1 मिनु लेंशा परमप्रभु यावेमी मोसा कली 2 “सुइ मुरुमी परमप्रभु यावे कली मटिथु, मेको आ ङोंइती आ नेक्‍था ङा मुर नु जाकटी वोइश्‍शो थोव़क आ पर्बम जोल पाप्‍तु हना, सुइम गेनुङ, दे कबल पा यो मगेप्‍तु हना, कि मेको थोव़क रोइक्‍ताक्व हना, कि जोल पा आ नेक्‍था ङा मुर आ मारेइ थोव़क आंम के सेल्‍तु हना, गन्‍ती ५:६-८ 3 आ नेक्‍था ङा मुर आन मार मार रोइक्‍ताक्‍व हना, जाम्‍शो थोव़क थिश्‍शा यो, मथिदु, दे जोल पाप्‍तु हना, जोल पा कसम जाप्‍तु हना, मेकोमी पाप पशो बाक्‍ब। 4 मेको मोपा पाप पा दोस ताइब दुम्‍ब। मिनु मेकोमी आ रोइश्‍शो, आ खुइ पशो, आ ताक्‍शो थोव़क मलेत्‍ताक्‍व हना, आ थिश्‍शो आ पर्बम जोल पाप्‍तु हना, इजीकीएल ३३:१५ 5 तेको थोव़क आ पर्बम जोल पा कसम जशो बाक्‍मे, मेकोमी मेको थोव़क नेल्‍लेमी ५ भाग तेम्‍शा, आ होव़प कली लेश्‍शा गेचा माल्‍ब। मेकोमी दोस आ पर्बम चढ़ेतीक नाक्‍ती मेको सु के बाक्‍मे मेको आ नेक्‍था ङा मुर कली लेश्‍शा गेचा माल्‍ब। 6 मिनु मेकोमी परमप्रभु यावे आ ङोंइती ठीक पा हिक्‍शो क्‍येट कि आ बगाल रे मारेइ मदुम्‍शो थम रिम्‍शो सांड का आ मरिम्‍शो पशो आ पर्बम चढ़ेब आ नेक्‍था परमप्रभु यावे आ बाक्‍तीकेमी चढ़ेचा कली चाक्‍चा माल्‍ब। 7 मिनु मेको चढ़ेबमी मेको आ पर्बम परमप्रभु यावे आ ङोंइती पाप क्‍याम्‍तीक गेय पचा माल्‍ब। मिनु मेकोमी मार आ पर्बम दोस तशो बाक्‍मे, मेकोम माफ ताइब” देंत।

8 मिनु परमप्रभु यावेमी मोसा कली 9 “गे हारून नु आ तौ आन कली चोशा चढ़ेचा आ पर्बम अरेमी। मेको चोशा चढ़ेतीक नाक्‍दो रे सुनी सम्‍म चढ़ेतीके शी तार बाक्‍चा माल्‍ब। मिनु चढ़ेतीक ङा मी यो ब्रस ङा ब्रस बाक्‍चा माल्‍ब। 10 मिनु चढ़ेबमी आ सुती के आगा फेक्‍तीक वा नु सुती के फेक्‍तीके फेक्‍चा माल्‍ब। मिनु मेकोमी मीम दाक्‍शो चोशा चढ़ेशो आ पुलु हुइश्‍शा चढ़ेतीक आ नेक्‍था वोइक्‍चा माल्‍ब। प्रस्‍थान २८:४२ 11 मिनु नोले मेकोमी आ फेक्‍शो वा प्रुइश्‍शा, अर्को वा फेक्‍शा, मेको पुलु ताम्‍बु रे ग्रुंइशा चोव़खो पुलु ताइक्‍तीकेमी लाइश्‍शा ताइक्‍चा माल्‍ब। 12 चढ़ेतीक ङा मी चहिं ब्रस ङा ब्रस बाक्‍चा माल्‍ब। मेको काप्‍चा मदुम्‍ब। मिनु सुनी कुस कुस चढ़ेबमी मेकेर शी तेम्‍चा माल्‍ब। मिनु चोशा चढ़ेतीके मीम दुशा बाक्‍तीक आ पर्बम चढ़ेशो आ बोंसो चोचा माल्‍ब। 13 चढ़ेतीक ङा मी ब्रस ङा ब्रस बाक्‍चा माल्‍ब। मेको गेनायो काप्‍चा मदुम्‍ब।

14 एको अन्‍न चढ़ेतीक आ पर्बम अरेशो लोव़ बाक्‍ब। हारून आ तौपुकीमी परमप्रभु यावे आ ङोंइती चढ़ेतीक आ नेक्‍था चाक्‍चा माल्‍नीम। 15 मिनु मेकोपुकीम अन्‍न चढ़ेतीके, तेल नु धूप आ तार वोइश्‍शो रिम्‍शो फस रे मुठी का लाइश्‍शा, मिम्‍चा कली परमप्रभु यावे कली आ दाक्‍शो ब्रोव़शो रिना पाइश्‍शो चढ़ेतीकेमी चोचा माल्‍नीम। 16 मिनु लीशो हारून नु आ तौपुकीम जचा माल्‍नीम। तन्‍न मेको चोव़खो बाक्‍तीकेमी बोरब ओख्‍ती मसुप्‍थु, चोशा जचा माल्‍नीम। मेकोपुकीमी ग्रुम्‍तीक ताम्‍बु आ लाङगाम बाक्‍शा, जचा माल्‍नीम। 17 मेकेर बोरब ओख्‍ती सुप्‍शा शोब्‍ले चोचा मदुम्‍ब। आं कली मीम चोशा चढ़ेशो रे मेको आन कली आं गेशो भाग बाक्‍ब। मेको पाप आ पर्बम चढ़ेतीके नु गारपाइक्‍चा आ पर्बम चढ़ेतीके खोदेंशो मेको थम चोव़खो बाक्‍ब। 18 हारून आ खिं ङा वोंइश मुर नेल्‍लेमी गेना हना यो परमप्रभु यावे कली मीम चोशा चढ़ेशो रे जचा माल्‍नीम। परमप्रभु यावे कली मीम चोशा चढ़ेशो रे मेको आ खिं ङा मुर नेल्‍ल आन कली गेशो आन भाग बाक्‍ब। मेको थीब नेल्‍ल चोव़खो दुम्‍नीम” देंत।

19 मिनु परमप्रभु यावेमी लेंशा मोसा कली 20 “हारून नु आ तौपुकीम तेल लुक्‍चा पुंइसे नाक्‍ती परमप्रभु यावे कली मार नु दोपा चढ़ेचा माल्‍नीम देंशा हना, एफाह का ङा १० भाग थम रिम्‍शो फस नाक्‍दो आधा नु सुनी आधा गेना हना यो चढ़ेचा माल्‍नीम। एफाह पुक्‍तीके का बाक्‍ब। एफाह का २२ लिटर रिक्‍ब। मेको ङा १० भाग २ लिटर नु इच्‍का खोइ ४ माना खोदेंशो बाक्‍ब।लेवी ७:३७; प्रस्‍थान २९:- 21 मेको शोब्‍ले तेलम चोचा माल्‍ब। गे मेको कली शुश तेलम चोशा, अन्‍न चढ़ेतीके टुक्रा टुक्रा पा परमप्रभु यावे कली आ दाक्‍शो ब्रोव़शो रिना पाइश्‍शो चढ़ेतीके चढ़ेचा माल्‍नीम। 22 मोपा हारून आ नोले आ तेल लुक्‍शो तौमी मोदेंशो पचा माल्‍ब। मेको गेना हना यो परमप्रभु यावे केन बाक्‍ब। मिनु मेको नेल्‍ल चोचा माल्‍ब। 23 मिनु चढ़ेब आन अन्‍न चढ़ेतीक नेल्‍ल चोचा माल्‍नीम। मेको जचा मदुम्‍ब” देंत।

24 मिनु परमप्रभु यावेमी मोसा कली 25 “गे हारून नु आ तौ आन कली मार देंचा माल्‍नेवे देंशा हना ‘पाप क्‍याम्‍चा कली चढ़ेतीक आ पर्बम अरेशो बाक्‍ब। पाप क्‍याम्‍चा कली चढ़ेतीक परमप्रभु यावे आ ङोंइती चोशा चढ़ेतीक कली साइक्‍तीकेमी साइक्‍चा माल्‍ब। मेको थम चोव़खो बाक्‍ब। लेवी ४:- 26 मेको पाप क्‍याम्‍चा कली चढ़ेशो चढ़ेबमी मेको रे ब्‍वचा माल्‍ब। मेकोपुकीमी ग्रुम्‍तीक ताम्‍बु ङा लाङगाम बाक्‍शा, ब्‍वचा माल्‍नीम। 27 मेको श्‍ये मारम थीबा, मेको यो चोव़खो दुम्‍ब। मेको आ हुश वाम प्रेक्‍ताक्‍व हना, गेपुकीम मेको वा चोव़खो बाक्‍तीकेमी मुरचा माल्‍नीनी। 28 मेको श्‍ये तेको खप के ग्‍योंबुम लोप्‍नीमी, मेको ग्‍योंब प्रोल्‍शा ताइक्‍चा माल्‍नीम। मेको कांसा के ग्‍योंबुम लोप्‍शो बाक्‍त हना, मेको सिक्‍स ब्‍वाक्‍कुम शेक्‍चा माल्‍नीम। 29 मेको चढ़ेब आन दाते ङा वोंइश मुर नेल्‍लेमी मेको ब्‍वचा माल्‍नीम। मेको थम चोव़खो बाक्‍ब। 30 तन्‍न तेको पाप क्‍याम्‍चा कली चढ़ेतीके आ हुश पाप क्‍याम्‍तीक गेय पचा कली ग्रुम्‍तीक ताम्‍बु आ आगाम चाक्‍नीमी, मेको ब्‍वचा मदुम्‍ब। मेको चोचा माल्‍नीम।