1 सिजरिया सहरमी कोरनेलीयस नें पाइश्‍शो इटाली पल्‍टन ङा कप्‍तान का बाक्‍माक्‍त। 2 मेको कप्‍तान परमप्रभु यावे कली मान पा हिंब मुर बाक्‍माक्‍त। आ खिं ङा मुर नेल्‍लेमी यो आ खोदेंशो पा प्रभु कली मान पा टीबाक्‍मा बाक्‍त। मेको कप्‍तानमी मारेइ मथीब आन कली शिशी पा शुश वारच पाइबाक्‍माक्‍त। परमप्रभु कली प्रार्थना पना पन बाक्‍बाक्‍माक्‍त। 3 मिनु काबु ३ बजे ङा प्रार्थना पची ना कोंइतीक का तवा बाक्‍त। मेको कोंइतीकेमी परमप्रभु यावे आ स्‍वर्ग ङा गेय पाइब का आ बाक्‍तीकेमी जाक्‍शा “ए कोरनेलीयस” देंमेनु, 4 कोरनेलीयसमी हिंशा, कोव़स ङा कोव़स पा “मार देंनी, प्रभु” देंमेनु “इ प्रार्थना पशो, प्रभु कली मान पा टिशो, इ शिशी पा वारच पशो नेल्‍ल परमप्रभु यावेमी तुइश्‍शो बाक्‍ब। 5 मुल गे योप्‍पा सहरमी बाक्‍शो सिमोन पत्रुस नें पाइश्‍शो मुर कली ब्रथ सोइक्‍तो। 6 मेको सिमोन पत्रुस कुशुल नोक्‍ब सिमोन आ खिंमी बाक्‍ब। मेको आ खिं चहिं समुन्‍द्र आ नेक्‍था बाक्‍ब” देंशा लशो नेना बाक्‍त। प्रेरित ९:४३ 7 मोदेंशो लोव़ देंशो नेंशा, आ गेय पाइब निक्‍शी नु सिपाही का कली ब्रेत्‍ता बाक्‍त। सिपाही यो प्रभु कली मान पा टीब का बाक्‍माक्‍त। 8 मिनु मेको मुर सां आन कली मार दुम्‍मे, दोदेंशो लोव़ नेंना, मेको लोव़ नेल्‍ल शेंशा, पत्रुस कली माल्‍शा, चाक्‍चा, दे योप्‍पा सहर सोइक्‍तीमी बाक्‍त। प्रेरित ११:५-१७

9 मिनु आ दीसा नाक्‍त मेकोपुकी लमा लमा योप्‍पा सहर आ नेक्‍था जाक्‍दीम्‍मानु, पत्रुस प्रार्थना पथ खिं तारी ङोंइ‍से बाक्‍त। 10 मिनु ङोइश्‍शा बाक्‍मेनु, शोव़लु बेक्‍शा जज दाक्‍माक्‍त। खिं ङा मुरपुकी चहिं क्‍येना क्‍येन बाक्‍मा बाक्‍त। मिनु पत्रुसमी प्रभुमी कोंइशो कोंइतीक तवा बाक्‍त। 11 दोदेंशो तवा बाक्‍त देंशा हना, सरीङ रोक्‍सीशा ठेयब वा का हाम्‍सीशा क्‍युक्‍सीशो खोदेंशो पा खप गे यिशो तवा बाक्‍त। 12 मेको वामी मब्‍वचा ङा, ग्रांग्रा दिचा ङा जन्‍तु बुस्‍स चिक्‍ब बाक्‍मा बाक्‍त। 13 मिनु “ए पत्रुस, एको आन कली साइश्‍शा ब्‍वामी” देंशो नेंना बाक्‍त। 14 मिनु पत्रुसमी “हत्‍तेरी ओदेंशो ग्रांग्रा दिचा ङा दोपा ब्‍वचा नमी ङा, प्रभु? ओदेंशो ग्रांग्रा दिचा ङा गो गेनायो मब्‍वशो नङ” देंमाक्‍त। लेवी ११:-; इजीकीएल ४:१४ 15 मिनु लेंशा “परमप्रभु यावे आ चोव़खो सेल्‍शो कली ग्रांग्रा मदित्‍तो” देंशो नेंना बाक्‍त। रोमी १४:१४ 16 खेयप सां मोदेंशो दुम्‍शा, मेको ठेयब वा सरीङ गे लशो तवा बाक्‍त।

17 मिनु पत्रुसमी छक लाक्‍शा एको मार बाक्‍म माइ, दे मिम्‍ना मिम्‍न बाक्‍माक्‍त। पत्रुस मोदेंशो मिम्‍स ङा मिम्‍स बाक्‍मेनु, कोरनेलीयसमी सोइश्‍शो मुरपुकी कुशुल नोक्‍ब सिमोन आ खिंमी जाक्‍दीश्‍शा, लाप्‍चो आ ङोंइती राप्‍शा कोव़शा 18 “एको खिंमी सिमोन पत्रुस बाक्‍मे?” दे हिल्‍लो पामे बाक्‍त। 19 पत्रुसमी मुल यो आ तशो मार बाक्‍म माइ, दे मिम्‍न मिम्‍न बाक्‍मेनु, परमप्रभु यावे आ सोक्‍तीमी मेको कली “इ कली ब्रथ मुर सां जाक्‍तेक्‍मे। 20 तोइश्‍शा मेको आन कली ग्रुम्‍थ लावो। मिनु लचा, दे मलचा, दे थुं निक्‍शी मपथु, मेकोपुकी नु लावो। मारदे हना मेकोपुकी आं सोइश्‍शो नम” देंशो नेंना बाक्‍त। 21 मिनु पत्रुस फ्रु तोइश्‍शा “इन माल्‍शो मुर गो नङ, आं कली मारदे माल्‍यीनी?” दे हिल्‍लो पवा बाक्‍त। 22 मिनु मेकोपुकीमी “कोरनेलीयस आ सोइश्‍शो नकी। कोरनेलीयस कप्‍तान बाक्‍ब। परमप्रभु कली मान पा हिंब, रिम्‍शो मुर बाक्‍ब। यहूदीपुकीमी यो रिम्‍शो मुर बाक्‍ब, दे मिम्‍नीम। परमप्रभु आ स्‍वर्ग ङा गेय पाइब कामी कोरनेलीयस कली ‘योप्‍पा सहरमी सिमोन पत्रुस माइश्‍शो कली माल्‍शा चाक्‍शा आ लोव़ नेंचा’ देंतीके इन कली ब्रथ जाक्‍तक” देंमा बाक्‍त। 23 मिनु पत्रुस नु खिं ङा मुरपुकीमी मेको आन कली खिं गा ओंइशा जचा तूचा गेशा, बास गेमे बाक्‍त। मिनु आ दीसा पत्रुस मेकोपुकी नु सिजरिया गे लमाक्‍त। योप्‍पा सहर ङा थमा सुइक्‍ब लोक्‍ब का निक्‍शी यो लमा बाक्‍त।

24 आ दीसा सिजरियामी जाक्‍दीम्‍मा बाक्‍त। कोरनेलीयसमी आ मुर, आ वारच आन कली ब्रेश्‍शा, पत्रुस आ लां कोव़शा बाक्‍शो बाक्‍मा बाक्‍त। 25 मिनु पत्रुस कोरनेलीयस आ खिं ओव़चवानु, कोरनेलीयसमी पत्रुस आ ङोंइती बाप्‍शा आ खोइल गुप्‍शा सेउ पवा बाक्‍त। 26 मिनु पत्रुसमी कोरनेलीयस आ पिया पोक्‍शा “गो यो इन खोदेंशो मुर ला नङ” देंशा राप्‍पदा बाक्‍त। प्रेरित १४:१५; प्रकाश १९:१० 27 मिनु लोव़ पना पन खिं गा ओव़सा बाक्‍त। खिं गामी शुश मुर खुम्‍सीशा देल्‍शो बाक्‍मा बाक्‍त। 28 मिनु पत्रुसमी मेको देल्‍शा बाक्‍ब आन कली “गो आंइ यहूदी अर्को रागी ङा मुरपुकी नु काथा बाक्‍चा, जचा, आन खिं ओव़चा मदुम्‍ब, दे नेल्‍लेमी तुइक्‍नीनी। मोदेंशो बाक्‍त हना यो, परमप्रभु यावेमी आं कली सुइ आन कली आइक्‍च ममिम्‍चा, दे शेंताक्‍यी। 29 मोपतीके गेपुकीमी आं कली ब्रेत्‍तीनीनु, लचा, दे मलचा, दे थुं निक्‍शी मपथु, गिरिक‍कै जाक्‍ती। मारदे ब्रेत्‍तीनी?” देंमाक्‍त। 30 मिनु कोरनेलीयसमी “गाबेर नाक्‍त आं खिंमी ३ बजे ङा प्रार्थना पना पन बाक्‍ङानु, जील्‍माक्‍श देंशो वा फेक्‍सीशो मुर का फो ग्रूशा, आं ङोंइती राप्‍शो ताता। 31 मेकोमी आं नें थिशा ‘ए कोरनेलीयस, परमप्रभुमी इ प्रार्थना पशो नेंशो बाक्‍ब। इ शिशी पा मथीब आन कली मार मार गेशो तशो बाक्‍ब। 32 मोपतीके योप्‍पा सहरमी जाक्‍शा बाक्‍शो सिमोन पत्रुस नें पाइश्‍शो मुर कली ब्रथ सोइक्‍तो। मेको कुशुल नोक्‍ब सिमोन आ खिंमी बाक्‍शो बाक्‍ब। मेको खिं समुन्‍द्र आ नेक्‍था बाक्‍ब’ देंत। 33 मोपतीके ब्रथ सोइक्‍ताक्न्‍‍नी। गे बिश्‍शा गिरिक‍कै जाक्‍शा, आंइ कली रिम्‍शो पाइतीनी। परमप्रभु गे नु बाक्‍ब। मिनु परमप्रभु यावेमी इन कली मार शेंपाइक्‍बा, मेको लोव़ नेल्‍ले नेंचा कली खुम्‍सीशा बाक्‍तक” देंमाक्‍त। 34 मिनु पत्रुसमी “परमप्रभु यावेमी सुइ आन कली मतिल्‍थु, उइक्‍थ उइक्‍थ मिम्‍ब। ब्‍यवस्‍था १०:१७; १सामुएल १६:७; रोमी २:११ 35 मुर आन के जात रागी मारेइ मकोव़थु, आ कली मान पा हिंशा, आ लोव़ टिशा, रिम्‍शो पाइब आन कली दाक्‍शा, नेल्‍ल आन कली ब्राइब, दे मुल रुप्‍ता। यूहन्‍ना १०:१६ 36 परमप्रभु यावेमी येसु ख्रीस्‍त आ पतीकेम आंइ इस्राएल ङा मुर आन कली ग्‍येरपाइक्‍ब लोव़ नेंपाइक्‍तु। मिनु येसु ख्रीस्‍त नेल्‍ल आन प्रभु बाक्‍ब। एफिसी २:१७ 37 यूहन्‍नामी मुर आन कली शेंशा, ब्‍वाक्‍कुम ख्रुम्‍शा ग्रुंइदा नोले येसु ख्रीस्‍तमी गालील रे गोशा यहूदीया रागीम हिरशा, मुर आन कली शेंना शेंन गाक्‍त। मत्ती ४:१२-१७ 38 परमप्रभु यावेमी मेको नासरथ ङा येसु कली आ सोक्‍तीम प्रिंशा, आ सक्ति पाइश्‍शो सेल्‍तु। मिनु परमप्रभु यावे आ सक्ति पाइश्‍शो दुम्‍शा, तेइ तेइ गाक्‍शा मुर आन कली रिम्‍शो पाप्‍तु। वोलम तशो आन कली वोल खेरशा सापाइक्‍तु। सैतानमी दिप्‍शा वोइश्‍शा श्‍येत गेशो आन कली श्‍येत रे प्रोंइतीमी। मारदे हना परमप्रभु यावे मेको नु बाक्‍त। मत्ती ३:१६ 39 यहूदीया रागी यरूसलेम सहरमी येसुमी मार मार पवा, मार मार दुम्‍मे, मेको नेल्‍ल गो नु आं वारचपुकीमी आंम आंइ मिक्‍चीम ताइतक। येसु शीमी केप्‍शा कांटी थोक्‍शा क्‍याइश्‍शा साइक्चा पुंइसाक्‍व। 40 साइक्‍चा पुंइसीशा यो आ बेक्‍शो आ नित्‍थ नाक्‍ती परमप्रभुमी बेक्‍शो रे सेंपाइश्‍शा कोंइताक्‍व। १कोरिन्‍थी १५:४-७ 41 हना यो मुर नेल्‍लेमी मताम। गोपुकीमी चहिं ताइतक। मारदे हना ङोंइती रे गोपुकी सांकछी दुम्‍चा कली योव़शो नकी। येसु बेक्‍शो रे सेंसीशा, गोपुकी नु बाक्‍शा काथा जाइतक, काथा तूतक। यूहन्‍ना १४:१९,२२; लूका २४:३०,४३ 42 मिनु मोदेंशो पा काथा बाक्‍कानु, येसुमी आंइ कली ‘मुर आन कली आं पर्बम शेंदीने। मार शेंचा देंशा हना, परमप्रभु यावेमी येसु कली ब्रोंइशा बाक्‍ब नु बेक्‍शो मुर नेल्‍ल आन कली निसाफ पाइब सेल्‍तु, दे शेंशा गाक्‍कीन’ दे माइक्‍तीकी। यूहन्‍ना ५:२२ 43 सु सुमी येसु कली थमा सुदमे, मेकोपुकी येसु आ नेंमी आन पाप क्‍याम्चा पुंइसीनीम। साइ ङोंइती रे परमप्रभु यावे आ लोव़ पाइबपुकीमी मोदेंशो देंशो बाक्‍नीम” दे शेंदीमी बाक्‍त। यसैया ५३:५-६; येरमीया ३१:३४

44 पत्रुसमी शेंना शेंन पवानु, परमप्रभु यावेमी आ लोव़ नेंब नेल्‍ल आन कली आ सोक्‍तीमी प्रिंशो बाक्‍त। 45 पत्रुस नु काथा जाक्‍शो ख्रोइक्‍तीक चिनु ख्रोइश्‍शो थमा सुइक्‍ब यहूदीपुकीम अर्को रागी ङा मुर यो परमप्रभु यावे आ सोक्‍तीम ब्रीशो तशा छक लाक्‍मा बाक्‍त। 46 मेकोपुकीमी परमप्रभु यावे आ सोक्‍तीमी पपाइश्‍शो लोव़ पा परमप्रभु यावे कली ठेयब सेल्‍शो तशा तुइक्‍तमे बाक्‍त। प्रेरित २:४ 47 मिनु पत्रुसमी “मेकोपुकी आंइ खोदेंशो पा परमप्रभु यावे आ सोक्‍तीम प्रिंचा पुंइसाक्‍म। मोपतीके एको आन कली ब्‍वाक्‍कुम ख्रुम्‍शा ग्रुंइचा मदुम्‍ब, दे सुम देंने चाप्‍बा ङा?” देंमाक्‍त। 48 मिनु मेको आन कली येसु ख्रीस्‍त आ नेंमी ब्‍वाक्‍कुम ख्रुम्‍शा ग्रुंइपदा बाक्‍त। मिनु मेको नक थमा सुइक्‍बपुकीमी पत्रुस कली “नाक्‍त का निक्‍शी गोपुकी नु बाक्‍कीन” दे तेक्‍गमे बाक्‍त।