102
1 Wɔnwɔndon kɑnɑru sɑnɑm mɛ u nuki sɑnkire mɑ u win weeweenu Yinni Gusunɔ sɑɑriɑmmɛ.
2 Yinni Gusunɔ, ɑ nɛn kɑnɑru swɑɑ dɑkio.
A de ɑ nɛn wuri nɔ.
3 A ku mɑn biru kisi sɑnɑm mɛ nɑ nuki sɑnkire.
A mɑn swɑɑ dɑkio sɑnɑm mɛ nɑ nun soku,
ɑ mɑn wurɑri fuuku.
4 Domi nɛn wɑ̃ɑrun tɔ̃rɑ doonɔ nɡe wiisu,
mɑ nɛn kukunu dɔ̃ɔ mɔ̀ nɡe dɑ̃ɑ nɔɔ.
5 Nɛn tororɑ kɑrɑ mɑ nɛn ɡɔ̃ru ɡɑ ɡberɑ nɡe yɑkɔ ɡbebu,
sere dĩɑnu kun mɑn binɛ mɔ̀.
6 Nɛn weeweenun sɑɑbu nɑ woorɑ.
7 Nɑ kɑ kpɑkpɑyɛ ɡbeeku weenɛ.
Nɑ sɑ̃ɑwɑ nɡe booro ɡe ɡɑ wɑ̃ɑ bɑnsɔ.
8 Nɑ ku rɑ dweeye, nɑ sɑ̃ɑwɑ nɡe ɡunɔ
ɡe ɡɑ wɑ̃ɑ ɡe teu diru wɔllɔ.
9 Nɛn yibɛrɛbɑ bɑ rɑ n mɑn wɔmmɔwɑ bɑɑdommɑ
kpɑ bɑ n kɑ nɛn yĩsiru bɔ̃rumɔ.
10-11 Wunɛn mɔru bɑkɑn sɔ̃, torom mu kuɑ nɛn dĩɑnu.
Mɑ nɛn nɔni yĩresu su wɔrikimɔ nɛn nim nɔrurɑm sɔɔ.
Domi ɑ mɑn yɑrɑ ɑ kɑsɑ kɔ̃ n tomɑ.
12 Nɛn wɑ̃ɑrun tɔ̃ru tɑ doonɔ nɡe dɑ̃ɑ sɑɑru,
mɑ nɑ dɑm dwiiyɑmɔ nɡe yɑkɔ ɡbebu.
13 Adɑmɑ wunɛ Yinni Gusunɔ,
kɑɑ n bɑndu diiwɑ sere kɑ nɔrɔ.
Mɛyɑ bɑ ko n nun yɑɑye sere kɑ bɑɑdommɑɔ.
14 Kɑɑ sewɑ ɑ Siɔni wɔnwɔndu kuɑ,
domi sɑɑ ye ɑ yi yɑ turɑ ɑ kɑ ye wɔnwɔndu kuɑ.
15 Wunɛn sɔm kowobu bɑ ye kĩ sere kɑ yen bɑnsɔ.
Bɑ mɑɑ yen tuɑ mɛɛrɑ ɡɑ̃ɑ ɡeenu.
16 Mɛyɑ bwesenu kpuro nu koo wunɛn yĩsiru nɑsiɑ.
Kpɑ nin sinɑmbu kpuro bu wunɛn yiikon bɛrum ko.
17 Sɑnɑm mɛ Yinni Gusunɔ u koo wure u Siɔni bɑni,
u koo tii sɔ̃ɔsi win yiiko sɔɔ.
18 U rɑ sɑ̃ɑron kɑnɑru nɔ.
U ku rɑ tu ɑtɑfiiru ko.
19 A de bu yeni yore bwese te tɑ koo mɑrurɑn sɔ̃,
kpɑ tɔn be bɑ ko n wɑ̃ɑ, bu Yinni Gusunɔ siɑrɑ.
20 Domi wɔllun diyɑ Yinni Gusunɔ u tem mɛɛrɑ.
U mɛɛrimɔ sɑɑ win wɑ̃ɑ yee dɛɛrɑrun di
21 u kɑ yobun weeweenu nɔ u be bɑ ɡbiɔ yɑkiɑ.
22 Kpɑ bu win yĩsiru kpɑrɑ
bu nùn siɑrɑ Yerusɑlɛmuɔ
23 sɑnɑm mɛ bwesenu kpuro nu koo mɛnnɑ kɑ nin sinɑmbu
bu kɑ nùn sɑ̃.
24 U nɛn dɑm dwiiyɑsiɑ nɛn wɑ̃ɑrun suunu sɔɔ.
U nɛn tɔ̃ru kɑwɑ.
25 Nɑ ɡeruɑ nɑ nɛɛ, nɛn Yinni, wunɛ wi ɑ wɑ̃ɑ kɑ bɑɑdommɑ,
ɑ ku mɑn wunɑ sɛkum sɔɔ.
26 Toren di ɑ tem tɑkɑ kuɑ.
Wunɛn nɔmɑ ɑ mɑɑ kɑ wɔllu kuɑ.
27 Ye kpuro yɑ koo doonɑ, ɑdɑmɑ wunɛ, kɑɑ n wɑ̃ɑwɑ.
Yɑ koo tɔkɔru ko nɡe yɑ̃nu.
Kɑɑ ye kɔsi nɡe yɑberu.
Mɛyɑ yɑ koo mɑɑ sɑɑrɑ.
28 Adɑmɑ wunɛ, wunɑ mi. A ǹ tɔkɔru mɔ̀.
29 Wunɛn sɔm kowobun bibu bɑ ko n wɑ̃ɑwɑ ben temɔ.
Ben bweseru tɑ koo tɑ̃si wunɛn wuswɑɑɔ.