2 Timoti du
Pol Unda Ingiso Ambova Timoti Du Gefiria, Aná Evere.
Pol unda ingiso dano 13 o 14 gefiria-da rorova, ambo gajari ingiso gefiria, aná evere. Avore, enembo dumenida nundubariva, Pol fefera dabako Rom anava dibura ari nundubeta rousue. O enembo dumenida nundubariva, Pol fefera ungagha Rom anava dibura ari nundubeta rousue.
Avore, umó fefera ungagha dibura ari aná gaa bee irasua mo, umó dibura uria-da ambova, isaghava deĩ urota, aná ingiso sei Timoti dava gembua, Iesu da Gaga Taubana minono rita furie. Anada ambova, Rom enemboda kotofuko akuago eini ragaro Nero da feferava, Pol rekago nandia bua, ghaeko* 67-68 da rova rekago diburava gajiturie. Aghá urieta, umó diburava irirota, Timoti du unda ingiso ambova gefirie. Anada ambova Rom enemboda kotofukomi ririeta, dibura kambo kaifa kakatomi Pol dedeguturieta ambubuturie.
Avore, Pol Timoti du ingiso gefiria-da bee evere. Enembo dumenimi, gaga gavera, kotú irugari gavera manenu irugeta urie. Kotú ambova furá irugaita rousua, ananu nundubuturota, Timoti ano ea jiria, gaa bee nuenembo rari-du kotú irugari-du rea, Pol na undú nghaĩ ititurie.
Pol Ená Buka Gefiria Gagada Mendó Mane, Aná Evere:
1:1-2 Pol undufako isuri ea, Timoti ghanena urie.
1:3-2:26 Bouvu kotú mema oruabe siroraita rouvia, kotú irugari gavera mane sirorea ya, jojabe aita rouvia-da rorova, Timoti umó ano ea jiria, gaa bee nuenembo irugari-du rea, Pol na gefirie.
3:1-9 Fefera Ambova Donu Siroraita Rouvia Da Gaga Re.
3:10-4:8 Timoti Daiyagha Buro Asua-nu Pol Na Isuri Uria Re.
4:9-22 Pol unda gaga ambo gajari rea, tano urie.
1
1-2 Eka 16:1Ariee, Timoti ko! Anda neno bari mendi. Imó ghanena bee roreta. Yata bua gii!
Amó Pol re. God na uno urie-gea, amó gateguturieta, Iesu Keriso da aghi kato urere. Iesu Keriso de takembea vitia enembomi, God jebuga utota bari-du riria-da Gaga minono rari-du rea, God na amonu gateguturie.
Avore, sonembade, kauta kaveverade, kotú siriride God Afa na utota, bubugadi! Yata bua gii!
1:3-18 Neno Evurota, Ano Ea Jiria, Gaabee Ari-Du Riria Re.
3 Anda mambube mane neno roo ea simbugea, tumogha baĩ egegeta uria God nu, amó beago tumogha baĩ urota, undú “aiye” rirota vitere. Aghade, amó fefera inono imonu nundubuturota, God du “aiye” reta rore. 4 Imó neno mema ea dari sorara urera-nu nundubuturota, amó ya, imó gaita uno rore. Aghá asira mo, amó gangoro urota, neno taubana asire! 5 Eka 16:1Oreki anda rei-nundubutara-va inda avia, Lois dava gaabee ari jojabe vitirie, kotú nie Yunis dava aghá vitirie. Kotú amó tanana rore, gaabee ari jojabe dabako aghagomi imó Jojabee gaabee eta roravore. 6 Aghá-gea, ingo inda beforova itia benunu urera aghade, God indú ano dibe eini ututurieta rurera-du rere. Aná undutu-gea baria, jojabe ae! 7 Anada bee mo, namonde andú oru ari asisi utambi re. Unda ututuria Asisida anomi ano ea, mino-mino neno bubugea, tamoda uno buregari-du rea, unda Asisi Kakara ninenguturieta furie.
8 Aghá-gea, Jojabeeda Ragarova kariguturota, mania meka ata! Aghago, amó Keriso du rea nandia bua, diburava itari vitera beago, mania meka ata! Kerisoda Gaga minono reta rousua enembo dara kotú mema tambuta rosora, anada mema vesa ea, inda boanda God da ututa rouvia-da anomi fumbadi rere! 9 God na namonde amó aghi ea, sonembuturota jebuga utua, unda natofo kakara egegari-du rururie. Jo namonde anda ari-bari taubana einidu ambi re. Tefo! Uutu enda uubu uria-da dibe kena namonde andú uno urota, kauta kavevera ea Iesu Kerisoda amburarimi namonde andú unda sonemba ututurie. 10 Aná sonemba mo, namonde anda sonemba kato Iesu Keriso furia-va isagha urie. Unona furia, amburarida ano dano dea bejea sidara ea, unda Gaga Taubanami jebuga tumanadu irari tambarida emboro ifeguturie.
11 1 Ti 2:7Avore, unda Gaga Taubananu minono rirota, kotú iruguturota, enembo aghi ari-du rea, God na amó gateguturieta aghá urota vitere. 12 Aghá eta rora-du, amó diburava irirota bouvude dara dumeni dumenide mema dano itatama rore. Tago, amó jo amindu meka urota, anda gaabee ari doambi re. Anada bee mo, amó avonu gaabee rora, aná tanana ea goghó rore. Aghade, amó tanana rore, amó donu kaifa ari-du rea, undú ututurera-nu unona kaifa urota, aná fefera bubaita rouvie. 13 Iesu Keriso de takembuturera-du unona indú gaabee aride neno baride ututuria-nu ivatava iti! Aghá urota, amó indú gaa bee nuenembo irugeta urera-nu ambo-ambo urota iradi rere! 14 Asisi Kakara inda neno rova vitia-da sonembami indú donu ututuria-nu gaabee urota, kaifa adi rere!
15 Namonde anda ikoko mendi, ariri gharovu dano Esia Frovensiva vitia-mi, Fijelus de Hermojenes de dano amó injigha ea, goitu fotiturie. 16 Amó Onesiforus da gaga itoko raita rore. Fefera inono umó andú neno yaura ututa ria-du, kotú amó diburava vitara-du, umó jo meka ambi re. Aghá-gea, God Afa na Onesiforus unda evetu mendi sasingudedu mema ea, unda sonemba utota bubugoe! 17 Umó futa, bogu naa Rom anava buburita feferava, tatavami amó tava ea tafivuta. 18 Bogu naa Efesus anava beago, umó emboro oruabeva amó sonembuta, imó tanana roravore. Amindu rea, fefera furá bubadua-va, Jojabee na Onesiforus du mema urota, sonembari-du uno rore.