1 मिनु पिप दाऊदमी बुक्‍शा बाक्‍शो मुर नेल्‍ल आन कली “परमप्रभुमी आं तौ सोलोमन का ला योव़तु। मेको मुल सम्‍म ठिटा बाक्‍ब। एको खिं सेल्‍चा चहिं थम ठेयब गेय बाक्‍ब। मारदे हना एको खिं मुर आन कली ममाइ, परमप्रभु, परमप्रभु यावे आ खिं बाक्‍ब। १इतिहास २२:५ 2 गो आं परमप्रभु आ खिं सेल्‍चा कली मार मार वोइक्‍ता देंशा हना, सुन के थोव़क कली सुन, चांदी के थोव़क कली चांदी, कांसा के थोव़क कली कांसा, फलाम के थोव़क कली फलाम, शी के थोव़क कली शी, हीरा नु सुनम ग्‍याइश्‍शो हीरा, दारपाइक्‍चा कली मार मार रङ पाइश्‍शो फुल्‍लु, मार मार हीरा नु अरु दारशो फुल्‍लु शुश तेल्‍शा वोइक्‍ता। 3 मेको आं परमप्रभु आ बाक्‍तीके सेल्‍चा कली खुप्‍शा वोइश्‍शो मार मार प्रोंइशा यो आं परमप्रभु आ खिं सेल्‍चा थाम्‍पा दाक्‍तीके गो आंम आं सुन नु चांदी परमप्रभु आ खिं सेल्‍चा कली गेता। 4 परमप्रभु यावे आ खिं ङा आगा ङा गारो गिल्‍चा कली ४३ हजार टलेन्‍ट ओफीर ङा सुन नु ७ हजार टलेन्‍ट याप्‍पाइश्‍शो चांदी वोइश्‍शो बाक्‍ब। टलेन्‍ट का ३४ किलो बाक्‍ब।१इतिहास २२:१४; प्रस्‍थान ३५:४-९ 5 मिनु रिम्‍शो जोक्‍ब तुइक्‍ब गेय पाइब आन कली एको सुन के थोव़क कली सुन नु चांदी के थोव़क सेल्‍चा कली चांदी वोइश्‍शो बाक्‍ब। मुल परमप्रभु यावे कली आं खोदेंशो पा सु सुम मार मार गेचा दाक्‍नीनी?” दे हिलो पवा बाक्‍त।

6 मिनु खिं खिं ङा ठेयब मुरपुकी, इस्राएली आ थर थर ङा ठेयब मुरपुकी, हजार हजार ङा लडाइ पाइब आन कप्‍तानपुकी नु सहे सहे ङा लडाइ पाइब आन कप्‍तानपुकी नु पिप आ गेय पाइब आन कली कोव़ब मुरपुकी हाइश्‍शो दुम्‍शा मार मार गेमी बाक्‍त। 7 मेकोपुकीमी ग्‍येरशा परमप्रभु आ खिं सेल्‍चा कली मार मार गेमे बाक्‍त देंशा हना, ५ हजार टलेन्‍ट सुन, नु सुन के क्‍येट १० हजार दारीके, १० हजार टलेन्‍ट चांदी, १८ हजार टलेन्‍ट कांसा लाख का टलेन्‍ट फलाम गेमे बाक्‍त। दारीके का ८.४ ग्राम सुन के क्‍येट बाक्‍ब। 8 मिनु सु सु नु हीरा बाक्‍मा, मेकोमी परमप्रभु यावे आ शोंप वोइक्‍तीक कली गेरशोन आ खिं ङा मुर येहीएल आ गुइमी गेमे बाक्‍त। प्रस्‍थान ३५:२७ 9 मिनु मुरपुकीमी हाइश्‍शो थुंमी गेशा ग्‍येरसीशो बाक्‍मा बाक्‍त। मारदे हना मेकोपुकीमी ग्‍येरसीशा परमप्रभु यावे कली शुश गेशो बाक्‍मा बाक्‍त। पिप दाऊद यो थाम्‍पा ग्‍येरशो बाक्‍माक्‍त।

10 मिनु दाऊदमी मुर नेल्‍ल आन ङोंइती परमप्रभु यावे कली “परमप्रभु यावे, आंइ किकी पिपी इस्राएल आ परमप्रभु, गे गेना हना यो ठेयब बाक्‍नीनी। 11 परमप्रभु यावे, नेल्‍ल क्‍येङा ठेयब दुम्‍तीके, सक्ति, छेङछेङ, ग्रातीके नु मान तचा पुंइसीतीके नेल्‍ल इन के बाक्‍नीम। मारदे हना रागी नु सरीङम बाक्‍शो मारेइ मारेइ इन के नम। परमप्रभु यावे, मेको राज्‍य इन के बाक्‍ब। गे नेल्‍ल क्‍येङा ठेयब बाक्‍नीनी। प्रकाश ४:११;५:१३ 12 गे शोंप नु मान ततीक गेब बाक्‍नीनी। गे नेल्‍ल आन कली सासन पाइनीनी। बोल नु सक्ति इन गुइमी बाक्‍ब। गे इन गुइमी ठेयब सेल्‍शा, सक्ति गेनीनी। २इतिहास २०:६ 13 मुल आंइ परमप्रभु, गो इन कली ‘गे रिम्‍शो पाइब बाक्‍नीनी’ दे इन नें ठेयब सेल्‍नीकी।

14 मिनु गो आंइ थुंम ग्‍येरशा सोम्‍शा ओपा शुश गेने चाप्‍नीकी? गो सु नङा? आं मुरपुकी सु बाक्‍नीमी? मारदे हना नेल्‍ल थोव़क इन गुइ रे जाक्‍नीम। गोपुकीमी इन गेशो रे इन कली गेतक। 15 गोपुकी इन ङोंइती शुश नाक्‍त मबाक्‍ब अर्को रागी ङा मुर दुम्‍शो बाक्‍नीकी। आंइ किकी पिपी यो मोदेंशो बाक्‍मा बाक्‍त। आंइ रागीम बाक्‍तीके नाक्‍ती वांकु खोदेंशो बाक्‍नीम। शुश बाक्‍तीक आस मबाक्‍ब। भजन संग्रह ३९:१३; हिब्रू ११:१३; अय्‍युब १४:२ 16 परमप्रभु यावे, आंइ परमप्रभु खिं सेल्‍शा, इन नें ठेयब सेल्‍चा कली आंइ तेल्‍शो शोंप नेल्‍ल इन गुइ रे जाक्‍शो बाक्‍ब। 17 आं परमप्रभु, गे मुर आन थुं नाक्‍शा कोव़नीनी, दे तुइक्‍नुङ। गे ब्रेम्‍शो थुं पाइश्‍शो मुर तशा ग्‍येरनीनी। गो आं ब्रेम्‍शो थुं दुम्‍तीकेमी ग्‍येरशा एको नेल्‍ल इन कली चढ़ेता। मुल गो एक बाक्‍शो इन मुर आन कली ताता। ग्‍येरशो थुंमी एको नेल्‍ल चढ़ेम्‍तेक्‍म। भजन संग्रह ७:१० 18 परमप्रभु यावे, आंइ किकी पिपी अब्राहाम, इसहाक नु याकूब आन परमप्रभु, इन मुर आन थुंमी मोदेंशो मिम्‍चा नु पचा गेना हना यो लीपतीन। मिनु मेको आन थुं इन गे कीङीन। 19 आं तौ सोलोमन कली इन शेंतीके, इन देंशो नु फुल्‍लुम मुशा ब्रेक्‍शो लोव़ आ थुं नेल्‍लेमी पपतीन। मेकोमी नेल्‍ल पने चबल। मिनु आं ठीक पा वोइश्‍शो थोव़कमी इन खिं सेल्‍ने चबल” दे दाऊदमी परमप्रभु कली देंमाक्‍त।

20 मिनु नोले दाऊदमी मुर नेल्‍ल आन कली “परमप्रभु यावे, इन परमप्रभु कली ठेयब सेलीन” देंमाक्‍त। मिनु मुर नेल्‍लेमी परमप्रभु यावे, आन किकी पिप आन परमप्रभु कली ठेयब सेल्‍शा बाम्‍मा बाक्‍त। मिनु परमप्रभु यावे नु पिप आ ङोंइती बाप्‍शा, सेउ पामे बाक्‍त। 21 मिनु आ दीसा नाक्‍ती मेकोपुकीमी परमप्रभु यावे कली मार मार चढ़ेतीके नु चोशा चढ़ेतीक चढ़ेमे बाक्‍त। मेकोपुकीमी हजार का ब्‍यफ, हजार का सांड, हजार का पाठा, तूचा थोव़क चढ़ेमे बाक्‍त। इस्राएली नेल्‍ल आन पर्बम शुश चढ़ेमे बाक्‍त। 22 मेको नाक्‍त शुश ग्‍येरसीशा परमप्रभु यावे आ ङोंइती जशा, तूङमे बाक्‍त। मिनु नोले मेकोपुकीमी दाऊद आ तौ सोलोमन कली लेंशा पिप सेल्‍मे बाक्‍त। मिनु सोलोमन कली तेल लुक्‍शा पिप सेल्मे बाक्‍त। मिनु सादोक कली चढ़ेब सेल्‍मे बाक्‍त। १इतिहास २३:१ 23 नोले सोलोमन आ आफ दाऊद आ पा ङा परमप्रभु यावे आ नित्‍तीकेमी निश्‍शा, पिप दुम्‍शा, ठेयब दुम्‍माक्‍त। इस्राएली नेल्‍लेमी मेको आ देंशो बिस्‍समा बाक्‍त। १इतिहास २८:५; १राजा १:३४,३५, ३९ 24 ठेयब मुर नेल्‍ले, सक्ति पाइश्‍शो लडाइ पाइब नेल्‍ले नु पिप दाऊद आ तौ नेल्‍लेमी यो पिप सोलोमन कली आन पिप बाक्‍ब, दे कसम जामे बाक्‍त। 25 मिनु परमप्रभु यावेमी सोलोमन कली इस्राएली नेल्‍ल आन ङोंइती ठेयब सेला बाक्‍त। मिनु मेको कली राज्‍य नु मान ततीके शुश गेवा बाक्‍त। इस्राएलम मेको क्‍येङा ङोंइती ङा तेकोइ पिप आन कली मोदेंशो मान ततीके मगेशो बाक्‍माक्‍त।

26 मोपा येस्‍से आ तौ दाऊदमी इस्राएल नेल्‍लेमी सासन पवा बाक्‍त। 27 मेकोमी इस्राएल कली ४० बर्स सासन पवा बाक्‍त। हेब्रोनम ७ बर्स नु यरूसलेममी ३३ बर्स सासन पवा बाक्‍त। १राजा २:११ 28 मिनु शुश खूशो दुम्‍शा बेक्‍माक्‍त। मेको के शोंप नु मान ततीके शुश बाक्‍माक्‍त। मिनु आ तौ सोलोमन आ नोले पिप दुम्‍माक्‍त। उत्‍पत्ती २५:८; उत्‍पत्ती ३५:२९; २इतिहास २४:१५; अय्‍युब ४२:१७ 29 पिप दाऊद आ पशो मार मार बाक्‍मे, मेको ङोंइती रे नोले सम्‍म नेल्‍ल परमप्रभु यावे आ लोव़ पाइब सामुएल, नाथान नु गाद आन ब्रेक्‍शो किताबम ब्रेक्‍शो बाक्‍ब। १इतिहास २१:९ 30 दोपा सासन पवा, आ सक्ति नु आ पशो नेल्‍ल, इस्राएली आन तशो नु रागी रागी ङा राज्‍यम मार मार दुम्‍मे, मेको लोव़ नेल्‍ल मेकेर ब्रेक्‍शो बाक्‍ब।