2 Gusunɔ, ɑ mɑn fɑɑbɑ koowo.

Nɑ sɑ̃ɑre nɑ nim mwɛɛre wɑhɑlɑn sɔ̃.

3 Nɑ nummɔ yironu sɔɔ, nɑ ǹ kpɛ̃ n yɔ̃rɑ.

Nɑ wɔri nim bwerɔ mɑ nim torɑ kɑ mɑn doonɔ.

4 Nɑ swĩ nɑ wɑsirɑ sere nɛn ɡɔ̃ru ɡɑ ɡberɑ.

Nɛn nɔni dɑm dwiiyɑ ye nɑ wunɛn somiru mɑrɑ.

5 Be bɑ mɑn tusɑ bɑ ǹ ten wiru kɑ nɑɑsu yɛ̃,

bɑ dɑbi bɑ nɛn wirun seri kere.

Nɛn yibɛrɛ be bɑ kĩ bu mɑn ɡo kɑm bɑ dɑm mɔ.

Ye nɑ ǹ ɡbɛnɛ, bɑ kĩ n yen kɔsire wɛ̃.

6 Gusunɔ, ɑ nɛn ɑsɑnsi sɑriru yɛ̃.

Nɛn torɑnu nu ǹ mɑɑ beruɑ wunɛn mi.

7 Gusunɔ, wɔllu kɑ tem Yinni,

ɑ ku de be bɑ nun yĩiyɔ bu sekuru wɑ nɛn sɔ̃.

Isirelibɑn Yinni,

ɑ ku de be bɑ nun kɑsu bu sekuru di nɛn sɔ̃.

8 Domi wunɛn sɔ̃nɑ nɑ seku bɑkɑru sɔɔwɑ tɑ derɑ nɑ nɛn wuswɑɑ wukiri.

9 Nɛn mɛro bisibu bɑ mɑn mɛɛrɑ tuko.

Nɛn mɛro turosibu bɑ ǹ mɑn yɛ̃.

10 Wunɛn dirun kĩrɑ mɑn mɛnimɔ nɡe dɔ̃ɔ.

Be bɑ nun wɔmmɔ, ben wɔmɑ wɔri nɛ sɔɔ.

11 Sɑnɑm mɛ nɑ tii kɑwɑ nɑ nɔɔ bɔkuɑ, bɑ mɑn funɛ wunɑ.

12 Sɑnɑm mɛ nɑ sɑɑki sebuɑ nuku sɑnkirɑnun sɔ̃,

bɑ mɑn yɑɑkoru mɔ̀.

13 Be bɑ sɔ̃ ɡbɑ̃rɑ kɔnnɔwɔ bɑ mɑn wĩimɔ.

Tɑm nɔrobu bɑ kɑ nɛn yĩsiru womu mɔ̀.

14 Adɑmɑ Yinni Gusunɔ, wunɑ nɛ, nɑ kɑnɑmɔ.

Gusunɔ, ɑ mɑn wurɑrio wunɛn durom bɑkɑm sɔ̃ sɑɑ ye ɑ kĩ.

Domi ɑ rɑ tɔnu fɑɑbɑ ko kɑ ɡem.

15 Kpɑ ɑ mɑn yɑrɑ yironun di n ku kɑ kpɑm num.

A mɑn wɔro nɛn yibɛrɛbɑn nɔmɑn di kɑ nim bwerun di.

16 A ku de nim yiburu tu mɑn wukiri,

kpɑ nim bweru tu mɑn di.

A ku de wɔru bɔkɔ ɡu mɑn kɔrusi.

17 Yinni Gusunɔ, ɑ mɑn wurɑrio wunɛn tɔn ɡeerun sɔ̃.

Wunɛn wɔnwɔn bɑkɑru sɔɔ, ɑ mɑn sĩiremɑ.

18 A ku nɛ wunɛn sɔm kowo biru kisi.

A mɑn wurɑrio fuuku, wee nɑ wɑ̃ɑ nuku sɑnkirɑ bɑkɑnu sɔɔ.

19 A susimɑ ɑ nɛn hunde wɔrɑ.

A mɑn fɑɑbɑ koowo nɛn yibɛrɛbɑn nɔmɑn di.

20 A yɛ̃ nɡe mɛ bɑ mɑn funɛ wunɑ.

Bɑ mɑn sekuru doke, bɑ mɑn kɑm mɛɛrɑ.

A mɑɑ nɛn yibɛrɛbɑ kpuro yɛ̃.

21 Sekurɑ mɑn nuki sɑnkɑ sere nɑ kom yɑɑ bie.

Nɑ mɑrɑ ɡoo u mɑn wɔnwɔndu kuɑ, ɑdɑmɑ sɑri.

Nɑ kɑsu wi u koo mɑn nukuru yɛmiɑsiɑ,

nɑ ǹ wɑ bɑɑ turo.

22 Sɑnɑm mɛ ɡɔ̃ɔrɑ mɑn mɔ̀, bɑ dɛ̃ɛ doke nɛn dĩɑnu sɔɔ.

Sɑnɑm mɛ nim nɔru ɡɑ mɑn mɔ̀, tɑm mɔmmɔmɑ bɑ mɑn wɛ̃ n nɔ.

23 A de ben tɔ̃ɔ bɑkɑ dim mu ko yinɑ sɑnɑm mɛ bɑ sɔ̃ sɛ̃ɛ kɑ bɔri yɛndu.

24 A ben nɔni wukirio bu ku mɑɑ kɑ yɑm wɑ,

kpɑ ben dɑm mu dwiiyɑ.

25 A bu wunɛn mɔru seesio,

kpɑ wunɛn mɔru bɑkɑ ye, yu bu deemɑ.

26 A de ben wɑ̃ɑ yenu nu ko bɑnsu.

Kpɑ ɡoo u kun mɑɑ wɑ̃ɑ ben kuu bekunuɡinu sɔɔ.

27 Domi wi ɑ soomɔ, wiyɑ bɑ nɔni sɔ̃ɔmɔ.

Wi ɑ mɑɑ yɑɑsɑ sɔkɑ ɑ mɛɛrɑ kuɑ,

bɑ win nuku sɑnkirɑnu sosimɔ.

28 A ben torɑnu kpuro yɑɑyo.

A ku bu wɔnwɔndu kuɑ bɑɑ fiiko.

29 A ben yĩsinu ɡoowo wɑ̃ɑrun tirenun di,

kpɑ ɑ ku bu mɛnnɑ kɑ ɡemɡibu.

30 Adɑmɑ nɑ wɑ̃ɑ nuku sɑnkirɑnu kɑ wɑhɑlɑ sɔɔ.

Gusunɔ, ɑ de wunɛn somiru tu mɑn yɑrɑ.

31 Kon Gusunɔ siɑrɑ kɑ womusu.

Kon tɑkɑru ko n nùn wɔlle suɑ.

32 Yeyɑ yɑ rɑ Yinni Gusunɔ wɛ̃re n kere nɑɑ kinɛ yeburu.

33 Be bɑ ɡɛmɑ, bɑ̀ n yeni wɑ, bɑ ko n nuku dobu mɔ.

Bɛɛ be i Gusunɔ kɑsu, i ko n ɡɔ̃ru dobu mɔ bɛɛn wɑ̃ɑru sɔɔ.

34 Domi Yinni Gusunɔ u rɑ sɑ̃ɑrobun ɡɑri nɔ.

U ku rɑ wiɡibu duɑri be bɑ wɑ̃ɑ dɛsiru sɔɔ.

35 Wɔllu kɑ tem kɑ nim wɔ̃ku kɑ kpuro ye yɑ wɑsi mi sɔɔ,

yu nùn tɔmɔ.

36 Gusunɔ u koo Siɔni fɑɑbɑ ko.

U koo mɑɑ Yudɑn wusu bɑni.

Win sɔm kowobu bɑ koo sinɑ wuu si sɔɔ kpɑ su ko beɡisu.

37 Ben bibun bweserɑ koo tem mɛ tubi di.

Be bɑ Gusunɔ kĩ, bɑ ko n ben wɑ̃ɑ yeru mɔ mi.