1 मिनु अय्‍युबमी 2 “आं सुर्ता नाक्ने चाप्‍शो हना नु आ शुश हिंचा ङा श्‍येत नाक्‍शो हना, 3 मेको समुन्‍द्र ङा बाल्‍वा आन क्‍येङा यो शुश हेल्‍शो दुम वा। मोपतीके आं लोव़ रिम्‍शो मबा‍क्‍म कों। 4 नेल्‍ल क्‍येङा ठेयब सक्ति पाइश्‍शो आ ब्राम आं कली ग्रुक्‍शो बाक्‍नीम। आं सोक्‍तीम मेको आन बीख तूचा माल्‍ब। परमप्रभुमी आं कली हिंपाइश्‍शो बाक्‍ब। भजन संग्रह ३८:३ 5 ब्‍वाकी ङा गधा घांस ब्‍ववानु, ग्रीबा ङा? ब्‍यफ आ खोले जवानु, ग्रीबा ङा? 6 मब्रोव़शो जचा थोव़क हिक्‍सी मसुप्‍थु जने चाम्‍सीबा? मार ब्‍वोफु आ बुश ब्रोव़शो बाक्‍बा ङा? 7 गो मेको जचा मदाक्‍नुङ। आं कली काइ मब्रोव़ब।

8 गो आं पुंइशो तङ हना, परमप्रभुम आं माल्‍शो गेशो हना, 9 आं कली खतम सेल वा। परमप्रभुमी आं कली साइय्‍यी वा। 10 मेको मोदेंशो दुम्‍शो हना, आं थुं नांइस वा। मिनु शुश खाइश्‍शा यो ग्‍येरसीङ वा। मारदे हना गो का ला परमप्रभु आ लोव़ मलाक्‍शो बाक्‍नुङ। 11 गो आं रिम्‍शा बाक्‍‍तीक सक्ति बाक्‍बा ङा? गो दोपा बेक्‍नुङा। गो रिम्‍शा बाक्‍ने चाप्‍नुङा ङा? 12 आं सक्ति फुल्‍लु खोदेंशो बाक्‍बा ङा? आं श्‍ये कांसा के बाक्‍बा ङा? 13 थमा पा, गो आंम कली तिक्‍शा वोइक्‍ने मचाप्‍नुङ। आं सक्ति नेल्‍ल लत।

14 सुमी आन वारच कली शिशी मपाइनीमी, मेकोम नेल्‍ल क्‍येङा सक्ति पाइश्‍शो कली मान पा हिंचा थुम्‍शो बाक्‍नीम। 15 आं लोक्‍बपुकी बारशा यीब खोला खोदेंशो बाक्‍नीम। सोव़शो खोला खोदेंशो बाक्‍नीम। भजन संग्रह ३८:१२ 16 आन ब्‍वाक्‍कु मरिम्‍शो दुम्‍शा, फुं यशो खोदेंशो पा जाम्‍ब। 17 मिनु नाप्‍शोमी मेको आ शाइक्‍तीक रे जाम्‍ब। 18 मिनु लां गाक्‍ब आन लां रे हिरना हिरन गाक्‍नीम। मिनु मेकोपुकी मुर मबाक्‍तीकेम गाक्‍शा, बेक्‍नीम। 19 तेमा ङा लां गाक्‍बपुकीम तूचा कली मेको खोला ङा ब्‍वाक्‍कु माल्‍तेक्‍म। साबा ङा ग्‍याप्‍ब लेयबपुकीम मेको ब्‍वाक्‍कु तूचा कली आस पाम्‍तेक्‍म। अय्‍युब १:१५ 20 मेको आन आस सोव़शो खोला तशा बेक्‍त। मेकेर जाक्‍दीश्‍शा आन थुं बेक्‍त। 21 मुल गे आं कली मोदेंशो दुम्‍तीनी। गे आं खतम दुम्‍तीके तशा हिनीनी। 22 गो इन कली ‘आं कली कोसेली चाक्‍कीन’ देंङा ङा? गो इन कली ‘इन शोंप गेयीनी’ देंङा ङा? 23 मिनु ‘आं कली आं जोरी सत्रु आन गुइ रे प्रोंइ‍‍यीनी’ देंङा ङा? ‘आं कली दिप्‍ब आन गुइ रे प्रोंइ‍यीनी’ दे गो इन कली गेनायो मदेंङ।

24 आं कली शेंदीनी। मिनु गो सिक्‍सी पा नेंनुङ। गो मार दूली पङा, आं कली रुप्‍पतीन। 25 थमा लोव़ बोल्‍यो बाक्‍नीमी। तन्‍न इन देंशो लोव़ मार रिम्‍शो बाक्‍बा ङा? 26 गे आं लोव़ रिम्‍शो सेल्चा माल्‍नीनी? गे थुं लुक्‍च लशो मुर आ लोव़ फश बाक्‍ब, दे मिम्‍नीनी? 27 गेपुकीमी रोम रोइक्‍च आन पर्बम फेन्‍टे आप्‍नीनी। मिनु इन वारच आन पर्बम मार मार फाइक्‍नीनी।

28 मुल आं कली कोव़ङीन। गो इन कली जोल मपाइनुङ। 29 गे खिं ले‍तीन। मिनु आं पर्बम अरु मरिम्‍शो मपने। लेतीन। मारदे हना गो ठीक पाइब बाक्‍नुङ। 30 मार, आं लोव़म मारेइ जोल बाक्‍बा? मार, आं लोव़म रिम्‍शो नु मरिम्‍शो तिल्‍ने मचाप्‍बा ङा?” दे अय्‍युबमी आ वारच कली लोव़ लेत्‍ता बाक्‍त।