18
दाऊद आ राज्य बारशो
२सामुएल ८:१-१४
1 मेको आ इच्का नोले दाऊदमी पलिस्ती नु लडाइ पा ग्राशा फ्रूमी बाक्त। मिनु पलिस्ती आन गाथ सहर नु मेको आ एर ओंथ ङा गाउं नेल्ल आइक्के सेला बाक्त।
2 मेकोमी मोआबी आन कली यो फ्रूमी बाक्त। मिनु मेकोपुकी दाऊद आ सासनम दुम्शा, मेको कली तिरो थाप्चा माल्मा बाक्त।
3 मिनु दाऊदमी युफ्रेटीस खोला सम्म आ ग्राशो अधिकार ठीक वोइक्थ लमेनु, सोबाह ङा पिप हादादेजेर नु हमाथ सम्म लडाइ पवा बाक्त। 4 मिनु दाऊदम मेको रे पा हजार का बग्गी, ७ हजार शारा ङोइक्ब नु २० हजार खोइलीम गाक्ब लडाइ पाइब आन कली ग्याइक्तीमी बाक्त। मिनु मेकोम सहे का शारा प्रोंइशा अरु बग्गी ङा शारा नेल्ल आन कली खोइल ङा नारी ख्रोदमे बाक्त।
5 मिनु सोबाह ङा पिप हादादेजेर कली वारच पाइक्चा कली दमस्कस ङा अरामीपुकी जाक्मे बाक्त। मिनु दाऊदमी मेको आन दाते ङा २२ हजार आन कली साइक्मी बाक्त। 6 मिनु दाऊदम दमस्कस ङा अराम सहरम आ ताम्बु कीङा बाक्त। मिनु अरामीपुकी मेको आ सासनम दुम्शा मेको कली तिरो थाप्तमे बाक्त। मोपा दाऊद ते लत हना यो परमप्रभु यावेम मेको कली ग्रापदा बाक्त। 7 दाऊदम हादादेजेर आ लडाइ पाइब आन ठेयब मुरपुकीम कुरशो सुन के ब्रा, तेक्तीकपुकी रोइश्शा यरूसलेमम चाक्गमे बाक्त। 8 दाऊदम हादादेजेर आ तिब्हाथ नु कुन सहर रे शुश कांसा चाक्गमे बाक्त। मेको रे पा सोलोमनम ठेयब चिक्तीक बोस, थामपुकी नु ग्योंबपुकी सेला बाक्त। १राजा ७:२३; १राजा ७:१५
9 मिनु हमाथ ङा पिप तोऊमी दाऊदमी सोबाह ङा पिप हादादेजेर आ लडाइ पाइब नेल्ल आन कली फ्रुशो लोव़ नेना बाक्त। 10 मिनु दाऊदमी हादादेजेर कली लडाइ फ्रुशो आ पर्बम मेको कली रिम्शो पाइतीनी देंथ तोऊम आ तौ हदोराम कली दाऊद आ बाक्तीक सोइक्ता बाक्त। मारदे हना हादादेजेर नु तोऊ आस दातेमी लडाइ दुम्शो बाक्माक्त। मिनु हदोराममी आं नु बाक्शो सुन चांदी नु कांसा के ग्योंबपुकी चाक्गा बाक्त।
11 मिनु दाऊद पिपम मेको आ चाक्शो सुन नु चांदी के ग्योंब नेल्ल परमप्रभु यावे कली चढ़ेवा बाक्त। मेकोमी अर्को जात नेल्ल एदोम, मोआब, अम्मोनी, पलिस्ती नु अमालेकी रे चाक्शो सुन चांदी यो चढ़ेवा बाक्त।
12 सेरूयाह आ तौ अबीशैमी हिक्सी आ बेंसीम १८ हजार एदोमी लडाइ पा सदा बाक्त। 13 मिनु मेको आन रागीम ताम्बु कीङा बाक्त। मिनु एदोमी नेल्ल दाऊद आ सासनम दुम्मा बाक्त। मोपा दाऊद ते ते लमे, मेक मेक परमप्रभु यावेमी मेको कली ग्रापदा बाक्त।
दाऊद आ कप्तानपुकी
२सामुएल ८:१५-१८
14 मिनु दाऊदम इस्राएल नेल्लेमी सासन पवा बाक्त। मिनु आ मुर नेल्ल आन कली ठीक निसाफ पवा बाक्त। 15 सेरूयाह आ तौ योआब कप्तान बाक्माक्त। अहीलुद आ तौ येहो-शाफात ठेयब ब्रेक्ब बाक्माक्त। 16 अहीतुब आ तौ सादोक नु अबीयाथार आ तौ अहीमेलेक चढ़ेब बाक्सा बाक्त। शाव्शा लडाइ पाइब आन ठेयब ब्रेक्ब बाक्माक्त। १इतिहास २४:६ 17 येहो-यादा आ तौ बेनायाह केरेथी नु पेलेथी पिप कली खाल पाइब आन कप्तान बाक्माक्त। दाऊद आ तौपुकी चहिं पिप आ गेय पाइब आन ठेयब मुर बाक्मा बाक्त।