1 Wajcaw, cho'n na chinjilon teru'.

2 Cho'n k'uklij inc'u'l te'ju' na ilu' inRyosil.

Quil tak'u' ama'l tan tele'n intx'ix.

Quil tak'u' ama'l tan chitze'ene'n yi e' incontr swe'j.

3 Na quil tz'el xtx'ix jun yi ko k'uklij c'u'l te'ju'.

Ma yi e' yi na cho'c tan contri'n te'ju' yi e' yi qui'c xe' chitxumu'n, tz'elepon chitx'ix.

4 Wajcaw, ẍchaje'u' yi be'u' swetz.

Chin tcy'aj ninu' le yi be'u'.

5 Ẍchaje'u' yi mero bintzi swetz.

Na yi ilu' teru' ilu' inRyosil, nin ilu' colpinl wetz.

Cho'n k'uklij inc'u'l te'ju' cyakil k'ej.

6 Wajcaw, qui'k tz'el yi banl talma'u' te c'u'lu'.

Nin ulk tx'akx tc'u'lu' yi ilenin ja ẍchaju' banlu' sketz.

7 Qui'k tz'ocu' tan xtxumle'n cyakil yi wil.

Qui'k tz'ocu' tan xtxumle'n yi e'chk takle'n yi mbnix cyen wa'n te yi inxiquil tzaj.

Elk k'ajabu' swe'j tan yi banl talma'u'.

8 Yi Kataj chumbalaj nin i'.

Nin chin jicyuch nin te'j tajtza'kl.

Na na oc i' tan makle'n chiwutz yi e' juchul il.

9 Nin na ẍchaj i' yi balaj be' scyetz yi e' c'ulutxum.

Na oc i' tan chichusle'n, tan chixome'n te yi balaj ajtza'kl.

10 Cyakil yi na ban Kataj ske'j na ẍchaj yi na pe'k i' ske'j, na list i' tan tele'n cu'n te yi tetz yol yi suki'nt ta'n.

Nin ko na katzan tan banle'n tane'n yi tetz ca'wl, at tzun kach'iw te'j yi tz'elepon k'ab i' te yi tetz yol.

11 Wajcaw, nimix cunin wil ja injuch swutzu'.

Poro cuyu' impaj tan jale'n k'eju'.

12 Cyakil yi e' yi na cyek ẍchi' Kataj, i' na chajon yi mbi'tz tajwe'n tan chibnol, bantz chixome'n te'j.

13 Nin stk'e' i' yi banl squibaj.

Nin yi e' chixonl, scyetzaje' yi ama'l yi suki'nt ta'n.

14 Nternin na cho'c nin na che'l Kataj scyuch' yi e' yi na cyek ẍchi' i'.

Nin na oc i' tan quich'eye'n tan tele'n chitxum te yi trat yi bixba'nt ta'n.

15 Ilenin cho'n na chinxmayin nin te Wajcaw.

Na i' tz'ocopon tan incolpe'n, tk'ab yi e'chk il yi tz'ul tzinwutz.

16 Wajcaw, elk k'ajabu' swe'j.

Xmayink tzaju' swetz, na inchuc atin, nin buchij chin.

17 Chin cole'u' tk'ab yi bis o'kl yi atin cu'nt.

Na wi'nin na chimbisun.

18 Wajcaw, na tilu' yi o'kl yi atin cu'nt, tu yi q'uixc'uj yi atin cu'nt.

Elk bin k'ajabu' swe'j, nin cuyu' impaj.

19 Sak cu'n swutzu' yi wi'nin chijale'n mas incontr.

Sak cu'n swutzu' yi nternin na chi'ch chic'u'l swe'j.

Nin sak cu'n swutzu' yi cyajbil i'tz yi ẍe'nk ne'l cu'n swutz.

20 Chin q'uicy'leju' bin, nin chin colpe'u' ẍchik'ab e' incontra'tz.

Quil tak'u' ama'l tan tele'n intx'ix.

Na cho'n k'uklij inc'u'l te'ju'.

21 Nink xcye' yi inc'ulutxumil tu yi imbalajil tan incolche'n.

Na nternin k'uklij inc'u'l te'ju'.

22 Kataj, ko' colpe'u' tk'ab cyakil yi q'uixc'uj yi ato' cu'nt, yi o' xonl Israel.