1 I Yinni Gusunɔ wom kpɔɔ kuo.

Bɛɛ hɑnduniɑɡibu, i nùn womu kuo.

2 I Yinni Gusunɔ womu kuo.

I nùn bɛɛrɛ wɛ̃ɛyɔ.

I win fɑɑbɑn lɑbɑɑri kpɑro tɔ̃ɔ bɑɑtere.

3 I bwesenu win yiikon fɑɑɡi kuo.

Kpɑ i win mɑɑmɑɑkin ɡɑri ɡere.

4 Domi wi, Yinni Gusunɔ u kpɑ̃.

Wiyɑ bɑ koo bɛɛrɛ wɛ̃. U bũnu kpuro dɑm kere.

5 Domi nu sɑ̃ɑwɑ kɑm dirum.

Wiyɑ u wɔllu tɑkɑ kuɑ.

6 Yɑm bururɑm kɑ yiiko bɑkɑ yɑ rɑ n nùn wɑ̃ɑsi.

Dɑm kɑ ɡirimɑ yɑ wɑ̃ɑ win sɑ̃ɑ yerɔ.

7 Bwesenu kpuro, i nɑ i Yinni Gusunɔ bɛɛrɛ wɛ̃.

I nɑ i win dɑm kɑ win yiikon ɡɑri kpɑrɑ.

8 I Yinni Gusunɔn yĩsiru bɛɛrɛ wɛ̃ɛyɔ.

I duo win sɑ̃ɑ yerɔ kɑ kɛ̃nu.

9 I nɑ i nùn kpunɑ kɑ bɛɛn sɑ̃ɑ yɑ̃nu.

Bɛɛ hɑnduniɑɡibu kpuro, i diirio.

10 I bwesenu kpuro sɔ̃ɔwɔ i nɛɛ, Yinni Gusunɔ u bɑndu di.

U tem swĩi mu dɑm mɔ, mu ǹ mɑɑ yĩirimɔ.

U rɑ tɔmbu siriwɑ dee dee.

11 Wɔllu tu nukuru doro. Tem mu yɛ̃ɛrio.

Nim wɔ̃ku kɑ ye yɑ wɑ̃ɑ ɡe sɔɔ kpuro yu kukirio.

12-13 Gberu kpɑɑnɛ yu nukuru doro kɑ ye yɑ wɑ̃ɑ ye sɔɔ kpuro.

Dɑ̃nu nu tɑki koowo Yinni Gusunɔn wuswɑɑɔ, domi u wee.

U wee u hɑnduniɑ siri, kpɑ u yen tɔmbu siriɑ dee dee.