1 मिनु परमप्रभु यावेमी मोसा कली “फाराओ आ बाक्‍तीके लावो। मिनु गे परमप्रभु यावे, हिब्रू मुर आन परमप्रभुमी इन कली ‘आं मुर आं कली चढ़ेथ लचा गेवो। प्रस्‍थान ५:१ 2 नेनो, गे मेको आन कली लचा मगेथु, तेक्‍तीवी हना, यसैया १:२० 3 परमप्रभु यावेमी इन गोठम बाक्‍शो बस्‍तु भाव आन कली ठेयब रोइ पपाइक्‍ब। इन शारा, गधा, दलओंठ, बी ब्‍यफ नु क्‍यारश भेडा नेल्‍ल आन कली बेक्‍तीक रोइ पपाइक्‍ब। प्रस्‍थान ३:२० 4 तन्‍न इस्राएली आन बस्‍तु भाव आन कली रोइ मपपाइक्‍ब। इजीप्‍त ङा मुर आन बस्‍तु भाव आन कली चहिं रोइ पपाइक्‍ब। इस्राएली आन बस्‍तु भाव मबेक्‍नीम’ दे फाराओ कली माइक्‍चा माल्‍नेवे” दे परमप्रभु यावेमी मोसा कली दें‍त। प्रस्‍थान ८:१८ 5 मिनु परमप्रभु यावेमी “गो दीसा इजीप्‍त रागीम मो पाइनुङ” दें‍त। 6 मिनु आ दीसा परमप्रभु यावेमी आ देंशो पाप्‍तु। इजीप्‍त रागी ङा मुर आन बस्‍तु भाव बेक्‍मा बाक्‍त। तन्‍न इस्राएली आन बस्‍तु भाव चहिं मबेक्‍म। 7 मिनु फाराओमी इस्राएल ङा मुर आन बस्‍तु भाव यो बेक्‍मा कों, दे कोव़थ मुर सोइक्‍ताक्‍व। तन्‍न का यो मबेक्‍शो बाक्‍तेक्‍म, दे तुइक्‍पाइक्‍तेक्‍म। मोपा यो फाराओ काइ मटीब दुम्‍शा, इस्राएली आन कली लचा मगेव। प्रस्‍थान ४:२१

8 मिनु नोले परमप्रभु यावेमी मोसा नु हारून आस कली “गे चुप्‍लु ङा पुलु हुइश्‍शा कुरशा लस। मिनु मोसामी फाराओ आ ङोंइती मेको पुलु सरीङ गे फ्रचा माल्‍ब। 9 मेको पुलु फुरक दुम्‍शा, मुर नु बस्‍तु भाव आन कली मरिम्‍शो गार मुपाइक्‍ब। इजीप्‍त रागी नेल्‍लेमी मोदेंशो दुम्‍ब” देंत। ब्‍यवस्‍था २८:२७ 10 मिनु मोसा नु हारूनमी चुप्‍लु ङा पुलु हुइश्‍शा कुरशा, फाराओ आ ङोंइती राप्‍ताक्‍स। मिनु मोसामी मेको पुलु सरीङ गे फ्राप्‍तु। मिनु मुर नु बस्‍तु भाव नेल्‍ल शुश गार मुतेक्‍म। प्रकाश १६:२ 11 मिनु इजीप्‍त रागी ङा जादू पाइबपुकी यो शुश गार मुशा, रोइ पशा, मोसा आ नेक्‍था बाक्‍ने मचबेम। 12 परमप्रभु यावेमी फाराओ कली काइ मटीब दुम्‍पदा बाक्‍त। मिनु मोसा नु हारून आस लोव़ मटिव। परमप्रभु यावेमी मोसा कली ङोंइती दोदेंशो देंमे मोदेंशो दुम्‍त। प्रस्‍थान ४:२१

13 मिनु परमप्रभु यावेमी मोसा कली “सुनी कना बोक्‍शा, फाराओ कली ग्रुम्‍थ लशा, परमप्रभु यावे, हिब्रू मुर आन परमप्रभुमी इन कली ‘आं मुर आन कली आं कली चढ़ेथ लचा गेवो। प्रस्‍थान ५:१ 14 मारदे हना मुल रे गेचशो श्‍येतम इ कली, इ गेय पाइब आन कली नु इ मुर नेल्‍ल आन कली सोइक्‍नुङ। रागी रागीमी आं खोदेंशो सुइ मबाक्‍ब, दे इ कली तुइक्‍पाइक्‍नुङ। प्रस्‍थान ८:६ 15 मुल गो इ कली नु इ मुर आन कली बेक्‍तीक रोइ पपदु वा। 16 तन्‍न गो आं सक्ति रागी नेल्‍लेम तुइक्‍पाइक्‍चा कली इ कली मुल सम्‍म ब्रोंइचा गेता। आ नें रागी नेल्‍ल ङा मुर आन कली तुइक्‍पाइक्‍चा, दे इ कली ब्रोंइचा गेता। प्रस्‍थान १४:४; रोमी ९:१७ 17 गे आं मुर आन कली लचा मगेतीके, इ ठेयब लेश्‍शो तुइक्‍ताक्‍ङ। 18 नेनो, दीसा गो शुश मरिम्‍शो मुप्‍स यिपाइक्‍नुङ। मुल सम्‍म इजीप्‍त रागीमी मुर बाक्‍चा गोव़मे रे मोदेंशो ठेयब मुप्‍स गेनायो मयिशो बाक्‍ब। 19 मोपतीके इ बस्‍तु भाव आन कली खिं आगा ओंइदो। मारदे हना मुर नु बस्‍तु भाव, सु सु लाङगाम बाक्‍नीमी, मेको मुप्‍सीम तुप्‍शा बेक्‍नीम’ देनो देंत” दे परमप्रभु यावेमी मोसा कली देंपाइक्‍तु।

20 फाराओ आ गेय पाइब आन दातेमी सु सु परमप्रभु यावे क्‍येङा हिंमा, मेकोपुकीमी आन गेय पाइब नु आन बी ब्‍यफ, क्‍यारश भेडा आन कली खिं आगा ओंइताक्‍म। 21 सु सु परमप्रभु यावे आ देंशो लोव़ क्‍येङा महिंमा, मेकोपुकीमी चहिं आन गेय पाइब नु आन बस्‍तु भाव आन कली खिं आगा मओंइदेम।

22 मिनु नोले परमप्रभु यावेमी मोसा कली “इ गुइ सरीङ गे दिंदो। मो पवीनु, इजीप्‍त रागी नेल्‍लेमी मुप्‍स यीब। मुप्‍स यिशा, मुर बी ब्‍यफ, क्‍यारश भेडा नु रू आन तारी देल्‍ब” दे परमप्रभु यावेमी मोसा कली देंत। 23 मिनु मोसामी आ कोक्‍के सरीङ गे दिंदानु, बुंबु चिला पा, मुप्‍स यि‍त। मोपा परमप्रभु यावेमी इजीप्‍त रागीमी मुप्‍स यिपाइक्‍‍तु। मिनु परमप्रभु यावेमी चिला दाप्‍पाइश्‍शा, मुप्‍स यिपाइक्‍तु। प्रकाश १६:२१ 24 चिला पना पन मुप्‍स यि‍त। मेको मुप्‍स थम कोल्‍कोल्‍शो बाक्‍तेक्‍म। इजीप्‍त रागीम मुर बाक्‍चा गोव़मे रे मोमो कोल्‍शो मुप्‍स गेनायो मतशो बाक्‍तेक्‍म। 25 मिनु इजीप्‍त रागी ङा रूम वाशो मारेइ मारेइ मुप्‍सीमी श्‍येत्‍थ पोक्‍तु। मुर नु बी ब्‍यफ, क्‍यारश भेडा आन कली साइक्‍तु। रूम मार मार ख्रुम्‍शो बाक्‍मे, मेको नेल्‍ल साइश्‍शा, रवा आन कली यो जिक्‍तु। 26 इस्राएली आन बाक्‍तीके गोशेनमी ला मुप्‍स मयी। प्रस्‍थान ९:४; प्रस्‍थान ८:१८

27 मिनु फाराओमी मोसा नु हारून आस कली ब्रेत्‍ताक्‍मसी। मिनु मेको आस कली “मुल गो पाप पाता। परमप्रभु यावे ठीक पाइब बाक्‍ब। गो नु आं मुरपुकीम मरिम्‍शो पाइतक। 28 आंइ पर्बम परमप्रभु यावे कली पुनीस। एको बुंबु नु मुप्‍स मयिपदल। गो इन कली लचा गेनुङ। मुल गे एकेर बाक्‍चा ममाल्‍नीनी” देंत। प्रस्‍थान ८:४ 29 मिनु मोसामी “गो सहर रे लशा, इन पर्बम आं गुइ पोक्‍शा, परमप्रभु यावे कली पुंइनुङ। नोले बुंबु पचा नु मुप्‍स यिचा नाइक्‍ब। मिनु गे रागी नेल्‍ल परमप्रभु यावे केन बाक्‍ब, दे तुइक्‍नीनी। प्रस्‍थान ७:५ 30 तन्‍न गे नु इन दरवार ङा गेय पाइबपुकी मुल सम्‍म परमप्रभु, परमप्रभु यावे कली महिंशो बाक्‍नीनी, दे तुइक्‍ताक्‍ङ” दे फाराओ कली देंत। 31 मेको मुप्‍सीमी मार पाप्‍तु देंशा हना, सनपाट नु क्‍योव़ज नेल्‍ल खतम सेल्‍तु। मारदे हना क्‍योव़ज बाला दुम्‍ने थुम्‍शो नु सनपाट बोइक्‍ने थुम्‍शो बाक्‍त। 32 तन्‍न चेरब नु अर्को अन्‍न चहिं नोले ला मीबाक्‍तेक्‍म। मोपतीके मसद। 33 मोदेंशो दुम्‍शा मोसामी फाराओ आ बाक्‍तीके रे लशा, आ गुइ परमप्रभु यावे गे पोक्‍शा, फाराओ आ पर्बम पुंइतु। मिनु बुंबु पा, मुप्‍स नु रेउ यिचा नाइक्‍ताक्‍व। 34 मिनु फाराओ नु आ गेय पाइबपुकीमी रेउ, मुप्‍स यिचा नु बुंबु पचा नाइश्‍शो तशा, लेंशा पाप पाम्‍तेक्‍म। मोपा मटीम। 35 फाराओ काइ मटीब दुम्‍शा, इस्राएली आन कली लचा मगेव। परमप्रभु यावेमी मोसा कली देंशो खोदेंशो दुम्‍‍त। प्रस्‍थान ४:२१