1 मिनु परमप्रभु आ सोक्‍तीम ओदेद आ तौ अजारयाह कली सुमा बाक्‍त। 2 मिनु मेको आसा कली ग्रुम्‍थ लशा, मेको कली “आसा, यहूदा ङा मुर नु बेन्‍यामीन ङा मुर नेल्‍ले, आं लोव़ नेनीन। परमप्रभु यावे गे नु बाक्‍ब। मेको गे नु बाक्‍ब। गेपुकीम मेको कली माल्‍तीनी हना, गे थित्‍नीनी। तन्‍न गेपुकीमी मेको कली प्रोंइतीनी हना, मेकोमी यो इन कली प्रोंइब। 3 इस्राएली शुश बर्स सम्‍म थमा ङा परमप्रभु नु मबाक्‍शो बाक्‍तेक्‍म। मेको आन कली शेंब चढ़ेब का यो मबाक्‍शो बाक्‍माक्‍त। मिनु परमप्रभु आ अरेशो लोव़ यो मतुइक्‍तेम। होसे ३:४ 4 तन्‍न मेकोपुकीम श्‍येत जामेनु, परमप्रभु यावे, इस्राएली आन परमप्रभु गे लेश्‍शा, माल्‍शा, मेको कली थित्‍तेक्‍म। मिनु मेको आन कली वारच पाप्‍तु। येरमीया २९:१३-१४ 5 मेना सुइ लाङगा लशा, रिम्‍शो पा जाक्‍ने मचाप्‍शो बाक्‍‍तेक्‍म। मारदे हना मेकेर शोर गाक्‍शो शुश मुर बाक्‍मा बाक्‍त। मिनु रागीम बाक्‍ब नेल्‍लेमी श्‍येत जाम्‍तेक्‍म। 6 मेको नेल्‍ल ठेयब श्‍येतम बाक्‍‍तेक्‍म। रागी नु रागी लडाइ पाम्‍तेक्‍म। सहर नु सहर यो लडाइ पाम्‍तेक्‍म। मारदे हना परमप्रभुमी मेको आन कली मार मार श्‍येत गेना गेन बाक्‍त। लूका २१:१० 7 तन्‍न गे इन थुं बारपाइश्‍शा बोल्‍यो दुम्‍शा, गेय पने। मारदे हना गे इन पशो गेय ङा इनाम ताइनीनी” देंमाक्‍त। १कोरिन्‍थी १५:५८

8 मिनु आसाम परमप्रभु यावे आ लोव़ पाइब ओदेद आ तौ अजारयाह आ लोव़ नेंशा, आ थुं बारपदा बाक्‍त। मिनु यहूदा, बेन्‍यामीन नु सहर नेल्‍लेमी नु आ ग्राशो एफ्राइम ङा पहाड रागी ङा सहरपुकीम बाक्‍शो ग्रांग्रा दिचा ङा मूर्ति नेल्‍ल लाइश्‍शा, खतम पोक्‍गा बाक्‍त। मिनु परमप्रभु यावे आ खिं ङा पिंडी आ ङोंइती बाक्‍शो परमप्रभु यावे कली चढ़ेतीक यो लेंशा सेल्‍पदा बाक्‍त। 9 मिनु आसामी यहूदा ङा मुर, बेन्‍यामीन ङा मुर नु मेको नु बाक्‍ब एफ्राइम, मनस्‍से नु सिमियोन रे प्रोक्‍शो मुर नेल्‍ल खुप्‍ता बाक्‍त। मेकेर बाक्‍ब एफ्राइम, मनस्‍से नु सिमियोन ङा मुरपुकी परमप्रभु यावे पिप आसा नु बाक्‍ब, दे तुइश्‍शा, इस्राएल रे प्रोक्‍शा, यहूदामी जाक्‍शो बाक्‍मा बाक्‍त। मारदे हना परमप्रभु यावे, आ परमप्रभु यावे मेको नु बाक्‍शो तुइश्‍शा, इस्राएल ङा शुश मुरपुकी यहूदाम बाक्‍थ जाक्‍शो बाक्‍मा बाक्‍त। २इतिहास ११:१६; येरमीया ४१:५ 10 आसा पिप दुम्‍शो १५ बर्स ङा महिना सांम मेको नेल्‍ले यरूसलेममी बुक्‍मा बाक्‍त। 11 मिनु मेको नाक्‍ती मेकोपुकीमी लडाइम रोइश्‍शा चाक्‍शो ७ सहे ब्‍यफ नु ७ हजार क्‍यारश भेडा चढ़ेमे बाक्‍त। 12 मिनु मेकोपुकीम आन थुं नेल्‍लेमी परमप्रभु यावे, आन किकी पिपी आन परमप्रभु आ नोले खोइक्‍चा, दे कबल पामे बाक्‍त। यहोसु २४:२५ 13 मिनु सु सुमी परमप्रभु यावे, इस्राएली आन परमप्रभु आ नोले खोइक्‍चा मबिस्‍से, मेको साइक्‍चा पुंइसे बाक्‍त। खाल्‍पा बाक्‍त हना यो, ठिटा बाक्‍त हना यो, मीश मुर बाक्‍त हना यो, वोंइश मुर बाक्‍त हना यो साइक्‍चा पुंइसे बाक्‍त। 14 मिनु मेको मुर नेल्‍लेमी “परमप्रभु यावे आ नोले खोइक्‍नय” दे कसम जशा, ग्‍येरसीशा ठेयब सेंदा पा, तुराही नु ग्रोव़ ताप्‍मे बाक्‍त। 15 यहूदा ङा मुर नेल्‍लेमी मेको कसम जतीके ग्‍येरसमा बाक्‍त। मारदे हना मेकोपुकीमी आन थुं नेल्‍लेमी परमप्रभु यावे कली खोइक्‍चा थमा पा दाक्‍तमे बाक्‍त। मिनु परमप्रभु कली थिश्‍शो बाक्‍मा बाक्‍त। मोपतीके परमप्रभु यावेमी मेको नेल्‍ल आन रागीमी लडाइ मदुम्‍पाइक्‍थु, आन थुं नाइक्‍चा गेवा बाक्‍त। २इतिहास १४:५-६; २इतिहास २०:३०

16 पिप आसामी आ बगे माकाह कली यो पिप आ ममा आ गेय रे ग्रुंइदा बाक्‍त। मारदे हना मेकोमी अशेराह देवी आ ग्रांग्रा दिचा ङा मूर्ति सेल्‍पदा बाक्‍त। आसामी मेको मूर्ति क्‍योरशा जिक्‍शा फस सेल्‍शा किद्रोन ङा खोलाम चोवा बाक्‍त। १राजा १५:१३-१५ 17 तन्‍न मेकोमी डांडा ङा थान नेल्‍ल इस्राएल रे मग्रुंइदा बाक्‍त। मो हना यो आसा मबेक्‍म सम्‍म आ थुं नेल्‍लेमी परमप्रभु यावे आ मुर दुम्‍शा बाक्‍माक्‍त। 18 मेकोमी आ आफोम परमप्रभु कली गेशो थोव़क नु आ गेशो थोव़क सुन चांदी नु ग्‍योंबपुकी परमप्रभु आ खिंम चाक्‍गा बाक्‍त। 19 आसा पिप दुम्‍मेनु, ३५ बर्स सम्‍म लडाइ का यो मदुम्‍माक्‍त।