1 Ẍchiwutz yi e' yab qui'c Ryos at.

Yi e'a'tz qui'c mu'ẍ tal chixac.

Nin yi e'chk takle'n yi na chiban, chin xa'bil nin.

Cya'l jun yi najk pek' tan banle'n yi e'chk takle'n balaj.

2 Poro yi Kataj Ryos na xmayin tzaj jalen tzi'n tcya'j.

Na tzan i' tan tilwe'n yi ko at jun wunak yi at tajtza'kl, jun wunak yi na tzan tan xtxumle'n i'.

3 Poro cya'l jun najk tzan tan joyle'n Ryos, na e' cu'n tx'akxnak.

Cya'l jun najk pek' tan banle'n yi e'chk takle'n balaj.

Siquier jun.

4 Yi e' mal naka'tz qui'c mu'ẍ cyajtza'kl.

Na na chiban wi'nin takle'n yi cachi'.

Nin na cho'c tan chibajse'n yi e' intanum, chi na chiban tan bajse'n pam.

Siquier mu'ẍ tal nak cyek ẍchi' Ryos.

5 Poro tz'opon jun k'ej yi ẍchixobok.

Mpe qui'ck na bajij, poro yi cyetz, chichuc ẍchixo'wsaje' quib.

Na tz'ocopon Ryos tan chixite'n cu'n junawes, na tz'ocopon tan xite'n chibakil.

Chocopon ta'n tetz chitze'lbe'tz wunak, na qui na pek' i' te cyajtza'kl.

6 Cho'nk saj yi colol ketz yi o' xonl Israel wi Sión.

Nin katzatzink yil kamolxij junt tir, yi o', yi o' tanum Ryos, yi elnako' xit bene'n tzi'n wi munt.

Tircu'n o', o' xonl Jacow, o' xonl Israel, skatzatzink yil kamolxij junt tir.