116
1 Nɑ Yinni Gusunɔ kĩ,
domi u rɑ nɛn nɔɔ nɔ nɑ̀ n nùn sokɑ.
2 U rɑ nɛn ɡɑri swɑɑ dɑki.
Wiyɑ ko nɑ n dɑ soku nɛn wɑ̃ɑrun tɔ̃ru kpuro sɔɔ.
3 Gɔɔn yɔni yi rɑɑ mɑn bɔkuɑ,
mɑ ɡɔribun wɑ̃ɑ yerun nuku sɑnkirɑnu mɑn nɛni.
Nɑ wɑ̃ɑ nɔni swɑ̃ɑru kɑ wuriribu sɔɔ.
4 Yerɑ nɑ Yinni Gusunɔ nɔɔɡiru sue nɑ nɛɛ,
Yinni Gusunɔ, ɑ nɛn wɑ̃ɑru wɔro.
5 Gusunɔ bɛsɛn Yinni u sɑ̃ɑwɑ tɔn ɡeo kɑ ɡemɡii.
Mɛyɑ win wɔnwɔndɑ kpɑ̃.
6 Yinni Gusunɔ u rɑ bwɛ̃ɛbwɛ̃ɛbu kɔ̃su.
Nɑ rɑɑ wɔnwɔndu soore,
ɑdɑmɑ u mɑn fɑɑbɑ kuɑ.
7 Nɛn bwɛ̃rɑ, ɑ wɛ̃ro,
domi Yinni Gusunɔ u mɑn ɡeɑ kuɑ.
8 Geemɑ, u mɑn wɔrɑ ɡɔɔn di,
mɑ u nɛn nɔni yĩresu wokɑ, u ǹ dere n sokurɑ.
9 Kon sĩ win wuswɑɑɔ hɑnduniɑ ye sɔɔ.
10 Nɑ nùn nɑɑnɛ doke, bɑɑ mɛ nɑ nɛɛ, nɑ wɔnwɔndu soore.
11 Nɛn nuku sɑnkirɑru sɔɔ,
nɑ nɛɛ, ɡoo sɑri wi u nɑɑnɛ mɔ.
12 Mbɑ kon Yinni Gusunɔ dibu kɔsiɑ ɡeɑ ye u mɑn kuɑn sɔ̃.
13 Kon tɑm tɑ̃rɑ win wuswɑɑɔ,
kpɑ n win yĩsiru soku n kɑ nùn siɑrɑ
fɑɑbɑ ye u mɑn kuɑn sɔ̃.
14 Nɔɔ mwɛɛ ni nɑ nùn kuɑ,
kon nu yibiɑ win tɔmbu kpuron nɔni biru.
15 Be bɑ Yinni Gusunɔ nɑɑnɛ sɑ̃ɑn ɡɔɔ u sɑ̃ɑwɑ ɡɑ̃ɑ bɑkɑnu win mi.
16 Yinni Gusunɔ, ɑ nɛ, wunɛn sɔm kowo swɑɑ dɑkio.
Nɑ sɑ̃ɑwɑ wunɛn sɔm kowo tɔn kurɔn bii.
Wunɑ ɑ nɛn yorun wɛ̃ɛ burɑ.
17 Yen sɔ̃nɑ kon nun siɑrɑbun yɑ̃kuru kuɑ,
kpɑ n wunɛn yĩsiru soku.
18 Nɔɔ mwɛɛ ni nɑ nun kuɑ,
kon nu yibiɑ wunɛn tɔmbu kpuron nɔni biru,
19 wunɛn sɑ̃ɑ yerɔ Yerusɑlɛmun suunu sɔɔ.
Yen sɔ̃, i Yinni Gusunɔ siɑro.