8
बत्ती दातीक वोइश्शो
1 मिनु परमप्रभु यावेमी मोसा कली 2 “गे हारून कली ‘गे मेको बत्ती वोदीनु, मेको ७ ओटा बत्ती दातीक आ ङोंइती गे ब्रपतो’ देनो” देंत।
3 मिनु हारूनमी मो पाप्तु। परमप्रभु यावेमी मोसा कली अरेशो खोदेंशो पा दातीक आ ङोंइती गे ब्रपाइक्तु। प्रस्थान २५:९, ३१-४० 4 मिनु बत्ती दातीके दोपा सेल्शो बाक्त देंशा हना, मेको सुन के तुप्शा सेल्शो बाक्त। मेको उइ रे इर सम्म तुप्शा सेल्शो बाक्त। मिनु परमप्रभु यावेमी मोसा कली कोंइशो खोदेंशो पा, हारूनमी मेको बत्ती दातीक सेल्तु।
लेवी आ मुर परमप्रभु के दुम्शो
5 परमप्रभु यावेमी मोसा कली 6 “इस्राएली आन दाते रे लेवी आन कली चाक्शा, मेको आन कली चोव़खो सेल्मी। 7 मेको आन कली मार पचा माल्नेवे देंशा हना, मेको आन तारी चोव़खो सेल्तीक ब्वाक्कु ब्रुइक्तीमी। मिनु मेकोपुकीमी आन रां ङा चां नेल्ल प्रेक्शा, आन वा मुरशा, चिक्सीशा ग्रांग्रा मदिशो सेल्सीचा माल्नीम। गन्ती १९:९,१७; लेवी १४:८ 8 मिनु नोले मेकोपुकीमी ब्यफ का नु तेलम निशो रिम्शो फस अन्न चढ़ेतीके चाक्चा माल्नीम। गे चहिं पाप आ पर्बम चढ़ेचा कली ब्यफ का चाक्को। 9 मिनु गे लेवी आन कली ग्रुम्तीक ताम्बु आ ङोंइती चाक्शा, इस्राएली नेल्ल आन कली ग्रुम्पाइक्मी। 10 मिनु गे लेवी आन कली परमप्रभु यावे आ ङोंइती चाक्गीनु, इस्राएली नेल्लेमी आन गुइ लेवी आन तार वोइक्चा माल्नीम। 11 मिनु हारूनमी लेवी आ मुर आन कली परमप्रभु यावे आ गेय पचा कली मेको आ ङोंइती क्युक्शा चढ़ेशो खोदेंशो पा वोइक्चा माल्ब। प्रस्थान २९:२४
12 मिनु लेवी आ मुरपुकीमी आन गुइ मेको ब्यफ आस पिया तार वोइक्चा माल्नीम। मिनु हारूनमी लेवी आ मुर आन पर्बम पाप क्याम्तीक गेय पचा कली ब्यफ का पाप आ पर्बम चढ़ेतीके नु अर्को चोशा चढ़ेतीके परमप्रभु यावे कली चढ़ेचा माल्ब। 13 मिनु मेको नोले गे लेवी आ मुर आन कली हारून नु आ तौ आन ङोंइती राप्पा, परमप्रभु यावे कली क्युक्शा चढ़ेतीक खोदेंशो पा वोइक्चा माल्नेवे।
14 मोपा गे लेवी आ मुर आन कली अरु इस्राएली रे तिल्चा माल्नेवे। मिनु लेवी आ मुर आं के दुम्नीम। गन्ती ३:४५
15 मिनु गे लेवी आ मुर आन कली ग्रांग्रा मदिशो सेल्शा, मेको आन कली क्युक्शा चढ़ेतीक खोदेंशो पा वोइक्मी नोले मेकोपुकीमी ग्रुम्तीक ताम्बुमी गेय पने चाप्नीम। 16 मिनु मेकोपुकी इस्राएली आन दाते रे थमा पा आं कली तिल्शो बाक्नीम। गो मेको आन कली इस्राएली आन नेल्ल क्येङा ङोंइती जरमेशो तौ आन पा ङा आं कली वोइक्तामी। गन्ती ३:१२-१३ 17 मिनु इस्राएली आन दातेम मुर बाक्तेक्म हना यो, बी ब्यफ, क्यारश भेडा बाक्तेक्म हना यो, ङोंइती जरमेशो नेल्ल आं के बाक्नीम। इजीप्ती आन नेल्ल क्येङा ङोंइती जरमेशो तौ नेल्ल आन कली सदुमी नाक्त रे गो मेको आन कली आं कली तिल्शा वोंइसाक्यी। प्रस्थान १३:२ 18 मिनु इस्राएली आन ङोंइती जरमेशो आन पा ङा गो लेवी आ मुर तिल्शा वोंइसाक्यी। 19 मिनु गो इस्राएली आन दाते रे लेवी आ मुर आन कली हारून नु आ तौ आन कली गेतामी। मार कली गेतामी देंशा हना, इस्राएली आन पर्बम ग्रुम्तीक ताम्बुमी गेय पचा कली इस्राएली आन पर्बम पाप क्याम्तीक गेय पचा कली नु इस्राएलीपुकी ग्रुम्तीक ताम्बु आ नेक्था मजाक्मल नु मुर बेक्तीक रोइम मबेक्म, दे गेतामी” दे परमप्रभु यावेमी मोसा कली देंत। गन्ती ३:९; गन्ती १:५३
20 मिनु मोसा, हारून नु इस्राएल ङा मुर नेल्लेमी लेवी आ मुर आन पर्बम परमप्रभु यावेमी मोसा कली अरेशो खोदेंशो पा पाम्तेक्म। 21 मिनु लेवी आ मुरपुकीमी आंम आन पाप रे ग्रांग्रा मदिशो सेल्सीशा आन वा मुरतेक्म। मिनु नोले हारूनमी मेको आन कली क्युक्शा चढ़ेतीक खोदेंशो पा परमप्रभु यावे आ ङोंइती वोइक्तीमी। मिनु हारूनमी मेको आन कली पाप क्याम्तीक गेय पा ग्रांग्रा मदिशो सेल्तीमी। 22 मिनु मेको नोले लेवी आ मुरपुकीमी हारून नु आ तौ आन कली वारच पा ग्रुम्तीक ताम्बु ङा गेय पाम्तेक्म। मिनु परमप्रभु यावेमी मोसा कली लेवी आ मुर आन पर्बम अरेशो खोदेंशो पा मेकोपुकीमी पाम्तेक्म। 23 मिनु परमप्रभु यावेमी मोसा कली 24 “एको लोव़ २५ बर्स गाप्शो नु मेको क्येङा लाक्शो लेवी आ मुर आन पर्बम बाक्ब। मिनु मेकोपुकी ग्रुम्तीक ताम्बुमी गेय पचा गोचा माल्नीम। गन्ती ४:३,२३,३०,४७; १इतिहास २३:३,२४ 25 मिनु मेकोपुकी ५० बर्स लाक्गमेनु, गेय पचा प्रोन्मेक्ल। 26 मिनु मेकोपुकी ग्रुम्तीक ताम्बुमी गेय पाइब आन लोक्ब आन कली वारच पदमेक्ल। तन्न आंमा चहिं गेय मपामेक्ल। गे लेवी आ मुर आन कली मोदेंशो पा गेय पपाइक्चा माल्नेवे” देंत।