Yinni Gusunɔ, ɑ mɑn swɑɑ dɑkio kpɑ ɑ nɛn kɑnɑru nɔ.

Wee nɑ sɑ̃ɑru kɑ wɔnwɔndu soore.

2 A nɛn hunde beruo, domi nɑ rɑ nun sɑ̃.

Gusunɔ, nɑ nun nɑɑnɛ sɑ̃ɑ,

ɑ mɑn fɑɑbɑ koowo.

3 Yinni, wunɑ nɑ rɑ nɔɔɡiru sue bɑɑdommɑ.

A mɑn wɔnwɔndu kuo.

4 Yinni, ɑ mɑn nuku dobu wɛ̃ɛyɔ.

Wunɑ nɑ rɑ n kɑnɑmɔ kɑ nɛn ɡɔ̃ru kpuro.

5 Yinni, ɑ sɑ̃ɑwɑ tɔn ɡeo,

ɑ rɑ mɑɑ tɔmbu ben durum wɔke.

A rɑ be bɑ nun soku kpuro kĩru sɔ̃ɔsi tɑ n kpɑ̃.

6 Yinni Gusunɔ, ɑ nɛn kɑnɑru nɔɔwɔ.

A nɛn weeweenu swɑɑ dɑkio.

7 Domi nɑ̀ n nun kɑnɑ nɔni swɑ̃ɑrun sɑɑ,

ɑ rɑ mɑn wisi.

8 Gɑ̃ɑnu sɑri ni nu kɑ nun weenɛ ye bɑ rɑ sɑ̃ kpuro sɔɔ.

Gɑ̃ɑnu mɑɑ sɑri ni nu kɑ wunɛn sɔmɑ weenɛ.

9 Bwese ni ɑ tɑkɑ kuɑ kpuro nu koo nɑ nu yiirɑ wunɛn wuswɑɑɔ,

kpɑ nu wunɛn yĩsiru bɛɛrɛ wɛ̃.

10 Domi ɑ kpɑ̃, ɑ rɑ mɑɑ sɔm mɑɑmɑɑkiɡinu ko.

Wunɛ turowɑ ɑ sɑ̃ɑ Gusunɔ.

11 Yinni Gusunɔ, ɑ mɑn wunɛn swɛɛ sɔ̃ɔsio,

kpɑ n wɑ n sĩ wunɛn ɡem sɔɔ.

A de n wunɛn yĩsiru nɑsiɑ.

12 Gusunɔ nɛn Yinni, kon nun siɑrɑ kɑ nɛn ɡɔ̃ru kpuro,

kpɑ n nun bɛɛrɛ wɛ̃ sere kɑ bɑɑdommɑɔ.

13 Domi ɑ mɑn durom bɑkɑm kuɑ,

ɑ mɑn yɑrɑ ɡɔribun wɑ̃ɑ yerun sɔɔ sɔɔn di.

14 Yinni Gusunɔ, tii suobu bɑ mɑn seesi.

Tɔn kɔ̃sobu bɑ kĩ bu mɑn hunde wunɑ,

be, bèn bwisikunu ku rɑ n wɑ̃ɑ wunɛn mi ɡiɑ.

15 Adɑmɑ wunɛ Gusunɔ, ɑ sɑ̃ɑwɑ Yinni wɔnwɔnduɡii.

A ku rɑ mɔru se fuuku.

Wunɛn kĩru tɑ kpɑ̃.

A mɑɑ sɑ̃ɑwɑ bɔrɔkini.

16 A mɑn mɛɛrimɑ kpɑ ɑ nɛn wɔnwɔndu wɑ.

A nɛ, wunɛn sɔm kowo dɑm kɛ̃ɛyɔ,

kpɑ ɑ mɑn fɑɑbɑ ko nɛ, wunɛn sɔm kowon bii.

17 Yinni Gusunɔ, ɑ mɑn yĩreru sɔ̃ɔsio te tɑ koo mɑn koorɑ,

kpɑ ɑ de nɛn yibɛrɛbɑ bu ye wɑ kpɑ sekuru tu bu mwɑ.

Domi wunɑ ɑ rɑ mɑn fɑɑbɑ ko, kpɑ ɑ mɑn nukuru yɛmiɑsiɑ.