2
2:1-11 Keriso Umó Durumugea, Tofo Ituturieta Vovoruria-du Rea, God Na Unda Ragaro Ririkurieta Eroruria Re.
1 Atá, nímane Keriso de takembea irirota, ano ea jiria, unda neno bari itatama egeguturota, God da Asisi Kakarami, nímanda neno rova irirota, nímane mino-mino kavevera urota, neno rururota viteravore. 2 Aghá-gea, nímane asisida anomi neno dabako egeguturota, mino-mino neno rururota iririge! Aghá egegadora mo, amó nímandu gangoro aitare. 3 Mania nímanda ikoko mendi, ariri gharovu doa serigaita rea, gare-garegha egegata! Aghade, mania enembo dumeni nímandu raga rari-du, nundubata! Tefo! Nímanda ragaro do-gea, vovorurota, fefera inono enembo dumenidu raga regege! 4 Kotú nímane, mania nenuka, nímanda unonu egegata! Nímanda ikoko mendi, ariri gharovuda unode burode nundubaride dano sonembadi rere. 5 Aghá urota, Iesu Keriso da daiyagha nundubuturota vitiria aghagonu, nundubuturota iririgadi rere.
6 Aná rera-da bee mo, aná evere:
Unda irari, umó aná God re, tumanadu irita urie.
Tago, unda irari, kotú ano, jo unda tofonu righia jiraita rambi re.
7 Umó God gha aghá urota vitirie.
Tago, unda ano durogha kosugea itia doa, furia, sabuada* irari,
kotú, enembo beeda tamo ananu bua, asugea siroruturie.
8 Amindu rea, enemboda ambuta rouvia aghagonu urota,
unda bingá ititurieta vovorurieta, umó God da unonu urota ambubuturie.
Aghá urota, meka gia, mema itatama urota, ifatarava ambubuturie.
9 Aghá uria-du,
God na ragaro anogha eini, uutu endava aghago tefonu, ututurota,
umó ririkurieta, iti bee itiva jiria vitie.
10 Is 45:23Aghá uria-da bee mo,
eini-eini dano uutu endava vitia, enda rova vitia,
kotú, enembode, anera manede, taimu manede dano,
Iesu da dibeva koubomi jenjengirea, tumogha baĩ egeguturota,
undú raga regegari-du rea, aghá urie.
11 Kotú tofo unda durogha gari isagha ari-du rea,
God Afa na rata, enembode, anera manede
kotú taimu manede dano, eghá regegaita rousue,
“Iesu Keriso, imó Jojabee re!”
2:12-18 God Da Natofo Unanami Janimbarigo Urota-Gea, Natofo Gigigaita Rousue.
12 Avore, anda ikoko mendi, ariri gharovu, amó arera bubua avo namonde irirota, anda gaga donu rirera, nímane fefera inono aghagonu egegutureravore. Aná taubana re-tago, oreki amó serigea, airo vitera beago, anda gaga ningia, ambo-ambo egegadora, aná taubana bee re. Kotú nímane God du verua, oru egeguturota, jebuga tumanadu irari baita rea, ivatava ititiguturota iririgadi rere! 13 Anada bee mo, God unona, nímanda neno rova buro urota, umó dodu gangoro rouvia-nu, nímane beago dabako anadu uno urota egegari-du rea, ano ututa rouvie.
14 Nímane buro donu egegadora mo, mania minoinjagha urota, besiga egegata! 15-16 Deut 32:5Aghá egeguturota, nímane, nundubari sembago kotú ari-bari akokogo ari kakatoda rorova irirota, God da sasingu dinunu tefo bebeta ambi ea irirota, eto-bato foghaemi, tumbade janimbeta rouvia aghagonu, God unda jebugade, unanade aná retora enembodava vesa boanda egege, jebuga tumanadu irarida emboro gigigoe! Aghá egeguturota iririgadora mo, Keriso da furaita rouvia fefera aghade, amó avo nímanda rorova buro eta urera, anada bee sirorea vitia-du nímandu gangoro aitare.
17 Eto-bato námane Jiusi enemboda fristi* mane vesa dungiturota, vaini etova averegea dungeta rousua aghagonu, gitofomi amó data, anda amburaita rora-da tatangunu nímanda God gaabee urota, vesa undava ututa rosora-da etova averegadua-jogo. Aghá ata-gea, amó gangoro aita rore, kotú nímane beago, amonu nundubea andú gangoro egegadi rere. 18 Aghade, andú gangoro egeguturota, namonde neno dabako egegea, gangoro egegore!
2:19-30 Pol Unda Buro Kokomanadu Ghaito Teno Fugari-Du Riria Re.
19 Jojabee Iesu avore rata-gea emboro ifegadua mo, amó Timoti ninengota ya, nímanda gaga ningia doa, kaverea furá rata ningia gangoro aita rea, uno urota kaifa gigiturota vitere. 20 Amó nímane neno buta rora aghagonu, Timoti umó dabako aghago rei-nundubutue. Enembo eini avona jo umongo irambi re. 21 Enembo dumeni mo, nendufa númanda unode eini-einide nundubuturota, Iesu Keriso da buro jo gogorego nundubambi eta rousue. 22 O Timoti mo, buro ea goghó eta rouvie. Kotú embó einimi unda mendigha eta rouvia aghagonu, angá danode Gaga Taubananu vesa egegutueta, gigigutureravore. 23 Amindu, amó diburava reta doa bubara aĩ, irara? Ananu nanjigo tanana adora, umó nímandava yari-du niningigaita uno rore. 24 Tago, anda rei-gerora mo, Jojabee avore rata emboro ifegota, amó beago tutomi ya, nímandava bubaitare.
25 Atá, nímanena ninenguturieta nímanda gaga bua furia, amó sonembuturia embó, Epafroditus mo, umó angá danode jiria, Keriso da ragarova buro urota, mene-mene egegeta urere. Umó beago ninengota nímandava kaverea yasua, rei-nundubutore. 26 Anada bee mo, unda kae rura-da gaga angieta, niningutara-du neno mema ea, umó nímandava ya bubua, gaita uno bee rouvie. 27 Niningigutara, aná gaa bee re. Umó kae akuago bua amburaita itoko uta. Avore, umó amburasueta, amó neno mema jojabe itatama asira-tago, God undú kotú andú neno mema utata, umó seibe jebugea vitie. 28 Amindu, umó tutomi ya, nímandava bubota gangoro egeguturadi-gea, amó beago neno asegasira-nu uno bee rore. 29-30 Nímane amó sonembari jo inono irambi-gea, umó nímanda kambesi bua, amó sonembuturota, Keriso da buro urota amburaita itoko uta. Aghá uta-du, umó ya bubadua mo, Jojabeeda ragarova gangorogha ghaito teno fufugegadi rere. Kotú enembo aghago manedu aghá urota, verua egegadi rere.