75
1 Womu ɡe Asɑfu u wom kowobun wiruɡii kuɑ ɡe bɑ mɔ̀, ɑ ku kɑm koosiɑ. Ge wee.
2 Gusunɔ, sɑ nun siɑrɑ.
Wunɛn yĩsiru tɑ yibɑ bɛsɛn nɔɔwɔ.
Sɑ wunɛn sɔm ɡeerun ɡɑri kpɑrɑmɔ.
3 Wunɛ, Yinni Gusunɔ, ɑ nɛɛ,
sɑɑ ye ɑ yi yɑ̀ n tunumɑ, kɑɑ tɔmbu siri ɡem sɔɔ.
4 Tem mu koo kpĩ mu yĩiri kɑ ye yɑ wɑ̃ɑ mɛ sɔɔ.
Adɑmɑ wunɑ ɑ yen ɡberebɑ nɛni.
5 A nɛɛ, be bɑ tii sue bu ku mɑɑ tii suɑ.
A mɑɑ tɔn kɔ̃sobu sɔ̃ɔmɔ bu tii suɑbu derio.
6 Bu ku tii wɔlle suɑ, kpɑ bu tɔn biɑ ɡɑri de.
7 Domi wɔlle suɑbu kun wee sɑɑ sɔ̃ɔ yɑri yerun di,
ǹ kun mɛ sɔ̃ɔ duu yerun di,
bu ǹ mɑɑ wee sɔ̃ɔ yɛ̃sɑn nɔm dwɑru ɡiɑn di.
8 Wunɛ Gusunɔwɑ ɑ rɑ tɔmbu siri.
Wunɑ ɑ rɑ ɡɑbu kɑwe kpɑ ɑ ɡɑbu wɔlle suɑ.
9 Yinni Gusunɔ, ɑ nɔrɑ * nɔrɑ - Nɔrɑ ye bɑ kɑ yɑ̃ mini yɑ sɑ̃ɑwɑ Gusunɔn mɔru ye u koo kɑ tɔn kɔ̃sobu siri. nɛni yɑ tɑm yibɑ mu ɡbisimɔ,
mɑ ɑ mu hɑnduniɑn tɔn kɔ̃sobu wɛ̃ɛmɔ.
Bɑ koo mu nɔwɑ mɑm mɑm sere kɑ mɛn kɔtɔrɔ.
10 Adɑmɑ nɛ, nɑ ǹ nɔɔ mɑrimɔ.
Kon Gusunɔ Yɑkɔbun Yinni tɔmɑwɑ kɑ womusu.
11 U koo tɔn kɔ̃sobun tii suɑbu kpeerɑsiɑ,
kpɑ u be bɑ nùn mɛm nɔɔwɑmmɛ kuurɑsiɑ.