द्र ङा ङांइ नेल्ल रेश्शा हना यो, नेल्ल आन कली गाप्बा ङा?” देंत।
23 मिनु परमप्रभु यावेमी मोसा कली “मार, आं सक्ति ग्युम्शो बाक्बा ङा? आं देंशो लोव़ गाप्बाक्म कों मगाप्बाक्मे, तुइक्नेवे” देंत। यसैया ५०:२; यसैया ५९:१
24 मोपतीके मोसा लाङगा ग्रूशा, मुर नेल्ल आन कली परमप्रभु यावे आ देंशो लोव़ नेंपाइक्तीमी। मिनु मेको मुर आन दाते ङा ७० जना खाल्पा आन कली ताम्बु आ एर ओंथ राप्पाइक्मी। 25 मिनु नोले परमप्रभु यावे गोस्सुमी उइ आगा तोइश्शा, मोसा नु लोव़ पाप्तु। मिनु मेकोमी मोसा आ आगा बाक्शो सोक्त इच्का लाइश्शा, मेको ७० जना खाल्पा आन तार वोइक्तु। मिनु मेको सोक्त मेको आन तार नांइसेनु, मेकोपुकीमी परमप्रभु यावे आ लोव़ पाम्तेक्म। तन्न नोनोले मो मपाम।
26 मिनु ७० जना खाल्पा आन दातेमी एल्दाद नु मेदाद माइश्शो मुर निक्शी बाक्ताक्स। मेको आस नें यो ब्रेक्शो बाक्त। तन्न मेको निक्शी ग्रुम्तीक ताम्बुम मलसा बाक्त। मिनु परमप्रभु यावे आ सोक्त मेको आस तार यो नांइसे बाक्त। मिनु मेको निक्शीमी मुर आन बाक्तीकेमी परमप्रभु यावे आ लोव़ पाम्से बाक्त। 27 मिनु वोंइश मुर का दोरशा जाक्शा, मोसा कली “एल्दाद नु मेदादमी मुर आन बाक्तीकेमी परमप्रभु यावे आ लोव़ पाम्ताक्स” देंत।
28 मिनु नून आ तौ यहोसु मोसा कली वारच पाइब बाक्त। मेको मोसा आ योव़शो मुरुमी मोसा कली “हजुर, आं होव़प मेको आस कली तेक्कीन” देंत। गन्ती १३:१६; प्रस्थान २४:१३
29 तन्न मोसामी मेको कली “मार, आं पर्बम गे ईख पाइब दुमे? परमप्रभु यावेमी आ सोक्त आ मुर नेल्ल आन तार वोइश्शा, मेको नेल्ल परमप्रभु यावे आ लोव़ पाइब दुम हना, गिश रिम्शो दुम वा” देंत। योएल ३:१; मर्कूस ९:३८-३९ 30 मिनु मोसा नु इस्राएली खाल्पा मुर आन बाक्तीके लेत्तेक्म।
इस्राएलीपुकीमी बटटाइ ब्वशो
31 मिनु नोले परमप्रभु यावेमी फश पपाइक्तु। मिनु मेको फशेमी समुन्द्र रे बटटाइपुकी चाक्तु। मिनु मुर आन बाक्तीक आ एर ओंथ नेल्ल नाइक्पाइक्तु। काबु ङा नाक्त ङा लां सम्म कुबीत निक्निक्शी थांइशो पा नांइसाक्म। कुबीत का ०.५ मिटर खोदेंशो बाक्ब।प्रस्थान १६:१३ 32 मिनु मुरपुकीमी मेको नाक्त रे, नाक्दो रे नु आ दीसा नाक्त सम्म मेको ग्याइक्ताक्म। नेल्ल क्येङा इच्का खोइ ग्याइक्बमी यो १० होमेर ग्याइक्ताक्मे। मिनु मेकोपुकीम आन बाक्तीक एर ओंथ नेल्ल सोव़पाइक्तेक्म। होमेर का २२० लिटर रिक्ब पुक्तीके का बाक्ब। 33 तन्न मेकोपुकीमी श्ये ब्वना ब्वन परमप्रभु यावे मेको आन पर्बम शुश गाइक्ताक्व। मिनु परमप्रभु यावेमी मेको आन कली थम ठेयब बेक्तीक रोइ पपाइक्तीमी। 34 मोपतीके मेको बाक्तीके आ नें किब्रोथ-हत्तावा वोइक्तेक्म। मारदे हना मेकेर शुश वाल्ब मुर आन कली थिम्तेक्म।
35 मिनु मुरपुकी किब्रोथ-हत्तावा रे पा गाक्शा, हसेरोथ गे लाम्तेक्म।