Yinni Gusunɔ ù kun diru bɑnimɔ,

be bɑ tu bɑnimɔ sɔmburu kɑmɑ bɑ mɔ̀.

Yinni Gusunɔ ù kun wuu kɔ̃su,

be bɑ ɡu kɔ̃su bɑ dom serɑwɑ kɑm.

2 Kɑm sɔɔrɑ kɑɑ wɑhɑlɑ ko ɑ kɑ wunɛn dĩɑnu wɑ ɑ di.

Kɑɑ se buru buru yellu kpɑ ɑ kpunɑ sere wɔ̃ku suunu sɔmburun sɔ̃.

Adɑmɑ wi Gusunɔ u kĩ,

u rɑ nùn dĩɑnu wɛ̃wɑ bɑɑ yɛ̃ro ù n dò.

3 Wee, bibu bɑ sɑ̃ɑwɑ tubi ye yɑ wee Gusunɔn min di.

Bɑ sɑ̃ɑwɑ soseru te tɑ wee Gusunɔn min di.

4 Bii be bɑ mɑrɑ ɑluwɑɑsiru sɔɔ,

bɑ sɑ̃ɑwɑ nɡe sɛ̃ɛnu tɑbu durɔ dɑmɡiin nɔmɑɔ.

5 Doo nɔɔruɡiiwɑ wi u bu wɑ n dɑbi.

U sɑ̃ɑwɑ nɡe wìn sɛ̃ɛ bwɑ̃ɑrɑ sɛ̃ɛnu yibɑ.

U ǹ sekuru wɑsi sɑnɑm mɛ u koo kɑ win yibɛrɛbɑ yinnɑ wuun ɡbɑ̃rɑrun kɔnnɔwɔ.