Gusunɔ, wee tɔn tukobu bɑ wunɛn tem wɔri.

Bɑ derɑ wunɛn sɑ̃ɑ yeru tɑ disi duurɑ.

Bɑ derɑ Yerusɑlɛmu yɑ kuɑ bɑnsu.

2 Bɑ wunɛn tɔmbu ɡo,

mɑ bɑ derɑ ɡunɔsu ben ɡonu di.

Bɑ derɑ ɡbeeku yɛɛ yi be, be bɑ nun sɑ̃ɑmɔ min ɡonu temɑ.

3 Bɑ ben yɛm yɑri mu kɑ Yerusɑlɛmu sikerenɛ nɡe nim,

mɑ bɑ ben ɡonu deri mi, ɡoo kun nu sikuɑ.

4 Be bɑ kɑ sun sikerenɛ bɑ sun wɔmmɔ.

Bɛsɛn berusebu bɑ sun yɑɑkoru mɔ̀.

5 Yinni Gusunɔ, sere sɑɑ yerɑ̀ wunɛn mɔru ko n seewɑ.

Sere sɑɑ yerɑ̀ kɑɑ n nisinu seewɑ nɡe dɔ̃ɔ.

6 A de wunɛn mɔru yu wɔri bwese ni nu ǹ nun yɛ̃

kɑ ni nu ǹ nun sɑ̃ɑmɔ sɔɔ.

7 Domi bɑ Isirelibɑ ɡo, mɑ ben tem mu kuɑ bɑnsu.

8 A ku sun bɛsɛn sikɑdobɑn durum sɔbi.

Adɑmɑ wunɛn kĩrun sɔ̃, ɑ sun wɔnwɔndu kuo.

Domi sɑ kuɑ wɔnwɔndobu.

9 Gusunɔ bɛsɛn fɑɑbɑ kowo, ɑ sun somiɔ

kpɑ wunɛn yĩsiru tu bɛɛrɛ wɑ.

A sun wɔro kpɑ ɑ sun bɛsɛn durum wɔkɑ.

10 Mbɑn sɔ̃nɑ kɑɑ de bwesenu nu n mɔ̀,

mɑnɑ bɛsɛn Yinni u wɑ̃ɑ.

A be bɑ wunɛn tɔmbun yɛm yɑri mɔru kɔsieyo

bwesenun suunu sɔɔ bɛsɛn wuswɑɑɔ.

11 Yinni Gusunɔ, ɑ dɛsobun weeweenu nɔɔwɔ,

kpɑ ɑ be bɑ kɑ dɔɔ bu ɡo fɑɑbɑ ko kɑ wunɛn dɑm.

12 Yinni, bwese ni nu kɑ nun sikerenɛ nu nun wɔnwɑ,

ɑ nu nin durum kɔsieyo sere nɔn nɔɔbɑ yiru.

13 Adɑmɑ bɛsɛ wunɛn tɔn be ɑ kpɑre, sɑ ko nun tɔmɑ sere kɑ bɑɑdommɑɔ,

kpɑ bɛsɛ kɑ bɛsɛn bibun bweseru sɑ n nun bɛɛrɛ wɛ̃ɛmɔ.